Husia 7 - Ngudradreadrekadhane Ka Sisiu 魯凱語聖經

¹ “Kai watelrai lu nau pangiradhekane ki Iseraylri, nau pawdringai ki kawkawluli lu iyaku, tara wadrelaku ku pasalrivane lini; kwi lalasu watavuvulrucu, kwaupa, yakai kadalranane ki cekele ravase;

² kwi lalasu kai pwalringau ala ka lri pulringavaku kikai la ngialisiane patuelre; kwi lalasu makalranga turamuru kwi pasalrivane lini kalri kibilringa, kwi nipasalrisalrivane mwataluvaivainga ikai cucubungu nakwane.”

Ku daane ki talialalai marivurivu

³ Ku Tamatama amia kai, “Ku laumawmase watavuvulrucu ki talialalai, wasekete kadraedrangelre ki latabebelenge;

⁴ kwi lalasu wabaebalre kaika patengane ku kidremedreme. Kwi lisiane ki lalasu mia ki apwi suete ki talabwane, ku taratupangepange mwakalavalava ku ausemakane ki milrikinku, la kai lremeana velevele kwini ki kwadaladalai kadrareareange ka apwi.

⁵ Lu ikai ku tatulrisisisiane ki talialalai, kwi lalasu arakai ku makecenge ka bava pakabusuku ki talialalai si latabebelenge, si sivavavangane liniane.

⁶ Ku ngialisiane ka madrekadrekadrekase lini mia ki apwi ka swaete ikai ki talabwane, wataleare tuebebelre, sa kaliare la kelrabe kudalai.

⁷ “Ikai ki girimucane, kwi lalasu lri papacai ki tamatama ki tarasangililuku. Ku talialalai lai lri kabibilrili kipapacai, lai lri kakadrua ku natangeeanga ku papia nakwane kitubi ku akiparalubane.”

Iseraylri si lakuni

⁸ Ku Tamatama amia kai, “Kai swa Iseraylri ngimiyaiya ki kaika nibalreane sa akame ka pange.

⁹ Kwi lalasu satalu ki la ngiathalringulu ka kuni, la kai thingathingale ala ka kiakanekaane ki satalutaluini. Kai ngiathathingathingale ala ka lri padalrunga si kela ku apacadhane lini.

¹⁰ Ku ngikalrilrigwane ki swa Iseraylri amani ku sapathingalane ku pasalrivane lini. Kilakikai ngiamianga, kwi lalasu laka thadaalraneana kai papiapia nakwane ka Tamatama, ka Twaumase lini.”

¹¹ Kai swa Iseraylri mia ki vaeva ka tavagu ka ngiapapapalai; kwi lalasu papia ki Izipiti kitubi ku akiparalubane, la papia ki Asiria kitubi ku akipalribulane.

¹² Lri ikaiyaku kadadalranane paipai ku lravathe, mia ki pwalralra ki adhadhame pwalra liniane. Asi lwiyane kwi lalasu paiyaiya ku ngialisiane, lri pathavungaku liniane.

¹³ “Matiangeange! Kwi lalasu kiapadradresenge ki amatikurwane! Asi lwiyane kwi lalasu wacilri nakwane. Kwi lalasu lri kiamudunga, asi lwiyane kwi lalasu wabaebalre nakwane. Kiasanu palribulaku liniane, kwi lalasu la arakaai ku kaika patengane sukubu nakwane.

¹⁴ Kwi lalasu kaika patengane ku kidremedreme papia nakwane kitubi, twalralrau ki la maelane ku takisuswane sikakathane, gwarapangane si tubitubi karalealeale; kwi lalasu ngiacacalricalrigi ngidadula, papia nakwane kitubi ku lataleke si mathariri ka bava. Kwi lalasu patengatengane ka lawabaebalre!

¹⁵ Amaniaku ka walapu liniane, ka pangiaesadhane liniane, ai kai lalasu madrekadrekaselringa ku ngialisiane si kiecebe nakwane.

¹⁶ Kwi lalasu matwase tupapalra kudra ki kadrwa ku puku ka latwaumase; kwi lalasu mia ki ngiapalrici ka bu ka kaika asudralrwalrwane. Ku latamatama ki tarasangililuku liniane lri pacai ikai ki tamakaruruburane, asi lwiyane kwi lalasu ngiapaparamuru lu kawriva. Kikai lrika sarakaiyanenga ki swa Izipiti ulralrakai.”