Husia 11 - Ngudradreadrekadhane Ka Sisiu 魯凱語聖經

Ku Twaumase makalithi ki wabaebalre ka laumawmase

¹ Ku Tamatama amia kai, “Kai Iseraylri saka vavaalakeana, madalamenga naaku iniane; sialalakaku iniane, la patwalai Izipiti ililuku kainganai.

² Ai, lu aru dawlaku iniane, kwi lasu arwa baebalre si katwase nakwane. Kai lakawkawluli papia ki la Baale patarumara; kai lalasu papia ki lasamiamiange lama ku sangwalreme.

³ Ai, ku wabulru dadavace ki Iseraylri kainaku ka amani? Arika drwadrusaku ibibi iniane, ai kai lalasu la kai pulringau ku talapwaneli liniane.

⁴ Arakaiyaku ku sakialibake ka calrisi ililuku liniane. Waibibaku liniane, si pakakeela ki cimili; la lukwanaku, si pakane liniane.

⁵ “Ngwalai ku kaika tamubangalrane papia nakwane ki Iseraylri, kwi lalasu lri tara siwlri mu Izipiti; ku swa Asiria lri rathudu liniane.

⁶ Ku apwi ki tamakakaruburane lri salraelre ki lacekele lini, si kabebetethe ki lalrawlrawdru ki cekele lini, lri amudaku ki kawkawluli; asi lwiyane kwi lalasu la ngiakalrilrigilane.

⁷ Kai lakawkawluli nau baebalrelringa amia nakwane. Kwi lalasu lri ngwalai ki yakai ki lre lini ka tikungu si tubi tungawngau, ai kadrwa ku umawmase ku lri dulru mwalra liniane.

⁸ “Swa Iseraylri, lri tumanaku dulru cilri numiane? Lri tumanaku sarare numiane? Lri dulrwaku mia ku taamudaneli ki Adema kabebetethe numiane? Lri dulrwaku mia sa kiecebaku ki Zebuime si tungimiyaiya numiane? Kainaku walreme tungimiyaiya kikai, asi lwiyane madalamaku numiane!

⁹ Kainaku lri ikai ki girimucane si pathavungu numiane; kainaku lri pelanga amudu ki swa Iseraylri. Asi lwiyane Twaumasaku, ka kaika kawmasane ka umawmase. Yakaikaiyaku numiane ka saniange; kainaku lri ikai ki girimucane saibange numiane.

¹⁰ “Lri ngimiaku ki raiyungu papia ki labadha ki swa Iseraylri giringi, kai kawkawluli lai lri tupapalra nakwane. Kwi lalasu lri twalai tali sapakalriwgu karidare siwlri mwa nakwane.

¹¹ Kwi lalasu lri ngimia ki adhadhame, kirarimu twalai Izipiti ngipalai kainganai, lai lri ngimia ki tavagu, twalai ka Asiria ngipalai kainganai. Lri pela naku ililuku ki kawkawluli siwlri mwa ki cekele lini. Tamatamaku; ka amia kai pelaela.”

Kiakaelaela kai swa Iseraylri si swa Yuda

¹² Ku Tamatama amia kai, “Kai swa Iseraylri arakai ku draedrangelrane ka vaga thalringulu nakwane; kai swa Yuda thadaalraneana baebalre nakwane, baebalre ki twakapatengatengane, ka sanianiangenga ka Twaumase; amiaku kikai pelaela.”