Husia 6 - Ngudradreadrekadhane Ka Sisiu 魯凱語聖經

Ku Iseraylri kaika patengane ku tangitatupelane

¹ Kai swa Iseraylri amia kai, “Bwala, tapapia ki Tamatama! Ku Tamatama wathiriacenga mitane, lri mialri sulrau si pawdringai mitane; walrumai si pakadula mitane, lai lri mialri cabu mitane.

² Lu makapusalenga makatulrulunga, kwi lasu lri patarumara mitane ku bavane ka puku, lai lri dulruta mwamwamua sukubu iniane.

³ Ala takisamula kisilape si thingale ki Tamatama. Lri tara keela, mia ki ledra ki mialrealre kalri tara utaluvaivai, mia ki udale ki kalarigarigane alreke ki kadaengane.”

⁴ Ku Tamatama amia kai, “Swa Iseraylri, swa Yuda, lri tungitwatumanaku numiane? Kwi sakialialibake numi nakwane mia ki kulrulrungu luka mialrealre, ka makakaai kawlrau; mia ki lamu, sana kaliare maulrau.”

⁵ Ngwalai kikai, siakawlaku ki layuginsiali pamwa numiane kwini, si pelaela ku lrika asaibanganeli numiane, amudaneli numiane.

⁶ Ku kitubili numiane yai, mapapedrenge ka sakialibake, kaika lasapatarumarane ka lwange si kiu; ani thingale nakwane amiaku numiane, inaku ki Lama ka lrisi.

⁷ Ai kikai laumawmase yakai ki cekele Adame baebalre ku tamakaketeketane nakwane.

⁸ Kai Gileade yai swaete ku ngilisianane ka cekele, wamwa kidruanga patueraerai.

⁹ Kai labarakalai mia ki lasadre, turededele lepenge, karededele ravase, adravane ka samamwa Sekeme kadalranane yakaai, pakai ku amalrane ku paisu la papacai ki umawmase.

¹⁰ Yakaiyaku Iseraylri drele ku ngialisiane turamuru: Ku kawkawluli yakai kwini sukusukubu ki lasamiamiange, si ngikakudrulrunga.

¹¹ “Ala kunumi ka laswa Yuda, mialri wakelretenga naku ku vai ku lrika apathavunganeli numiane.”