Hiburu 9 - Ngudradreadrekadhane Ka Sisiu 魯凱語聖經

Drihai ki yakawmasane si yabelenge

¹ Ku aswalaalanga ku sakiketeketane yakai ku tapiapiane ka kakudhane ki drihai si bekace ki umawmase ka taikaikaiyane drihai.

² Kudra nipiane tulrepenge ka Alrivilrivi ka balrawbau, ku talilatadre sia Alrivilrivi ka taikaikaiyane, ikai adringi yakai ku tatinakiane, yakai ku cukui, si sapatarumaramarane ka pange.

³ Ikai lrilrikudru ki mwasaka sipusale ka make ki Alrivilrivi ka balrawbau sia Alrivilriviilrivinga ka taikaikaiyane,

⁴ ikai adringi yakai ku saarakaikaiyane lama ki sangwalreme ka niara kingiane ka tapatarumaramarane, si niara kingiane cabu patuelre ka Langiane, ikai adringi ki lailangiane piakai ku tapikaiyane ku mana, la ikaiyana kudra nawarigarigi ka ukudru ki Arungu si drusa ka lrenege ka pinacasane ku Taimangealane ka padradrekase.

⁵ Ibelenge ki Langiane yakai ku Kirubime, sapatuthingalane ka yakai ku Twaumase, ku sapakepake ki Kirubime wakabungu ki taetalane ki sapacepane ki pasalrivane. Pangukai ki miyaiya kai kaiasasane kaika adulrwane nguvavaeva pelaela.

⁶ Kikai lalawbubulu miyaiya kai ku takelretane. Ku labarakalai lukakaiya wamwa latadre kwini ki Alrivilrivi ka balrawbau drihai,

⁷ kathane ku abebeelengenga ki barakalai ka mwa daane kwini ki sadadaane ki balrawbau ka daane, ai ngwa sivavaale ki caicaili, sana mwa ngusivale tara wailuku ku erai mudaane, si patarumara ki Twaumase ka ngiapapasikai si pasiakai ki laumawmase kudra kaika thingale lini si pasalriu.

⁸ Ku Siri ngwakai kikai ki nikelretane si pelaela, sana ikaiyana kudra ki salalatadre ki Alrivilrivi ka balrawbau ka daane, kudra papia ki Alrivilriviilrivinga ka taikaikaiyane kai mwaelebe.

⁹ Kwini tali latadre ki Alrivilrivi ka balrawbau ka daane sapatuthingalane ka amaninga kikai asasane. Ka amia kikai ku nipatarumarane ki Twaumase ku saceacebe si lamanemane patuelre kai lri maka dulru pakitulrepenge ki kidremedreme ki wasukubu.

¹⁰ Kilakikai papia ki akaneane si makaelaela ka tapiapiane pakabula, ka ngwababebelenge ka nikelretane ka kakudhane, kudra pacugane lini pakeakela ki apakabalrithane ki Twaumase patuelre.

¹¹ Ai ku Kirisitu wakelanga, amaninga ku abebeelengenga ki barakalai, pangiamianga kudra mathariri ka awngane. Kudra Alrivilrivi ka balrawbauini madraadrau, ka kiatulrepenge, kaika alrima ki umawmase ka twadaane; kikai amia kai, kaika swakai kai ki binekacane kawmasane.

¹² Sa ngukakai ki Alrivilrivi ka balrawbau ku Kirisitu, kingivavaale mudaane mwa ki Alrivilriviilrivinga ka taikaikaiyane, kai arakai ku erai ki kiu si erai ki lrulai ka lwange, arakai ku eraini pasikai mitane malra ku palralrawthu ka sapalribulane.

¹³ Alaiyasi malra ku erai ki kiu si erai ki sawvalai ka lwange, si nilamanenga ka abu ki tina ka lwange, la pikai ki lrisi sabulu ki kinawmasane ki kaika mabula ka umawmase, la dulru mwalra ku kudrulru lini, si bula liniane,

¹⁴ kudra naika apangimiane ku erai ki Kirisitu nai kaika makaakalra? Ngukai kudra palralrawthu ka Ri, ngiamamalra ku takitulrepenganeini ka sapatarumarane si patarumara ki Twaumase. Ku eraini lri bula ki kidremedremeta, si mwalra ku ngialisiane ki kakwakudhaneta, la lri dulruta pasikai ki palralrawthu ka Twaumase.

