Husia 13 - Ngudradreadrekadhane Ka Sisiu 魯凱語聖經

Bibiilrilinga ku takisaibangane ki swa Iseraylri

¹ Ku siaswalane, ku zuku ka Iparaime sa kawrivariva, ku drumane ka lazuku makiwcu makanaelre; kwi lalasu mwasakene tukucingalre ki Iparaime. Ai ku Iparaime wasukubu ki Baale, pasalriwnga, lakamani lri tara kamudu.

² Kwi lalasu pacungucungulu pasalriu, singiakai ki takidremedremane lini si tasialrimane lini, arakai ku gingi tusamiamiange, ala kirimu iya kai, “Papia liniane patarumara!” Kwi lalasu kiarimu uma kwini ki lanitulwangane!

³ Lakamani, kilakikai umawmase lri mia ki ememe si lamu luka mialrealre, sana lrau ku vai lri kawlrau. Kwi lalasu lri mia ki lrapi ki mugi twalai ki tavelavelatane kipalai, mia ki twalai ki intuce ngibwale ka ebelre, sana kivalrigi wasarau si kawlrau.

⁴ Ku Tamatama amia kai, “Tamatamaku, ka amani ku waililuku numiane katwase ka Izipiti ka Twaumase. Kathanaku, kadrwa ku drumane ku Twaumase numi; kathanaku ka Takipalribulribulane numi.

⁵ Ikai ki meameale ka calragulragu, ngiakakamaniaku sirapale numiane;

⁶ ai sa mwa numi kai ki malrange ka kadaengane, ngwalai ku takakalrane ku laimai makakelrekelrete ku akaneane si ngilralrigu. La karimurunga numi nakwane.

⁷ Lakamani, lri miaku ki raiyungu lredepe numiane, mia ki lrikulau isigingane ki kadalranane lepenge ukalava numiane.

⁸ Lri miaku ki sakawlrau ku lalake ka cumai lredepe numiane, si lalita numiane. Lri miaku ki garagarange ka raiyungu makakaai thangapulu numiane, mia ki waudriwdripi baburau numiane.”

⁹ Swa Iseraylri, lri amudaku numiane! Aneane ku lri dulru palribulu numiane?

¹⁰ Napapianga numi nakwane kitubi ku talialalai si latabebelenge, ai kwi lalasu palribulunga numiane?

¹¹ Yakaiyaku ki lisiane baai numiane ku latalialalai, la mialri ikai ki girimucane mwalra liniane.

¹² “Ku pasalrivane si tapasalrivane ki swa Iseraylri la nipacasanenga, si ka nipudringadhanenga patuelre.

¹³ Kai swa Iseraylri yakaiyana kwi tikiane kwi aukaiyane si panianiake, ai kwi lalasu kadrwa ku thingale, la kai kirimu twadrau kwini naika apanianiakane lini. Kwi lalasu mia ki amani kudra lri kitulalakenga ku yabarangane ka lrulai, la kavalringivingiana ikai ki barange ki tina, si kai mubangalre katwase.

¹⁴ Kainaku lri palribulu ki swa Iseraylri patwalai ka swadriadringi; kainaku lri patwalai ki puku ki apacadhane pulatadre liniane. Apacadhane, sabula kwi la apamatikurwanesu! Swadriadringi, putaluvaivadha kwi amudanesu! Kainaku lri kakurunga kai ki laumawmase.

¹⁵ Adravane ka ngimiyaiya ki laubulu ka ngiaesadhane ikai ubulane kai Iseraylri, lri dawlaku ki culwane ka valrigi talrawane patwalai calragulragu valrigi, si valrigi meale ki tacebeane ki acilai si acilai ki dralremedreme; lri ravasaku patuelre ku tacekecekelane lini.

¹⁶ Kai Samaria lri ngwalai ku tabaebalreane nakwane si kipathavungu. Kwi swakai kwini ku laumawmase lri ngwalai ki tamakakaruburane si pacai; ku lalrulai lri kiverevere pikai cakena; ku tawbaliri lai lri mialri kibuci ku barange.”