Husia 4 - Ngudradreadrekadhane Ka Sisiu 魯凱語聖經

Ku Tamatama wakukusu ki swa Iseraylri

¹ Swa Iseraylri! Kunumi kiraraketa kilalalra ki Tamatama ku takukusuane kai ki yakaikai ki laumawmase. Ku Twaumase amia kai, “Kikai kadaengane kadrwa ku salrwane la kaika patengatengane ku kidremedreme, kai paswadalepe nakwane ka Twaumase.

² Kwi lalasu wabaebalre ki samakaketeketane, watavuvulrucu, papacai, kwaupa, manganga ki sawvalai; kwi lalasu kai watelrai pasalriu, thathathanga ku ngwakai ki erai ku tapasalrivane.

³ Lakamani, kikai kadaengane lri kameale; kai yakai kikai kai laumawmase lri pacai kiara kadhamane. Patuelre ku langiapalapalai walrawlrakwane ka waudriwdripi, adravane ka lakange ka yakai ki acilai lri kamudu patuelre.”

Ku Tamatama wakukusu ki labarakalai

⁴ Ku Tamatama amia kai, “Labarakalai, kunumi madha kukusu ki laumawmase, la madha kaelaela liniane, asi lwiyane ku akukusuaneli amani numi.

⁵ Luka vaiyane lukamaungu wacapange numi papungupungu iya, ku layuginsia la mialri capange papungupungu iya. Lri amudaku ki cekele numi ka swa Iseraylri.

⁶ Mamudu kai kawkawluli, asi lwiyane kai lalasu kai paswadalepe nakwane. Kunumi ka labarakalai kai numi paswadalepe nakwane, la kalrase numi kai sabulrwaneli. Lakamani lri kalrasaku numiane, lai lri kainaku lri paabarakalai ki lagagane numi.

⁷ “Kunumi ka labarakalai, lu aru takalra numi arwa kagarange numi pasalriu nakwane, ngwalai kikai ku lrigu numi lri akabalrithi ka akiarubwanane.

⁸ Ku kawkawluli pasalriu, walaapulringa numi pakabitulru, lakamani kunumi la aru papasalriu numi liniane.

⁹ Kunumi lri tara tupalra numi si mararamau ki laumawmase kipathavungu; lri singikaiyaku ki tangivelevelane lini si bilri liniane.

¹⁰ Lri kane numi ku kitu drulru numi ku nipatarumarane, si kai kabucuku; lri sukubu numi kudra tara paedhaedhale ka latwaumase, ai kai numi lri maka tulalake; asi lwiyane wacilri numi si katwase nakwane, la katwase tupapalra ki drumane ka latwaumase.”

Ku Tamatama maelaela ki pasalrivane ki wasukubu ki samiamiange

¹¹ Ku Tamatama amia kai, “Ku bavane ka bava si maulainga ka bava wamalra pamama si kai pulringalringalringaunga kai kawkawluli.

¹² Kwi lalasu papia ki angatu kitubi ku akipadrelane, kialalra pasalaladha ku tadrukangane ki nicegecegane ka angatu. Kwi lalasu wacilri nakwane, mia ki pairairange ka matwase mupadruku, katwase tupapalra kudra ki latwaumase.

¹³ Kwi lalasu yakai belenge ki lregelrege patarumaramara, yakai belenge ki lregelrege ki tailebe ki madrau ka angatu lama ku sangwalreme, asi lwiyane kwi lalasu lu kidremedreme mathariri ikai tailebe ki laangatu ka lrilriane amia. “Ngwalai kikai, kwi labaibai ka lalalake numi lri apairairange; kwi lakiathareve numiane lai lri sudringai ki umawmase.

¹⁴ Ai, kainaku lri ngwalai kikai si pathavungu liniane, asi lwiyane kunumi mialri numi pasalrisalriu ki yakai ki biu ka lapairairange, si taelre liniane patarumaramara ki Baale. Mia kudra nimaiyaiyaiyane ka vaga ku amia kai, ‘Ku kadrwa ku thingale ka umawmase lri tara turaamuru si mukadrulu.’

¹⁵ “Adravane baebalre numi nakwane ka laswa Iseraylri, anatumane ku swa Yuda la kai pasalriu ku thadalrane. Kunumi madha mudradhadradha mwa ka Gilegale ka Bithele drihai, madha ikaikai kikwini si papia ki saniange ka naganeli ka palralrawthu panianiake ka Tamatama kiketekete.

¹⁶ Kai swa Iseraylri mararaamau ki tina ka lwange ku kecengane, lri tumanaku lapu liniane, mia ki yakaai ki tapagwagwagwane agwagu ki lakiu?

^17-18 Kai swa Iseraylri kia pakathalrebethebenga ki lasamiamiange, si karedededelenga ki mabubusuku. Kwi lalasu pacungucungulu ikai ki apasalrivane ki sawvalai ki ababai panianiake, madalame kiarubwane, la kalrase kilrigu.

¹⁹ Kwi lalasu lri kipwalra si kiiluku ki valrigi ki ngangane ki sawvalai si ababai, mia ki kiailuku ki alrilrawgu; kwi lalasu lri ngwalai ku tapapiane kwidra ki latwaumase patarumara si kiarubwane.