Ipisu 3 - Ngudradreadrekadhane Ka Sisiu 魯凱語聖經

Ku Pawru papia ki sakamaelanane ka umawmase pelaela ku hukuingi

¹ Lakamani, pasiakaiyaku numiane ka sakamaelanane ka umawmase kamani ku kiaemenge ki Yesu Kirisitu ka Pawru atalingikaikaiyane numiane papia ki Twaumase kitubi.

² Lri tara thingale numi, pakai ku akaesadhane numi, patarwamara ku migemi ku Twaumase, la patarumara nakwane ka taingeane ku awngane.

³ Peaelaela nakwane, la dulrwaku thingale ku kaika athingalane ka matiasamaimali. (Wapacasenga naku ngubebeelenge kikai ki kaika athingalane ka matiasamaimali,

⁴ sana silrigu numi lri thingale numi ku tathingalaneli ku kaika athingalane ka matiasamaimali ku ngwakai ki Kirisitu ka manemane.)

⁵ Ku siaswalane, ku Twaumase kai peaelaela sanaka umawmase kikai kaika athingalane ka matiasamaimali, kaiasasane pangwakai ki Siri si pelaelanga ki nisikawlane si yuginsia.

⁶ Ku taiyane kikai ki kaika athingalane ka matiasamaimali yai miyaiya kai: Ngwakai ki hukuingi, kai sakamaelanane ka umawmase wadulrunga mararamau ki swa Yuda kisupisupulri ku akaesadhane ki Twaumase. Kai lalasu vaeva ku kinawmasane ka matwariciricingi, si kisupisupilri ki Twaumase ku pangukai si ikai ki Yesu Kirisitu putaluvaivai ku pinalrainganenga.

⁷ Ngwalai kikai maelane ka subulrubulru ki Twaumase; amaningaku ku sasiakawlu ki hukuingi, kikai yai singiakai ku tapangimiane ki pukuini si baai nakwane.

⁸ Adravane ka amaniaku ku titikiyanenga ki sanaka lasinzia, ku Twaumase ala wabaai nakwane ku maelane ka puku, ku amaka dulrwane malra ku maadrau turamuru ku hukuingi ki Kirisitu si baai ki sakamaelanane ka umawmase,

⁹ ku athingalane sanaka umawmase luka watumane pangimia kudra kaika athingalane ka matiasamaimali ka kikakeini ki Twaumase. Ku siaswalane ku zidai, ku wabekace sanaka maneemane ka Twaumase wasekete ki kikai kaika athingalane ka matiasamaimali,

¹⁰ ku tapiane kikai lri ikai kaiasasane ki zidai, pangukai ki kiwkai, lai dulru kai maerece ki ngwababelenge, magagemegeme ki puku, lri thingale makanaelre ku makaelaela ku lrigilane ki Twaumase.

¹¹ Ku tapiane kai ki Twaumase patwalai ki palralrawthu ka takidremedremaneini, kikai kidremedremeini ngiamianga ikai ki kinawmasane ki Tamatamata ka Yesu Kirisitu.

¹² Ngwakai ki Kirisitu, si kasalru iniane, la dulrungata ka kadrwa ku saukukuludru mucucubungu ki Twaumase.

¹³ Lakamani, kiatubiaku numiane, madha ngwalalai ku tapasikaiyaneli numiane kipakwalri si kasulri, malralringa ngitatulrigu kamani.

Sakialibake ki Kirisitu

¹⁴ Lakamani, wapidruraku icucubungu ki Tama ka yabelenge.

¹⁵ Kai subelebelenge si kai kawmasane sanaka ladadaanane twalai ki Twaumase ala ikai.

¹⁶ Kiatubiaku ki Twaumase, singikai kudra ngiradhekanane ku lriguini, la ngukai ku patarumara ki Siri ku puku numiane, ala kakeecenge sapukwane kwi bavane ka niake numi.

¹⁷ La kitubiaku ki Kirisitu, ngukai ki salrwane numi, si ikai ki kidremedreme numi, lanu maka ikai ki sakialibakeini balace.

¹⁸ Lanu maka dulru taelre ki kawkawlu ki Twaumase si taelre kilringau ku sakialibake ki Kirisitu ala ka swadrau ka maelrenge ka abelenge ka mwadringi turamuru.

¹⁹ Anu kilringau ku sakialibake ki Kirisitu ka amani kudra walribate turamuru ku tathingalane ki umawmase, lanu dulru kitulrepenge kisuete ku tharirane ki Twaumase.

²⁰ Ku Twaumase lri dulru arakai kudra mauawngu ikai mitane ka puku si pangimia sanaka maneemane, lri lribate ki kitubita si takidremedremaneta.

²¹ Ani pangukai ki Yesu Kirisitu, si kidrengedrengere ikai ki kiwkai, pakela lumamilringi! Amingi.