Hiburu 7 - Ngudradreadrekadhane Ka Sisiu 魯凱語聖經

Barakalai ka Milikizidike

¹ Kikai Milikizidike talialalai ki swa Salrime, laka barakalai ki Abebeelengenga ka Twaumase. Sa papacai ki latalialalai ku Aberahame, si kainganainga twalai ki tamakakaruburane, ku Milikizidike kiadredresenge iniane, si subulrubulru iniane.

² Ku Aberahame patwalai ki malraini si baai ku ziwbunuici iniane. Ku aswalaalanga, ku pacugane ku nagane ki Milikizidike yai “Madringelrese ka talialalai”, ngwalai saka talialalai ki Salrime, lakamani ku naganeini “Talialalai ki sulivatane” amia ku pacugane.

³ Kai Milikizidike kadrwa ku tama, kadrwa ku tina, kadrwa ku tatwaladhane ku daane, laka kadrwa ku nipacasane ku takitulalakane ku tapacadhane. Mangangiamia ki Lalake ki Twaumase, ka palralrawthu abarakalai.

⁴ Kunumi ani kidremedrema, kai lasu saniange turamuru! Ku tamatama ki kinawacekelane ka Aberahame kudra malraini twalai ki takikaruburane ku lamanemane ku ziwbunuici wabaai iniane!

⁵ Kudra labarakalai ka agagane ki Lrivi, singiakai ki takelretane ki hulrice, si papia ki sakacekele lini ka swa Iseraylri malra ku ziwbunuici, laka thadaalrane ka agagane ki Aberahame.

⁶ Ai, ku Milikizidike kaika ngwakai ki swa Lrivi, la patwalai ki Aberahame malra ku ziwbunuici, si la pasikai subulrubulru ku amani ku tarwamara ku palraingi ki Twaumase.

⁷ Ku swabulrubulru ki palrapalra madradrau kudra ki kiasubulrubulru, ku umawmase kikai kadrwa ku akalrikilrikane.

⁸ Lu pangukaita ki labarakalai, amani ku tara malramalra ku ziwbunuici, kai lalasu lri pacai, ai, pangukai ki Milikizidike, mialri malra ku ziwbunuici, si la panianianiake, mia ki taiyane ki Sisiu,

⁹ lakamani, sa baai ku ziwbunuici ku Aberahame, lri dulruta iya kai, ku swa Lrivi mialri baai ku ziwbunuici, ku agagane ki Lrivi tara malramalra ku ziwbunuici.

¹⁰ Ku patengatengane sa kidredresenge ku Milikizidike ki Aberahame, ku swa Lrivi kaina kiatulalake, ai lri dulruta iya kai, yakainga adringi ki kinawmasane ki cucungulaneini ka Aberahame.

¹¹ Kunadruma sabaai ki umawmase ki swa Iseraylri ku hulrice singiakai ku kakudhane ki barakalai ki swa Lrivi. Anaka kiatulrepenge ku awngane ki kakudhane ki swa Lrivi, naikai arakai ki maelane ka Milikizidike, kaika singiakai ki kakudhane ki Arungu.

¹² Kudra akabalrithinga ku kakudhane ki barakalai, kai hulrice lri mialri akabalrithi.

¹³ Ku Tamatamata, ka amani kikai mapelaelaelata, swakai ki maelane ka zuku, kikai zuku kadrwana ku a barakalai, si kipuawngane ikai ki tapatarumaramarane.

¹⁴ Wathingaleta makanaelre, ku Tamatamata swakai ki zuku ki Yuda, ku Musi samatikai ki barakalai, kai matiakai kikai ki zuku.

Drumane ka barakalai ka mia ki Milikizidike

¹⁵ Kikai arwa athingalanenga, asi lwiyane kudra drumane ka taingeane ka mia ki Milikizidike ka barakalai adrelanenga.

¹⁶ Kai lasu ku taabarakaladhananeini, kai ngwakai ki nitukakudhanane ki umawmase, ngwakai ki kadrwa ku taalikaiyane ka puku ki niake.

¹⁷ Asi lwiyane, kai Sisiu amia kai, “Lri singikaisu ki ngwakai ki Milikizidike ka palralrawthu abarakalai.”

¹⁸ Lakamiyaiya kai, ku supilri ka nitukakudhanane kiasararenga, asi lwiyane twaramuru ka kadrwa ku pukuini, kadrwa ku luludane.

¹⁹ Ku hulrice ki Musi kadrwa ku apakitulrepengane sanaka manemane. Kikai la ikainga ku mathaithariri ku sidramata, ngukai iniane, lri dulruta arwa deethe ki Twaumase.

²⁰ La kaika kathane kikai, yakaiyana ku takiketeketane ki Twaumase, kudra drumane ku barakalai lu kipacegecege kadrwa ku miyaiya kaika sakiketeketane ka vaga.

²¹ Ai ku Yesu ngwakai ki takiketeketane si abarakalai, ku Twaumase naamia kai iniane: Ku Tamatama nakiaketeketenga, kai lri tupela ku kidremedremeini: Lrika palralrawthungasu abarakalai.

²² Ku miyaiya kai ku tamakakaelane sapelaelane ku Yesu amaninga ku mathaithariri ka sakiketeketane.

²³ Ku drumane yakai ku taingeane ku tamakakaelane, kunadruma takalra ku kiapacegecege ku barakalai, asi lwiyane kwi lalasu la wapacainga, kai maka pacungulu kaungu.

²⁴ Ai, ku Yesu palralrawthu panianiake, ku takabarakaladhananeini ku awngane kai lri maka pacungulu ku palrapalra.

²⁵ Lakamani, lri tara dulru palribulu kudra ngwakai iniane si kidethe ki Twaumase ku umawmase, asi lwiyane lri palralrawthu panianiake, si atalingikaiyane liniane kitubi ki Twaumase.

²⁶ Laka miyaiya kai, ku Yesu ala amani ku urikaita ka abebeelengenga ki barakalai. Amani ku alrivilrivi, kadrwa ku tapasalrivane, kadrwa ku pasalrivaneini, kiapatwalai ki mapasaisalriu ki umawmase ki patukudha, si ki pubelenge mwa ki sabebelengenga subelebelenge.

²⁷ Makakaela ki drumane ki abebeelengenga ki barakalai, kai lri paswala pasikai ki pasalrivaneini patarumara, ala pasikai ki pasalrivane ki umawmase patarumara. Kai lasu kingivavaale ngipapatarumara si kalrepenge.

²⁸ Ku hulrice ki Musi paacegecege ki kai kiatulrepenge ka umawmase pa abebeelengenga ki barakalai; ai, ku Twaumase ku taikaiyanenga ki hulrice, palraingi si kiketekete, pacegecege ki palralrawthunga kitulrepenge ka Lalakeini pa abebeelengenga ki barakalai.