Ipisu 4 - Ngudradreadrekadhane Ka Sisiu 魯凱語聖經

Avaevanenga ikai ki kiwkai

¹ Lakamani, lri kawrivaku pasapukwane numiane, kwaku yai amani sa pasikaiyaku ki Tamatama la kamani ku kiemengeli, ku tatwatumanane numi si takaumawmasane numi pamamwa kudra lekete ki Twaumase sadawlu numiane.

² Kunumi yai ngitatwalebea, kasulrapela, kiadila, la arakai ku sakialibake si mapaceacepe,

³ la arakai ku rathudane maelrelre, si pakaelre ku puku pangimia ku baai ki Siri ku amaelrelreane ku kidremedreme si avaeva.

⁴ Vaeva ku kinawmasane, vaeva ku Siri, mia ki Twaumase ku tadawlane numiane si kisupisupilri ku vaeva ka sasiadradrama.

⁵ Vaeva ku Tamatama, vaeva ku salrwane, vaeva ku akipabanavane.

⁶ Vaeva ku Twaumase, amani ku Tama ki sanaka umawmase, yakai kikai ki sanaka maneemane, si rathudu sanaka maneemane, la apadawdaruru sanaka maneemane.

⁷ Kuta ka tangeea singiakaita ku tapadrudrulrane ki Kirisitu, si tarumara ku nipawkalrivilane ka migemi.

⁸ Mararaamau ku taiyane ki Sisiu: Ku lasu samubelenge mwa ki sabebeelengenga, mailuku ku kaika amaka asiasipane ku niravasane, la baai ku migemi ki umawmase.

⁹ Kikai taiyane, “Ku lasu mwabelenge” iya manemane ku pacugane? Amia kikai, ku lasu napaswala mulebe, la mwa lebe ki saleleebenga.

¹⁰ Kudra “mwalebe” amani kwidra “mwabelenge” mwa ki sabebeelengenga, ku piaini kikai amani ku asueteane ikai ki sanaka maneemane.

¹¹ Lakamani kwidra, “Wabaai ku migemi ki sanaka umawmase.” Wakelrete ku lri ikai ku anisikawlane ku la ayuginsia, la tarapelaelaela ku hukuingi, la ikai ku la abukusi ku atarabulrubulru.

¹² Pakai ku apadulrwane ki umawmase ki Twaumase ku apasikaiyane iniane kaungu, si pacegecege ku kiwkai ka amani ku kinawmasane ki Kirisitu.

¹³ Ku bibiilrilinga, ku tapapianeta ki Lalake ki Twaumase lrika vaevanga ku salrwane si tathingalane, lai lri kadrawngata ka pwacacuganenga ka umawmase, si padaruru ki Kirisitu ku takabeaneini.

¹⁴ Lukamiyaiya kai, lai kaita ngialrawnga ki lavavalake, ulrabuku ku daedarepe ki umawmase ku salrilrigilane, si tupapapalra singikai ku makaelaela ku takawrivane ki umawmase.

¹⁵ Ngiabalre kamani, lri arakaita ku sakialibake kawriva kapatengatengane, ikai kidruanga la papia ki Kirisitu si adiadili. Ku Kirisitu amani ku awlru;

¹⁶ ku kinawmasane satalu iniane patuelre, la ngukai ki lapararegeregane uvace mamwamwa si maelrelre. Lukamiyaiya kai, lu ngivelevelenga kai lararukudrane ki kinawmasane, kai kinawmasane lai lri ikainga ki sakialibake kadradrau, si arungiesaesadhane.

Bavane ka niake ikai adringi ki Kirisitu

¹⁷ Kaiasasane lri pangukaiyaku ku nagane ki Tamatama pelaela numiane: Madha kangimiyaiyaiyanga ki sakamaelanane ka umawmase ku tapanianiakane numi. Kudra kidremedreme lini kai mamamwa ki kakudhane,

¹⁸ madradrimiti ku kidremedreme lini, la maka kitukudhanga ki niake ka baai ki Twaumase, asi lwiyane kai lalasu kiasalru kakadrwa ku thingale, makeelrathe turamuru.

¹⁹ Kadrwanga ku inuane ku kidremedreme lini, singiakainga ki urikai ki kinawmasane lini, kadrwanga ku maka waruthuku ku apiane ku ngialisiane ku kakudhane.

²⁰ Ai, ku patwalai numi twalralrau ki Kirisitu kaika miyaiya kikai!

²¹ Kialalranga numi ku pangwakai iniane, la asinzianga numi iniane, si twalralrawnga numi kudra lu ikaiyane ki Yesu yakai ku patengane ka sabulrwane.

²² Kunumi la kalrabutha kudra “Takasupilraneli”. Kaamani ku pangialisiane ki tapanianiakane numi, kwini takasupilraneli yai ngwalai ku takilrilrigilane ki ngipapakaesadhane ki kidremedreme si kaburau.

²³ Aru kabavana kwi takidremedremane numi,

²⁴ silaimadha kwini “Takabavananeli”, kikai takabavananeli yai patwalrau ku tangimiane ki Twaumase, si putaluvaivai patwalai ki patengane ka sabulrwane ka madringelrese si alrivilrivi.

²⁵ Lakamani, kunumi madha kadraedraedrangelrenga! Sanaka tangea tara tukapatengana kawriva ki laretesane, asi lwiyane kinawmasaneta ki Kirisitu makanaelre.

²⁶ Alaiyasi kalisi numi, madha ngwalalai ki lisiane numi si pasalriu, la madha palrilriwgu ku vai kalisi,

²⁷ madha pikaikai ku atakaiyane ki aidridringane.

²⁸ Ku nakwaupawpa madha kupawpanga, arakaiya kwi alrimasu kapatengatengane kaungu lani ikai ku puku paralubu ki matiakukuru.

²⁹ Ikai ki vaga madha duladula ki palrapalra, kawriva ku aparalubane ki umawmase sikakathane, si adilane ki palrapalra, lani muesai ku kialalra ku umawmase.

³⁰ Madha pakwalrialri ki Siri ki Twaumase, asi lwiyane kai Siri amani ku sapatuthingalane ala ka Twaumasane numi, sapelaelane ka lri tara keela ku apawlatadrane numiane ki Twaumase ka vai.

³¹ Kunumi mwalra cilri patuelre ku lisiane, girimucane, elathane. Madha rivurivunga madha tulililisinga, ani kai ikainga ku lisiane patuelre.

³² Makathalralradha, si mapaceacepe, mia ki Twaumase pangwakai ki Kirisitu si pacepe numiane.