Hiburu 6 - Ngudradreadrekadhane Ka Sisiu 魯凱語聖經

¹ Lakamani, kudra aswalaalanga ku nipelaelane pangukai ki Kirisitu tacilringa pulrilrikudru, si cubungu papia ki mabea ka salrwane adili. Takai ka taikaiyane ki sapathagili ki salrwane kecececengane, maruamaninga kudra ngitatasiwlriwlriwlri si cilri ku kadrwa ku paluludane ka kakudhane ku tangilribatane, kasalrwa ki Twaumase,

² ku makaelaela ku tapabanavane, ku taanswane, ku siaela ku wapacai, ku palralrawthu ka akisaibangane kudra la miyaiya kai ku sabulrwane.

³ Ala tapapia adili kudra ki mabeanga ka salrwane! Alaiyasi palraingi ku Twaumase, kikai ala amani ku lrika apianeta.

⁴ Pangukai kwidra la kiadailinga ki madringelrese ka kadalranane, lri tumane madu si makadulru pangitatupela liniane? Kai lalasu nayakainga ku ledra ki Twaumase, si kilrialringau ku tangimiane ku swa subelebelengane ku migemi, la malranga ki Siri,

⁵ kai lalasu kialringaunga ku tharirane ku vaga ki Twaumase, la thingale ku puku ki lrika alikaiyane kawmasane,

⁶ ai kiadailiana ki madringelrese ka kadalranane. Kikai miyaiya kai ku umawmase kaika adulrwanenga pasiwlriwlri liniane, si ngitatupela; asi lwiyane kai lalasu peaeelanga kedrekedre pwa ki ziwzika ki Lalake ki Twaumase, padredrele pakiarubwane iniane.

⁷ Lu tu udale ku angangade wacebe ku lalacenge, ikai ki tarakauawngu maadrau turamuru ku tamuesadhane kikai baai ki Twaumase ka akaesadhane.

⁸ Ai, kikai angangade alaiyasi cebe ku kadrwa ku paluludane ka cecenekane ka angatu si bala ka ubulu, lri ikai ku akipuswane ku matiaukuludru, si lai kilama ki apwi.

⁹ Ai, nikilibakane ka laretesane, unu amia nai kai kawriva, ai masalrwana nai numiane kwini tangimiamiane numi ka kai matumane, padeethenga ki akipalribulane.

¹⁰ Kai Twaumase aparamaramau, kai lri karimuru ku pasikai numi iniane ku takaungane numi si sakialibake, amani kwidra twalai numiane kai telrai paralubu ki drumane ka sinzia.

¹¹ Ku madradrawnga ku sidramadrama nai yai: Kunumi ka tangeea patulrepengenga ku sakiasamwamula numi, lani ngimia patuelre ku sidramadrama numi.

¹² Madha kasalrasalrai, twalralrava kudra la kai maela ku salrwane ku umawmase, la kainganai tarumara ku pukawnunga ki Twaumase.

Tengatengaane ka palrainginga ki Twaumase

¹³ Ku Twaumase sa palrainginga ki Aberahame, nakiaketekete. Asi lwiyane kadrwa ku madraadrau iniane, la papia ki naganeini kiketekete.

¹⁴ Amia kai, “Li tara subulrubulruaku muswane, lai lri takaalra ku lalalakesu si lagaganesu.”

¹⁵ Ku Aberahame la kiadili ukalava, sakabilrilanenga la tarumara kudra palrainginga ki Twaumase.

¹⁶ Kai umawmase lu kiketekete, papia kwidra ki madraadrau iniane kiketekete; kikai samakaketeketane ka vaga arakai turingaringau ki rivwane ki maulrudru ka umawmase.

¹⁷ Papia kwidra ki lri tarumara ku pinalrainganenga ka umawmase, ku Twaumase lri pudriadriingai pelaela kudra kikakeini pakela lwigaigaigane kai lri tupela, ala kamani ku pikaini ki palraingingaini padrima ku sakiketeketane.

¹⁸ Kikai taidrusane kai lri maka tupelanga, asi lwiyane ku Twaumase kai lri kadraedrangelre. Lakamani, kuta ka yadringinga ikai iniane ka umawmase si kasulivalivate maadrau ku takipasapukwanane ta, ta magagemegeme kudra nipicucubungane mitane ku sasiadradrama.

¹⁹ Lu ikai ku miyaiya kai ku sasiadradrama, maru amaaninga ku parenere ki niake, ka kai lri katumane ka asudralrwane, ngukakai lribate ki make ki daane ki Twaumase ka belenge, daruru adringi ki Alrivilrivi ka taikaikaiyane.

²⁰ Ngwalai mitane, ku Yesu aswalanga mwa kwini; kai lasu pangiamianga ki ngwakai ki Milikizidike kaamani ku palralrawthu ka abebeelengenga ki barakalai.