Isaiya 10 - Ngudradreadrekadhane Ka Sisiu 魯凱語聖經

¹ Lri matikuru numi! Wacegecege numi ku kaika aparamaramau ku hulrice si arakai drepete ki kawkawluli.

² Arakai numi kikai miyaiya kai si ribici ku kindri ki matiakukuru ka umawmase, kwi lalasu lakai maka kiparamaramau; arakai numi kikai miyaiya kikai si ravase ku tacekecekelane ki lawalibakane si lapakulrulrulu.

³ Lu pathavungu numiane ku Twaumase, lri tumane numi? Ku Twaumase lu pangukai ki swa adaaili ka kuni kainganai mailuku ku amatikurwane, lri tumane numi? Lri mwinu numi kitubi ku akiparalubane? Lri pikai numi inu sekete ku tacekecekelane numi?

⁴ Lu kai numi lri pacai ikai ki takikaruburane lri kiravase numi. Adravane ka miyaiya kikai, ku elathane ki Tamatama lri kai idrengere; lri ciidingiana ku alrima si lrumai numiane.

Ku Twaumase twa saarakaiyane ki tinuhika ki swa Asiria

⁵ Ku Tamatama amia kai, “Lri arakaiyaku ki swa Asiria tuukudru si lrumai kwidra waracuku ku akaelaelaneli ku umawmase.

⁶ Lri sikawlaku ki swa Asiria pakatwase kikaruburu kwidra ki ngiasasingikaai ka kadrwa ku ukuludrane ka kuni, kwidra ki lawadawlu ki akalisianeli ka laumawmase. Lri sikawlaku liniane paravase, si kabebetethe kwini ki laumawmase, mia ki thuvugu ka tangukaiyane dredre ki kadalranane ki cekele.”

⁷ Ai ku tinuhika ki swa Asiria mialri ka yakai ku taparamuraneini ngikarakacane. Kwi lasu malrithethe ku amudane ki takaalra ka kuni.

⁸ Wadradrarane iya kai, “Kai latamatama ki lakwapingili lri dulru atalialalai ki kuni makanaelre!

⁹ Pamalebengaku ki cekele ki Kalenu si Karekemise. Pamalebengaku ki cekele ki Hamathe si Arepade. La mialriaku pamalebe ki cekele ki swa Samaria si Damasekuse.

¹⁰ Wasegaku kai alrimali si pathavungu kai ki lakuni, asi lwiyane kwi lalasu wasukubu ki samiamiange; ku samiamiange kwini ki lakuni makakalra ki Yerusalrime si Samaria.

¹¹ Waamudunga naku ki swa Samaria si samiamiange ki swakai kwini; lai mialriaku amudu Yerusalrime si samiamiange ki swakai kwini.”

¹² Ai ku Tamatama amia kai, “Lu tulrepengenga naku ku awngane ikai lregelrege Ziyungu si Yerusalrime, lri pathavungaku ku ngipaparamurane si ngikalrilrigwane ki tinuhika ki swa Asiria.”

¹³ Ku tinuhika ki swa Asiria ngiakalrilrigu iya kai, “Kikai miyaiya kai patuelre amaniaku tangeangeea ka paiya. Magarangaku turamuru, si kalrigili turamuru! Waulravaku ku pagisane kilakikai ki kuni, la ribicaku ku tacekecekelane lini patuelre. Miaku ki sapukwane ka lwange ka wadredre ki yakai kwini ka laumawmase.

¹⁴ Kai lakuni ki kawmasane mia ki lisisuku ki adhadhame, wamalranga naku demedeme ku tacekecekelane lini, mia ki sialuludu ku batuku ikai ki lisisuku ku dwadhane. Kadrwa ku navaevanga ku sapakepake ku wathuru papia nakwane ngipakepake; kadrwa ku navaevanga ku ngudwi ku wathuru papia nakwane karariariau.”

¹⁵ Ai ku Tamatama amia kai, “Bekace ka sanianiange ku kumugu ki tara arakaikai ku kumugu? Ala ka makuciacingalre ku ridraidri ki tara ridraidraidri? Ku ukudru kai lri dulru pubelenge ki umawmase; ai kai umawmase lri dulru arakai ki ukudru.”

¹⁶ Lakamani, ku abebeelengenga ka Tamatama ka abebeelengenga ki sanaka kwapingi lri arakai ku caemane pathavungu ki kwini ki mabucubucuku ka laumawmase. Ikai adringi ki kinawmasane lini lri ikai ku madrareange ku apwi kudaladalai.

