Husia 5 - Ngudradreadrekadhane Ka Sisiu 魯凱語聖經

¹ “Labarakalai, kunumi kicacaligira kilalalra! Swa Iseraylri, kunumi dradrela! Wacekecekele ki talialalai, kunumi mialria kilalalra! Kunumi nai arakai numi ku aparamaramavane saibange ki umawmase, kaiasasane ngiabaalrelringa kalri kisaibange; asi lwiyane amaninga numi kudra nipikaiyane ka Mizepa ka tukulru, ka nipaipadhane ka lravathe ikai ka lregelrege Tabure,

² ka nilrukwane ikai Asasia ka lrubange. Lri tara pathavungaku numiane!

³ Wathingalaku ki swa Iseraylri; kwi lalasu kai lri maka sekete nakwane. Kwi lalasu kaika patengatengane ku kidremedreme nakwane, kai swadalepe sukubu nakwane.”

Ku Husia pakiapapawlringau ki wasukubu ki samiamiange

⁴ Ku ngangane ki swa Iseraylri watelenge ku lrika apapiane lini ki Twaumase. Kwi lalasu ngwalai ku tasukubane lini ki samiamiange, la kai thingale ki Tamatama.

⁵ Ku ngikalrilrigwane ki swa Iseraylri amani ku sapelaelane ka pasalrivane lini. Kwi pasalrivane lini patwabakebake liniane; ku swa Yuda la mialri tupapalra liniane tubakebake.

⁶ Kwi lalasu papia ki Tamatama patarumara ku lalwange si kiu; kikai papia liniane kadrwa ku paluludane. Kwi lalasu kai maka kiadringai ki Tamatama, asi lwiyane ku Tamatama wacilringa liniane.

⁷ Kwi lalasu papia ki Tamatama kaika patengatengane ku kidremedreme; ku tulalake lini la nikibubuliane. Lakamani, ku kadaengane lini takauawngane lri kidredredre.

Tamakakaruburane ki swa Yuda si swa Iseraylri

⁸ Kunumi ikaiya Gibia ngirapa! Ikaiya Rama pasairingi! Ikaiya Bithele karaleale! Swa Biniyamingi, ngidrakala si kikaruburu!

⁹ Ku apathavungane ka vai wakelanga; ku cekele ki swa Iseraylri lri kamudunga. Swa Iseraylri, kikai lri tara ngimiya!

¹⁰ Ku Tamatama amia kai, “Lri papiaku ki tarasangililuku ki swa Yuda kalisi, mia ki acilai ka walriau pathavungu liniane, asi lwiyane kwi lalasu wadrikisi ku kadaengane ki swa Iseraylri.

¹¹ Ku swa Iseraylri lri kidredrepete, pakiamalra ku patarumarali ku kadaengane, asi lwiyane, amani sa kai telrai papia ki kadrwa ku puku ka lapasiagiagisi ka kuni kitubi ku akiparalubane.

¹² Lakamani, lri kabebetethaku ki swa Iseraylri, lai lri amudaku ki swa Yuda.

¹³ “Ku swa Iseraylri sa thingale ku caemaneini matelrege turamuru ku kidremedreme, ku swa Yuda wadrele ku dulaini ka kiapakilringau turamuru, ku swa Iseraylri matwase kikawriva ki talialalai ki swa Asiria, si kitubi iniane ku akiparalubane; ai kwi lasu kai lri maka dulru sulrau liniane, lai lri kai dulru cabu ki dula lini.

¹⁴ Lri miaku ki raiyungu lredepe ki swa Iseraylri, mia ki yacengecenge ka raiyungu lredepe ki swa Yuda. Lri ngikakamaniaku ka wathiriace liniane, si malra saralidri liniane, kadrwa ku umawmase kulri dulru palribulu liniane.

¹⁵ “Lri cilriaku ki kawkawluli, pakela ku akisalruane lini kwalri, si ngithathingale ku tapasalrivane lini. Ikai ki sakwalrialri, kwi lalasu lri silape nakwane.”