Hiburu 5 - Ngudradreadrekadhane Ka Sisiu 魯凱語聖經

¹ Sanaka abebeelengenga ki barakalai nipilriane patwalai ki laumawmase. Ku awnganeini atalingikaiyane ki laumawmase pasikai ki Twaumase, pasiakai ki lapasalrivane lini si patarumara ki Twaumase ka saceacebe si sapatarumarane ka lamanemane.

² Kai abebeelengenga ki barakalai makalra ku taturamuraneini, lakamani wadulru kasulrapele ki la kadrwa ku thingale si la pasalriu ka umawmase.

³ Si, ngwalai ki turamuraneini, la kaika pasiakai ki pasalrivane ki laumawmase patarumara ku sapatarumarane, lai tara ngipapasikai ki pasalrivaneini patarumara ku sapatarumarane.

⁴ Kadrwa ku umawmase ku ngiamamalra ku niwsakenane ka taetalane ki abebeelengenga ki barakalai. Kathaane ku pilri ki Twaumase ka lri dulru kaamani ku abebeelengenga ka barakalai, mia ki Arungu.

⁵ Laka thadaalrane, ku Kirisitu kai kiakarengece ku niwsakenane ka taetalane ki abebeelengenga ki barakalai, ngiabalre, ku Twaumase amia kai iniane: Kusu amanisu ku Lalakeli; kaikameane lai a Tamaku muswane.

⁶ La ikaainga ki talidrumane ku amia kikai: Lri patupapalrasu ki ngwakai ki Milikizidike, kapalralrawthu abarakalai.

⁷ Ku Yesu sa ikawmasane, nawainulringa akwadrau papia ki amani ku lri dulru palribulu iniane pakidaili ki apacadhane ka Twaumase, alralrese kitubi. Asi lwiyane ngiatatu alebe, ku Twaumase la kilalra ku kitubini.

⁸ Unu Lalake ki Twaumase kai lasu, wadulru twalai ki takwalrianeini kicawcakwane ku apasingikaiyane.

⁹ Ku Twaumase kudra padarurunga iniane mwa ki kiatulrepenge, amaninga ku tangadrane ki palralrawthu ki akipalribulane sanaka pasalaladha iniane.

¹⁰ Ku Twaumase peaelaela singikai ki ngukai ki Milikizidike ka amani ku abebeelengenga ki barakalai.

Pakiapapawlringau ki wabaebalre ki sabulrwane

¹¹ Pangukai kikai, makaalrana ku akawrivane, ai makucingalre papia numiane swacenge, asi lwiyane ngiabalai numi thingale.

¹² Nai kamaninga numi ku takitwalravane ki umawmase, ai amaniana numi kudra lri kibulru ki palrapalra arakai ku aswalaalanga ka vaga ki Twaumase. Lri ungulwana numi ku mireke, kai lri dulru kane ku makawlukulu ku aga.

¹³ Sanaka waungulu ku mireke lrulai makanaelre, kaiyana maka wadulru pilri ku pacengecenge si kaipacengecenge.

¹⁴ Lu pangu talidrumanane kawriva, kathane ku yacengecengenga ku umawmase ka lri kane ku makawlukulu ku aga, kai lalasu makalranga ku tangilribatane lini, wadulrunga pilri ku mathariri si malisi.