¹⁷ Ku Twaumase ka ledra ki swa Iseraylri lri aapwi; sanianiangenga ka Twaumase ki swa Iseraylri lri akelrabe ka apwi. Ikai ki vaivaai kwidra, ku Twaumase lri lama pakawtu patuelre, adravane ka cecenekane ka angatu patuelre kadrwa ku lri abalu.

¹⁸ Ku mawangatungatu si malrange ka takauawngane lri kipakamudu patuelre, mararaamau kwidra tangeea ka macaeme pakilringau si pacai.

¹⁹ Ku tedrane kwini ki angatungatu ku angatu bekelanenga, adravane ka lavavalake wadulru asipi.

Siaulri kela ku abalu ka laumawmase

²⁰ Sa siwlringa kela kudra abalu panianiake saka takiravasane ku swa Iseraylri, kwini lalasu kai satalunga kwidra kiasanu amudu liniane ku kuni; kwini lalasu lrika patengatenganenga kasalru satalu ki Tamatama ka sanianiangenga ka Twaumase ki swa Iseraylri.

²¹ Kwidra tabeekele ka swa Iseraylri lri siwlri mwa ki sapukwane ka Twaumase.

²² Adravane mia ki aenaenai ka enai ku kalrane ki swa Iseraylri, kathane kwidra abalu ka panianiake ku laumawmase ka lri dulru kainganai siwlri. Ku laumawmase lri kipakamudu, kudra akibilriane lri mia ki lriau ka acilai telebe liniane.

²³ Ku abebeelengenga ka Tamatama ki abebeelengenga ki sanaka kwapingi malrithethenga ku amudane ki sakatukuniane.

Ku Tamatama pathavungu ki swa Asiria

²⁴ Ku abebeelengenga ka Tamatama ki abebeelengenga ki sanaka kwapingi amia kai ki laumawmase ki swa Ziyungu, “Kai swa Asiria adravane ka nangiamia ki swa Izipiti kabebetethe numiane, pakwalri numiane, madha mukuludru liniane.

²⁵ Kai lri tarathainu, ukalavaili lu kabasawnga ku lisianeli numiane, lri katwasaku amudu liniane.

²⁶ Kwaku ka Tamatama, ka abebeelengenga ki sanaka kwapingi lri arakaiyaku ku salrumalrumai si lrumai liniane, mia kunadruma ikai Urebe lrumai ki swa Midiange; lri pathavungaku ki swa Asiria, mia kunadruma sa pathavungaku ki swa Izipiti.

²⁷ Ikai kwini ki vai, lri patwaladhaku ki puku ki swa Asiria si palribulu numiane; ku sakatemane kai lri ikainga ki tabalangane numi ka amece.”

Kulri mucekele mwadaane kikaruburu

²⁸ Ku badha kiakaruburu si malra kikai Ai ka cekele! Kwi lalasu walribatenga Migerune; kwi lalasu piakai Mikemase ku saarakaiyane lini ku lamanemane!

²⁹ Kwi lalasu walribatenga valrwalru lregelrege, la ikai Geba sulai. Ku laumawmase cekele Rama mwakuludru; ku swa Gibea ka cekele ki Saule ka talialalai mwaberenga makanaelre.

³⁰ Swa Galime, akwadrava karaleale! Swa Laisa! Kicacaligira kilalra! Matiakuru ka swa Anatute, kunumi tubalrea!

³¹ Mwaberenga makanaelre ku swa Mademingi si swa Gebime.

³² Kaikameane ku badha yakai Nube sulai; kwi lalasu papia Ziyungu lregelrege, papia Yerusalrime vidrividri ku alrima si putata ku akikaruburane.

³³ Drela, ku abebeelengenga ka Tamatama ka abebeelengenga ki sanaka kwapingi lri kikaruburu liniane, mia ki ricingi ki angatu ka kiacalrigi pulebe patwalai ki angatu. Ikai liniane ku mangikalrilrigunga, ku magagarangenga, lri kibilibili pulebe makanaelre, si kitusinalrelreme.

³⁴ Ku Tamatama lri lrudrulu patubakebake liniane, mia ki umawmase ka arakai ku kumugu ikai angatungatu pulebe ki laangatu, adravane ka madradraunga ka angatu ikai Lebanungu lri mialri kipulebe!