¹⁵ Lakamani, ku Kirisitu amani ku kadawdalrwane kai ki bavane ka sakiketeketane, pakai ku adulrwane tarumara kudra pinalrainganenga ka palralrawthu ka akaesadhane kudra ki dawlu ki Twaumase ku umawmase. Kudra ngimia kikai ngwakai ki wapacai, kikai tapacadhane pwalatadrenga liniane patwalai ki pasalrivane lini ikai ki aswalaala ki sakiketeketane.

¹⁶ Sana ka niaulriwlriane lri tara pelaela ka wapacainga kudra amani ku waulriwlri,

¹⁷ asi lwiyane ku amani ka waulriwlri lu panianianiakeana, ku niaulriwlriane kadrwa ku luludane, lu pacainga kwi lasu, ku awlriwlrini yakai ku paluludane.

¹⁸ Lakamani, kudra aswalaalanga ku sakiketeketane arakai ku erai ala ngimia.

¹⁹ Sakapathagilane, ku Musi singiakai ki hulrice paswala pelaela ki laumawmase ku padradrekase patuelre, ala malra ku erai ki lrulai ka lwange si erai ki kiu, la paibu ku acilai, si pwa ki duduli ka ubawbalane ka makalrilau si buraburu, la paralikiliki pikai ki hulrice ka hungu si kinawmasane ki laumawmase makanaelre.

²⁰ Kai lasu amia kai, “Kikai erai sapelaelane ka drekase ki Twaumase ka apaluludane numi ka sakiketeketane.”

²¹ Laka thadaalrane, ku Musi mialri paralikiliki ku erai pikai ki Alrivilrivi ka balrawbau si saarakaikaiyane ka makaelaela ka takaiyane ka sarakaikaiyane tulrisi.

²² Singikai ki hulrice, sanaka takaiyane patuelre niarakaiyane ku erai bula, lu kai tueraerai, kadrwa ku apacepane ki pasalrivane.

Ku tangicacilriane ki Kirisitu wabula ki pasalrivane

²³ Kilakikai nipatwalravane ku tangimiane belenge si darepe ka talawbubulane, lri tara arakai kikai tapiapiane pakabula; ai, ku lawbubulu belenge lri tara arakai ku mathaithariri ku sapatarumarane si bula.

²⁴ Ku Kirisitu kai mwa daane ku tudaane ki umawmase ku Alrivilrivi ka taikaikaiyane, kikai alalingu sikakathane ki patengane ka Alrivilrivi ka taikaikaiyane. Mwa daane ka subelebelenge, atalingikaiyane mitane acegecege icucubungu ki Twaumase.

²⁵ Ku abebeelengenga ki barakalai ki swa Yuda luka caili wailuku ku erai ki waudriwdripi si mudaane ki Alrivilriviilrivinga ka taikaikaiyane. Ai, ku Kirisitu kailri kingikalrale ngipapatarumara,

²⁶ anaka miyaiya kwini, twalai satau bekace kawmasane, nai kingikalrale kipakwalri. Ku Kirisitu kingivavaale patarumara si la kalrepenge, ikai kikai ki apalikaiyanenga kawmasane, ngiatatu sapatarumarane ka waudriwdripi si patarumara, bula ki pasalrivane.

²⁷ Lu kelanga ku vai, sanaka umawmase tara yakai ku apacadhane, lu pacainga lai tara kisaibange ki Twaumase.

²⁸ Laka thadaalrane, ku Kirisitu kingivavaale patarumara, si mwalra ku pasalrivane ki takaalra ki umawmase. Lu pelanga utaluvaivai, kailri kiecebenga ki pasalrivane, lu kela lri palribulu ki mwakalavalava iniane ka umawmase.