Ipisu 1 - Ngudradreadrekadhane Ka Sisiu 魯凱語聖經

¹ Kunaku ka Pawru, pangwakaiyaku ku kidremedreme ki Twaumase ka amani ku nisikawlane ki Yesu Kirisitu. Watigamiaku si baai ki yakai Ipisu kudra la yakai ki Yesu Kirisitu pakaelre ku kidremedreme si puku ka lasinzia.

² Ku Tamaita ka Twaumase si Tamatama ka Yesu Kirisitu ani baai numiane ku migemi si sulivatane.

Yadringi ki Kirisitu ka baai ki Siri ka puku

³ Maelanenga ki Twaumase ka Tama ki Tamatamata ka Yesu Kirisitu! Asi lwiyane ku Twaumase pangwakai ki Kirisitu si malra ku makaelaela ikai subelebelenge ku ngwakai ki ri ku akaesadhane si baai mitane.

⁴ Sakaiyana bekace kawmasane, ku Twaumase pangwakainga ki Kirisitu si pilri mitane, la dulruta ikai cucubungu iniane alrivilrivi, si kakadrwa ku natikiyanenga ku pwalane ka umawmase.

⁵ Ku Twaumase kialibake mitane, la paswalanga kelrete ku apangukaiyane ki Yesu Kirisitu ku adulrwaneta ka swakainga iniane, ku adulrwaneta kisilalake iniane! Kikai amani ku kiragaini ka kidremedremeini.

⁶ Tadrengedrengere kikai lrigu ka migemi ki Twaumase, asi lwiyane wamalra ki kilibakeini ka Lalake si vwavutha baai mitane!

⁷ Ngwakai ku tapacadhane ki Kirisitu, la malrata ku angilralraingane, la kipacepe kai pasalrivaneta, ki kikai yai twalai ki swaeteane ka migemi ki Twaumase.

⁸ Ku baaini mitane ku migemi swaete! Ku Twaumase arakai ku lrigilane

⁹ tulrepenge ku kidremedremeini, la pathingale mitane ka wakelretenga ka lri pangukai ki Kirisitu ku kaika athingalane ka matiasamaimali.

¹⁰ Lu kelanga ku takabeane ku Twaumase lri malra patuelre ki sasiakawlu belenge si sanaka nibekaacane kawmasane lri makitu ka Kirisituanenga, lai paatamatama iniane.

¹¹ Kai lepawngane si sanaka maneemane lri singikai ku kikake si takelretane ki Twaumase tulrepenge. Kai Twaumase singiakai ku natakidremedremaneini sakapathagilane, la pangukai ki Kirisitu si pilringa mitane tukawkawluini.

¹² Ku kidremedremeini lri malra mitane ka la aswala pikai ki Kirisitu ku sasiadradrama si drengedrengedrengere ku lrigu ki Twaumase makanaelre!

¹³ Kunumi laka miyaiya numi kikai: Sakilalranga numi ku patengane ka sabulrwane ku vaga, kamani sakilalra numi kwidra palribulu numiane ka hukuingi, masalrunga numi ki Kirisitu, ku Twaumase la malra kudra nipalrainganenga ka Siri si baai numiane, tusarakaiyane patuthingale ka swakai numi iniane.

¹⁴ Ku Siri kiaketekete pelaela mitane ka lri ucunguluta ku pukawnunga ki Twaumase. Ku Twaumase lri malra ku kiatulrepenge ku angilralraingane si baai ki umawmaseini. Lri drengedrengereta ku lriguini!

Inulri ki Pawru

¹⁵ Lakamani, twalai sa kilalraku numiane ka yakai ku salrwane ki Tamatama ka Yesu, si kilibakane numi ki lasinzia,

¹⁶ kainaku wareteretegenga pasikai numiane kiaseasene ki Twaumase. Lu inulriaku la matikaiyaku numiane,

¹⁷ si kitubi ki Twaumase ki Tamatamata ka Yesu Kirisitu, ka amani ku lrigu ka Tama ikai subelebelenge, ku abaadhane numiane ku Siri. Ku Siri lri baai numiane ku lrigilane, lai pelaela numiane si thingale ki Twaumase.

¹⁸ La kitubiaku ki Twaumase ku amuelebane ku maca ki kidremedreme numi, lanu thingale, ku dawlu numiane pamalra ku sidramane yai manemane, ku palraingingaini baai ki umawmaseini ku tacekecekelane yai makalra turamuru,

^19-20 Ku pikai mitane ka masalru iniane ku tapathingalane ku puku yai maadrau turamuru. Kikai puku mararaamau kudra puku ku pasiaelane twalai ki wapacai si papanianiake ki Kirisitu, ikai belenge la panene ki Kirisitu pikai ki vanaleini.

²¹ Ikai kwini, ku tarathudane ki Kirisitu walribate patuelre ki amani ku maerece ki ngwababelenge, si magagemegeme ku puku, ki mararathudu, si ngialisiane ka puku, walribate kikai ki asasane kai kawmasane si lubibilrili patuelre ku nagane.

²² Ku Twaumase la pamalebe ki kiacaebe belenge sanaka maneemane si pikai tailebeane ki drapale ki Kirisitu, la pakamani iniane ku Tamatama ki kiwkai, si rathudu patuelre.

²³ Kai kiwkai amani ku kinawmasane ki Kirisitu, ka pasueteini ka panianianiake ka kinawmasane kudra amani ka paswaete ki lepawngane ka Kirisitu.