Husia 12 - Ngudradreadrekadhane Ka Sisiu 魯凱語聖經

¹ Ku kakwakudhane ki swa Iseraylri patuelre yai pasasarau ka kadrwa ku tapatwaladhane si pakaririvu; ikai liniane, ku watavuvulrucu, malrumalrumai arwa kakalrakaalra. Kwi lalasu makaketekete ki swa Asiria, la malra ku lawlau si mwa baai ki swa Izipiti.

² Ku Tamatama wakukusu ki swa Yuda; kwi lasu lri mialri singikai ku tapiane ki swa Iseraylri bilri liniane, pathavungu liniane.

³ Ku cucungulane lini ka Yakubu sa ibaranganeana, pathagilinga mararibiribici ki takaini ka Esau, sakadrawnga la kidrikisi ki Twaumase.

⁴ Sa maulucu ki sasiakawlu belenge akaci, la tubi kitubi ki sasiakawlu belenge ku asubulrubulrwane iniane. Ku Twaumase yakai Bithele kidringai ki cucungulane ka Yakubu, si papia iniane kawriva.

⁵ Kikai amani kudra abebeelengenga ki sanaka kwapingi ka Twaumase; kwi lasu lri kipasi Tamatama.

⁶ Lakamani, lamwabaibalrithi ki Yakubu, kunumi satalwa ki Twaumase, si papia iniane; pangimia kudra kai akabalribalrithi ka sakialibake, si putaluvaivai ku dringelresane, laka tapapiana sidrama ki Twaumase numi.

Pacungulu matikai ki wasaibange

⁷ Ku Tamatama amia kai, “Ku swa Iseraylri mia ki Kanange kai tukapatengatengane; kwi lalasu twalrawnga arakai ku taidrusane ku tintingi tavuvuvulrucu ki wakela langai.

⁸ Kwi lalasu amia kai, ‘Yakai kai paisu nai, satacekecekelanenga nai; kadrwa ku umawmase ku wathuru kukusu ku tasatacekecekelane nai.’

⁹ Tamatamaku, ka amani kudra waililuku numiane katwase ka Izipiti ka Twaumase. Lri patupeelanga naku numiane paikai ki balrawbau, mararamau sakapathagilane ikai calragulragu.

¹⁰ “Papiaku ki layuginsia kawriva, ku lrika adrelane lini ku makalra ku maburusi, la pangukaiyaku liniane pakipapawlringau ki kawkawluli.

¹¹ Ai ka Gileade thadalraneana suete ku pasalrivane si samiamiange; kwidra lawasukusukubu ki samiamiange ka umawmase lri pacai makanaelre. Kwi lalasu yakai Gilegale papiapia ki nitulwangane patarumara; ku tapatarumaramarane lini lrika rinubwanenga ku lrenege ikai ubulane.”

¹² Ku cucungulane ka Yakubu mwabere mwa ka Mesuputamia; ngwalai ku asataelrelreanane, kwi lasu yakai kwini pagwagu ku kiu ki palrapalra.

¹³ Ku Tamatama siakawlu ku tangeea ku yuginsia mwa ka Izipiti, si palribulu kainganai kwini ki lakia tuduri ka swa Iseraylri, si arakai ki yuginsia sirapale liniane.

¹⁴ Ai ku swa Iseraylri pakagirimucu ki Twaumase; ku kiame ki pasalrivane lini lri mwa ki kinawmasane lini. Kwi lalasu twadrekase ki Tamatama, lakamani lri pakilringau pathavungu liniane.