Husia 14 - Ngudradreadrekadhane Ka Sisiu 魯凱語聖經

Ku Husia akwadrau kitubi ki swa Iseraylri ku asiwlriwlriane mwa ki Tamatama

¹ Swa Iseraylri, patwabakebakenga numiane kwi pasalrivane numi; kunumi siwlriwlria papia ki Tamatama ka Twaumase numi.

² Lri siwlri numi mwa kai ki Tamatama, si papia iniane inulri iya kai, “Pacepa kai tapasalrivane nai patuelre, si kilalra kai inulri nai, la nai dulru singikai ku takiketeketane drengedrengere muswane.

³ Ku swa Asiria kai lri dulru palribulu mitane; ku tarakikaruburu ka rigi lai lri kai maka palakebe mitane. Kaita lri iyanga kai ki lasamiamiange, ‘Twaumasesu naiane’. Tamatama, wathingale nai, papiasu ki kadrwa ku tasatalwane ka pakulrulrulu kilibake.”

Ku Tamatama pwakawnu ki swa Iseraylri ku bavane ka niake

⁴ Ku Tamatama amia kai, “Lri sulravaku ku dula ki kawkawluli, si tuvaevanga kilibake liniane; kainaku lri papianga liniane kalisi.

⁵ Amaniaku ku udale ki meameale ki kadaengane ki swa Iseraylri. Kwi lalasu lri mia ki bariangalai ngipaipai, mia ki madrau ka angatu Lebanungu mwadringi balace.

⁶ Kwi lalasu lri rigarigi ku bavane, lri mia ki laangatu ka ulrive ku tharirane; kwi lalasu lri pasarau ku sangulremane, mia ki cedare ka angatu kavai Lebanungu.

⁷ Kwi lalasu lri pela kipalakebe nakwane. Kwi lalasu lri mia ki labengelrai ngiesadhane ikai ki babengelradhane, mia ki tapumadrumadruane ka babudubudu. Kwi lalasu lri mia ki nimatikaikaiyane ku limemane ka bava ki Lebanungu.

⁸ Ku swa Iseraylri lri makakisaalrunga ki lasamiamiange; lri kilalraku ku lainulri lini, si sirapale liniane. Lri miaku ki takasaleseane ka segi ka angatu palrilri liniane; amaniaku ku tatwaladhane sanaka akaesadhane lini patuelre.”

Satulrepengane ka vaga

⁹ Ku ngiathingale kalrigili ka umawmase anithingale makanaelre kai tapacasane kai ki hungu; lani pikai ki kidremedreme lini. Ku kadalranane ki Tamatama madringelrese; ku madringelrese ka umawmase paluludu kai ki kadalranane, ku pasalrisalriu ka umawmase la ngwalai ku tatudrekasane kai ki kadalranane si tubakebake.