Ipisu 2 - Ngudradreadrekadhane Ka Sisiu 魯凱語聖經

Matwase ki apacadhane si mwa ki apanianiakane

¹ Kunadruma, ngwalai numi ki tapasalrivane si kiecebe ku drekase ki Twaumase, ikai numi ki abake wapacainga numi.

² Sakamani kwidra, twapapalra numi kai ki ngialisiane ka kakudhane ki kawmasane, si pasalaladha kai ki magagemegeme ki ngwababelenge, amani kai marasiakai ruthuku kudra ki lakiaecebe ku drekase ki Twaumase ka ngialisiane ka ri.

³ Ku patengatengane, sakanadruma namiyaiyata liniane, pangialralraingi ku kadalame ki sakwaka takaumawmasaneini, si la pasalaladha ki murikai ki beateini. Lakamani, kadrwa ku tamakakaelaneta ki palrapalra, ka nipasudalepanenga ka lri kipathavungu ki Twaumase.

⁴ Ai, ku Twaumase maadrau turamuru ku thalithiane, ku takilibakaneini mitane maadrau turamuru ka kadrwa ku taalikaiyane.

⁵ Kai abaketa sa ikai ki kiaecebe ka pasalrivane wapacai, ku Twaumase wamalra mitane patupapalra ki Kirisitu sielane, migemini ka palribulunga numiane.

⁶ Ku Twaumase la malra mitane pikai adringi ki niake ki Yesu Kirisitu pakarededele ki Kirisitu sielane panianiake, si taelre ikai belenge magagemegeme ku puku.

⁷ Ku tapianeini kikai lri paathingalane ki mwacucungulu ku maadrau turamuru ku migemi, amani kwidra patwalai ki Yesu Kirisitu padrelane ku sakialibake.

⁸ Kunumi yai satalu numi ku migemi ki Twaumase, si arakai ku salrwane ala kipalribulu, kikai yai kaika twalai ki kakwakudhane numi, baai ki Twaumase.

⁹ Kudra kaika satalu ki kakwakudhane, la kamani ku kadrwa ku angilralrigwane numi.

¹⁰ Ku Twaumase amani ka wabekace mitane, pangwakai ki Yesu Kirisitu tupela mitane, ani pia ku mathariri la iya mitane, kikai kikakeenga ki Twaumase ka anipia kwini iya mitane.

Ikai adringi ki niake ki Kirisitu maelrelre si kavaevanga

¹¹ Sakitulalake numi swakai numi ki sakamaelanane ka umawmase, pulringava ku tangimiane ku ngialribatenga: Kudra kiatulrisinga nai kigelregelre ngiaiya ku umawmase, amani kudra kiara adreme gelregelre pikai ki kinawmasane lini ka swa Yuda ka umawmase, kaina kiatulrisi kigelregelre amia numiane.

¹² Sakamani kwidra, kadrwa ku tamacacapilane numi ki Kirisitu, ka swa latadre ka umawmase, ka kai yadringi ikai ki pinilriane ki Twaumase ka laumawmase. Kadrwa ku drulru numi ikai ki palrainginga ki Twaumase ka abaadhane ki umawmaseini, ikai kawmasane ka kadrwa ku sidramane, laka kadrwa ku Twaumase.

¹³ Kunumi ka kiadaili ki Twaumase kunadruma ka umawmase, kaiasasane la kielrenga numi ki Yesu Kirisitu, ngukai ki tapacadhaneini, si deethenga ki Twaumase.

¹⁴ Ku Kirisitu ngiakakamani malra ku rathudane si baai mitane, la apaelre ki swa Yuda si sakamaelanane ka umawmase si kavaevanga, arakai ku kinawmasaneini kadrulu kudra ki amani ku apakakabadha liniane, si kudra apakakitulrigane liniane ka balingibingi.

¹⁵ Wasuburunga mwalra kudra ninguvavaevane ka padradrekase ki swa Yuda, pakai ku amalrane ki taidrusa ka umawmase si ngukai ki niakeini avaevanga ka bavane ka umawmase, si karathudu si taelrenga.

¹⁶ Ngwakai ki taikaiyane ki ziwzika pacai, ku Kirisitu paliakainga ku tamaecebane si makakabadha, la ngukai ki ziwzika si avaevanga ku kinawmasane kikai taidrusa, si makakadalrunga ki Twaumase.

¹⁷ Laka miyaiya kai, ku kela ki Kirisitu yai lri pelaela ku rathudane ka hukuingi si baai ki sanaka umawmase, paelre numiane ka nakiadaili ki Twaumase kunadruma ka sakamaelanane ka umawmase si adeethe ki Twaumase ka swa Yuda ka umawmase.

¹⁸ Ngukai ki Kirisitu, adravane ka swa Yuda ka sakamaelanane ka umawmase, wadulruta ikai adringi ka vaeva ka Siri si kainganai mucucubungu ki Tama ka yabelenge.

¹⁹ Lu piane kai drele, kunumi ka sakamaelanane ka umawmase, kai numi ka maelanenga ka umawmase ka kai kiathingale ka umawmase, masakacekecekele numi ka umawmase ki Twaumase, laka vaeva ka wacekecekele ki Twaumase.

²⁰ Ka mararaamau ki swa Yuda, la mialri numi kipacegecege sitangadrane ki nisikawlane si yuginsia, ku Yesu Kirisitu la ngikakamani ka karwalai ka lrenege kai ki daane.

²¹ Satalu iniane, patuelre ku nitudaanane lri marairaisi, si lrika amaninga ku nipatarumarane ki Tamatama ka saniange ka daane ki Twaumase.

²² Satalwa iniane, lai lri mia numi kipakarededele kitudaane, si kamaninga ku taikaikaiyane ki Twaumase ngukai ki Siri.