Hiburu 8 - Ngudradreadrekadhane Ka Sisiu 魯凱語聖經

Abebeelengenga ki barakalaita ka Yesu

¹ Ku tangadrane ku mapelaelaelata miyaiya kai: Yakai ku miyaiya kai ku tangea ka abebeelengenga ki barakalai; kai lasu wanene ikai ki vanale ki yakai belenge ka sapupukwanenga.

² La ikai ki Alrivilriviilrivinga ka taikaikaiyane kipuawngane ka abebeelengenga ki barakalai, kikai Alrivilrivi ka taikaikaiyane kaika tudaane ki umawmase, paacegecege ki Tamatama ka patengane ka Alrivilrivi ka balrawbau.

³ Sanaka abebeelengenga ki barakalai kiapasudalepe ku lrika apatarumarane ku saceacebe si lasapatarumarane ki Twaumase, la kamani kai abebeelengenga ka barakalaita mialri ikai ku apatarumaraneini.

⁴ Alaiyasi ka yakai kawmasane, kai maka dulru abarakalai, asi lwiyane yakainga ku nisingikaiyane ki hulrice ki swa Yuda ku lri patarumara ka barakalai.

⁵ Kikai piapia ki barakalai alalingunga ki Alrivilrivi ka balrawbau ka belenge. Mararamau ki Musi sa lri tudaane ku balrawbau, ku Twaumase amia kai iniane, “Ku atudananesu lri pangialrausu ku takipelaelanesu ikai lregelrege.”

⁶ Ai kaiasasane, ku tarumara ki Yesu ku awngane ki barakalai silrialribate liniane, mia ku taikaiyaneini kabicelrakane ki Twaumase si umawmase ka amani ku kadawdalrwane kudra sakiketeketane ka mathaithariri, asi lwiyane kikai sakiketeketane patwalai kudra mathaithariri ka nipalrainganenga si paacegecege.

⁷ Alaiyasi kakadrwa ku tangilisianane kudra aswalaalanga ku sakiketeketane, naikai ikainga ku sakadrusa ku sakiketeketane.

⁸ Ai ku Twaumase papia ki kawkawluini kaelaela, iya kai: Ku Tamatama amia kai: Ku vai lri kelanga, kwaku si lakawkawluli ka swa Iseraylri si kawkawluli ka swa Yuda, lri makaketekete nai ku bavane ka samakaketeketane.

⁹ Kikai samakaketeketane kai ngiamia kunadruma ku samakaketeketaneli ki cucungulane numi; ikai kudra ki vai kwini waalraku bilibili ku alrima lini, si sangiluku liniane pakidaili Izipiti. Ai kai paluludu ku tamakaketeketane nai. Lakamani ku Tamatama amia kai: Mialriaku kai thethengete liniane.

¹⁰ Ku Tamatama la iya kai: Lubibilrili, lri kiketeketaku ku miyaiya kai ki swa Iseraylri: Lri pikaiyaku ki lusu lini ku hulriceli, si pacase pikai ki kidremedreme lini. Lrika Twaumasaku liniane; kwi lalasu lai lri akawkawlunga nakwane.

¹¹ Kailri bulrunga ki sakacekele, kailri pelaela ki laretesane iya kai: Kunumi thingala ki Tamatama; asi lwiyane twalai ki titikiyanenga pakela ki madraadrawnga wathingale nakwane makanaelre.

¹² Lri pacepaku ku tapasalrivane lini, kai ngulringau ku pasalrivane lini.

¹³ Ku tamatikaiyane ki Twaumase kai bavane ka sakiketeketane, sapelaelane ka twasupilringa kudra aswalaala ka sakiketeketane. Sanaka manemane ku arwa kasupisupilri, lri tara aru kirarimu ku akawlravaneini.