Husia 9 - Ngudradreadrekadhane Ka Sisiu 魯凱語聖經

Ku Husia peaelaela ku lrika akipathavungane ki swa Iseraylri

¹ Swa Iseraylri, madha kapeapeaperau dralradralrai, madha ngialralrau ki maelane ku takisuswane ka sinzia kapeaperau tulrisisi ki lalrisi numi. Wabaebalrenga numi si katwase ki Tamatama, kaika patenganenga kwi kidremedreme numi papia iniane. Mia numi ki pairairange kiragai ngikakilangai baai ki Baale, wamalra numi ku taleke tusaarakaiyane ngikakilangai.

² Ai, kai lri tarathainu lai lri kawrame numi ku taleke si lawlau ka ulrive, lai lri mialri kai lri ikainga ku mathariri ka bava.

³ Ku swa Iseraylri kai lri dulrunga ikai ki patarumara ki Tamatama baai liniane ka kadaengane; kwi lalasu lri siwlri mu Izipiti, lri ikai ki cekele ki swa Asiria kane ku kaika mabula ka akaneane.

⁴ Kwi lalasu kai lri maka dulrunga arakai ku mathariri ka bava patarumara ki Tamatama, lai kai lri dulru papia iniane patarumara ku la sapatarumarane ka waudriwdripi. Ku kanekane lini, mia ki kanekane ki lamatiathalithi, lri pakakudrulru ki wakane. Ku akaneane lini sarakaiyane ngubaisane sikakathane, kai lri maka dulru iluku mwa ki daane ki Tamatama si tusarakaiyane patarumara.

⁵ Kwi lalasu lu ikai ki nikelretane ka tasukusukubane ki Tamatama ka lalrisi, lri dulru tumane?

⁶ Lu kela ku amatikurwane, kwi lalasu lri thuvugu mawbebere; ai ku swa Izipiti lri sarubu liniane, si dralreke liniane pikai Mimepise. Ku cekele lini, ka la tarubwane sekete ku lamakucingalre ka lawbubulu, lri cebenga suete ku cecenekane ka angatu si ubulu.

⁷ Ku apathavungane ka vai wakelanga! Ku akibilriane ka vai wakelanga! Kilakikai lu ngimianga, ku swa Iseraylri lri thingalenga. Amia numi kai, “Kikai yuginsia yai amamama; kikai kia ikai ki ri yai sinki.” Madrau turamuru kwi pasalrivane numi ala kamani ku pia numi kai kalisilisi nakwane.

⁸ Ku Twaumase pakaamaninga nakwane ka atalingikaiyane iniane kawriva, pakiapapawlringau nakwane ki kawkawluini ka swa Iseraylri. Ai, adravane mwaku inu, kwi lalasu kiadremedreme ku atulisiane nakwane, mia ki pwalra ki adhadhame. Ikai ki daane ki Twaumase, ku kipadradresenge ki yuginsia yai badha makanaelre.

⁹ Kilakikai umawmase maadrawnga turamuru ku pasalrivane, mia kunadruma kai lalasu sa ikai Gibia. Ku Twaumase lri tara pulringau ku pasalrivane lini, si pathavungu liniane.

Pasalrivane ki swa Iseraylri si tangimiane

¹⁰ Ku Tamatama amia kai, “Sa tau kipadradresengaku ki swa Iseraylri, mararaamau kudra ki yakai ubulane kidringai ku budu; satau kipadradresengaku ki cucungulane numi, mararaamau kudra ki yakai ki icizike ka angatu kidringai ku aswalalanga kalreme ka madru. Ai, kwi lalasu sa mwa ka lregelrege Biure, kiarimunga pathagili sukubu ki Baale, padaalru si akabalrithi mia ki kadalame lini ka latwaumase ku ngilisianane.

¹¹ Ku lrigu ki swa Iseraylri lri mia ki adhadhame ka matwase ngipalai. Ikai kai ki kadaengane, ku ababai kai lri maka tulalakenga, kai lri maka katawbaliringa, kai lri maka tarumaranga ku akatawbalirane.

¹² Kwini lalisu adravane tulalake, lri malraku ribici, ka kadrwa ku natangeeanga ku putedra. Lu cilriaku ki kawkawluli, kwi lalasu lri matisalregesege!”

¹³ Tamatama! Wadrelaku ki lalalake ki swa Iseraylri kiakurikurisi si kipwalralra kipapacai.

¹⁴ Lri tumanaku kitubi ku lrika apangimianesu kai ki laumawmase? Ku kaika atulalakane ki laababai lini! Ku kaika adulrwane pathuthu si lapu ki lalake lini!

Ku Tamatama pathavungu ki swa Iseraylri

¹⁵ Ku Tamatama amia kai, “Kai swa Iseraylri yakai Gilegale pathagili pia patuelre ku ngialisiane. Yakaiyaku kwini pathagili kalisi liniane. Ngwalai ku tapiane lini ku ngialisiane, lri pakatwasaku liniane kai ki kadaenganeli. Kainaku lri kadalamenga liniane, asi lwiyane ku latabebelenge lini makanaelre wabaebalrenga nakwane.

¹⁶ Kai swa Iseraylri mia ki balace ka marudame ku cebe ka angatu, kai maka pwamadru. Kwi lalasu kai lri ikai ku mwabaibalrithi, adravane ikai ku mwabaibalrithi, lri mialriaku tara papaacai ku kadalame lini ka lalalake.”

Ku tamatikaiyane ki yuginsia pangukai ki swa Iseraylri

¹⁷ Ku sukusukubuli ka Twaumase lri cilri ki kawkawluini, asi lwiyane kwi lalasu kai kialalra si pasalaladha; kwi lalasu lri ikai ki lakuni acaicaicali.