Ipisu 5 - Ngudradreadrekadhane Ka Sisiu 魯凱語聖經

Panianianiake ikai ki kalealedrane

¹ Kikai kinilibakanenga numi ka lalalake ki Twaumase, tara twalralrava iniane.

² Kwini tapanianianiakane numi ka tapathingalaana ku sakialibake, mia ki Kirisitu ka kialibake mitane, la pasikai mitane ngiacacilri ku niake, si amani ku sangwalreme ka sapatarumarane ka lamanemane si patarumara ki Twaumase.

³ Kudra la ngwakai ki wacapange ki sawvalai ki ababai, matiadingeselre, si ravane, ikai numiane adravane ka amatikaiyane madha matikaikai, asi lwiyane kunumi yai kawkawlu numi ki Twaumase.

⁴ Kunumi la madha iyaiya ku pasulane, ku ngiakulrungu ku wacacapange, ku ngialisiane ka vaga, iya ku akiaseasenane ki Twaumase ku vaga.

⁵ Kadrwa ku lrikilrikane, ku wacapange ki sawvalai ki ababai, ku matiadingeselre, ku marau ku umawmase (marau lwiya amani kai wasukubu ki samiamiange) lu tuumane kai lri maka aumawmase ki Kirisitu si kuni ki Twaumase.

⁶ Madha kiarakaikai ku kadrwa ku paluludane ku vaga si kitavuvulrucu ki aneaneeanenga; ngwalai ki kikai, ku elathane ki Twaumase lri mulebe mwa ki wabaebaebalre ki kakudhane ka umawmase.

⁷ Lakamani, madha mangulatatatadre kai ki miyaiya kaika umawmase.

⁸ Kunumi nayakai numi kadradridrimitane, ai saka sinzianga numi ki Tamatama, yakainga numi ki ledra. Kwi tapanianianiakane tara ngimia ki waledraedra ka umawmase.

⁹ Kai ledra pwamadru ngiesadhane patuelre, amani kai sulrapelane, dringelresane, si patengane ka sabulrwane.

¹⁰ Thingala pilri luka manemane ku akiragadhane ki Tamatama ku awngane.

¹¹ Madha piapia ku piapia ki palrapalra ikadradridrimitane ka kaika akaesadhane, malralringa ki kikai miyaiya kai putaluvaivai.

¹² Kai ikai lini ki dradridrimitane pia kai ngialisiane, matiainu turamuru ka kaika amatikaikaiyane!

¹³ Sanaka maneemane lu kiputaluvaivainga, adrelane ku tangimiamiane,

¹⁴ asi lwiyane kudra lri dulru putaluvaivai patuelre amani kai ledra. La kamani ikai ki pacase ka senai amia ki kikai, Pacuna ka wapece ka umawmase! Twaladha ki wapacai ngidrakaale! Ku Kirisitu lri paledra numiane.

¹⁵ Lakamani, dradreela kwi kakwakudhane numi. Madha ngialralrau ki kadrwa ku thingale ka umawmase, ngialralrava ki sakidremedremane ka umawmase.

¹⁶ Pudriadringadha papanianiake arakai kai zikange, asi lwiyane kikainga kai vai matiaukuludrunga turamuru.

¹⁷ Lakamani, madha kangalradangadangade, thingala ku takidremedremane ki Tamatama luka manemane.

¹⁸ Madha kabusubusuku, amani ku lri pangilisiane ki umawmase, kisuetea ki Siri!

¹⁹ Arakaiya ku senai, ku sanbika, ku senai ki abake si matubaebalre senai, patwaladha ki kidremedreme pangibwale senai, si drengedrengere ki Tamatama, papia iniane senai,

²⁰ pangukaiya ku nagane ki Tamatamata ka Yesu Kirisitu si pasikai sanaka awngane kiaseasene ki Tama ka Twaumase.

Tamacacapilane ki ladrwadrusa

²¹ Kunumi yai mapasalaladha, asi lwiyane amani numi ku mwasakesakene ukuludru ki Kirisitu.

²² Ku taelrelre ka ababai, pasalaladha ki taelrelre numi ka sawvalai, mia ki pasalaladha ki Tamatama.

²³ Asi lwiyane kai taelrelre ka sawvalai yai awlru ki taelrelre ka ababai, mia ki Kirisitu ka amani ku awlru ki kiwkai ka kinawmasaneini, laka Takipalribulribulane ki kiwkai.

²⁴ Mia ki kiwkai pasalaladha ki Kirisitu, kai taelrelre ka ababai lri pasalaladha ki taelrelreini sanaka maneemane.

²⁵ Ku taelrelre ka sawvalai, kunumi kilibaka ki taelrelre numi, mia ki Kirisitu ka kialibake ki kiwkai, si pasikai ki kiwkai ngiacacilri ku niake.

²⁶ Ku piaini ki kikai yai lri pangukai ki vagaini si acilai pakabula ki kiwkai, ku lrika alrivilrivaneini,

²⁷ ngiesadhane kathariri, alrivilrivi ku kidremedreme, ka kadrwa ku pwalane, ka kadrwa ku kudrulru si angelrecane, pakai ku angipapatarumaraneini.

²⁸ Ku taelrelre ka sawvalai lri kilibake ki taelrelreini, mia lu ngikakilibake ki kinawmasaneini, ku kialibake ki taelrelreini ka ababai amani ku ngiakakilibake.

²⁹ Kadrwa ku umawmase ku malrase ki kinawmasaneini; tara ngiakakilibake ngisasirapale, mia ki Kirisitu ku tapangimiane ki kiwkai.

³⁰ Asi lwiyane amanita ku ricingi ki kinawmasaneini.

³¹ Kai Sisiu amia kai, “Lakamani, kai umawmase lri kitukudha ki marudrawdrange lini, si maelre ki taelrelreini, kai tadrusa ka umawmase lai lrika vaevanga ka kinawmasane.”

³² Kikai pacase ki Sisiu peaelaela kai maadrau turamuru ka kaika athingalane ka matiasamaimali. Wathingalaku kikai taiyaiyane, amani ki Kirisitu si kiwkai ku tamacacapilane.

³³ Ai adulrwane arakai ikai ki kinawmasane numi, kai taelrelre ka sawvalai lri tara kilibake ki taelrelreini, mia lu ngikakilibake, kai taelrelre ka ababai lai lri tara tukuciingalre usakene ki taelrelreini ka sawvalai.