Husia 8 - Ngudradreadrekadhane Ka Sisiu 魯凱語聖經

Ku Tamatama maelaela ki swa Iseraylri ku tasukubane ki samiamiange

¹ Ku Tamatama amia kai, “Ngirapa pakipapawlringau! Ku badha mia ki takanga patumiamikace kela kikaruburu ki kadaenganeli.” Ku lakawkawluli wabalrenga ki takiketeketane nakwane, si kalrase ki sabulrwaneli.

² Kwi lalasu adravane tu Twaumase nakwane, si wathingale nakwane iya,

³ ai kwi lalasu wacilri ki mathariri. Ngwalai kikai, ku badha lri kurisi liniane.

⁴ Kwi kawkawluli ngiasasingikaai ku takidremedremane lini pilri ku latalialalai; lu pilri ki abebeelengenga ka tarasangililuku la mialri kai singikai ku tapalrainganeli. Kwi lalasu arakai ku kingi si gingi darepe tusamiamiange, ngidadawdawlu ku angikakamudane.

⁵ Mavalracevacaku ku sukusukubu ki Samaria ka nitulwangane ka kingi, kalrase liniane. Kwi lalasu lri pakela lwigane ala lri cilri ki samiamiange?

⁶ Ku taradarepe ki swa Iseraylri wadarepe tusamiamiange, ai kikai samiamiange kaika twaumase. Ku nitulwangane ka kingi ikai cekele Samaria lri kitatithiri.

⁷ Kwi lalasu ku paivai lini yai valrigi, ku kitaleke lini yai umuku. Ku kai mabea ka mugi kaidu maka twapange; adravane ka mabea, lu tupangenga, lri kikane ki maelane ka kuni.

⁸ Kai swa Iseraylri kadrwanga ku tamakakaelane ki lakuni, mia ki cwacuake ka kindralumu, ka kadrwa ku paluludane.

⁹ Kwi lalasu mia ki thelraelrale ka yaubulane ka ruba, ngiasasingikaai katwase ku kadalrananeini. Kwi lalasu wamwa kusange si aswa Asirianga, la pavangalre ki maelane ka kuni, kitubi ku lrika akipalakebane.

¹⁰ Ai lri sarubwaku si pataelre liniane, la pathavungu liniane. Ku talialalai ki swa Asiria lu drepedrepete liniane, kwi lalasu lri kwalri turamuru.

¹¹ Pakai ku angimamwalrane ku pasalrivane, ku swa Iseraylri twakaalra pia ku tapatarumaramarane; ai lu aru kakalra ku tapatarumaramarane, arwa driima kakalra ku pasalriu.

¹² Pasiakaiyaku liniane pacase ku makaalra ku sabulrwane, kwi lalasu ani ka maelaelane la iya si kalrase.

¹³ Kwi lalasu madalame papia nakwane patarumara ku waudriwdripi, si karau ku akaneane ku sangu patarumarane ka beate; ai kwaku ka Tamatama kainaku ka malrase kilakikai sikakathane, lri pulriingawlringa naku ku pasalrivane lini, si pathavungu liniane; lri pasiwlriaku liniane pwa ka Izipiti.

¹⁴ “Kai swa Iseraylri talukalrale ku tudaane lini ku daane ki talialalai, si karimurunga kudra wabekace ka Tamatama lini. Ku swa Yuda talukalrale ku tucekele lini ku makecenge ka nikepalane ka cekele. Ai lri pulebeaku ku apwi si lama ki ladaane ki talialalai si lanikepalane ka cekele.”