Hiburu 4 - Ngudradreadrekadhane Ka Sisiu 魯凱語聖經

¹ Kudra palrainginga mitane ku Twaumase pakisupilri ku baaini ku aisadraneta, lata pikai ku sawakukuludru ku kidremedreme, amani lu ikai ku umawmase ku kai pangiamia kia iya ki Twaumase, si kai maka malra ku taisadraneini.

² Kuta miata liniane ka kialalranga ku hukuingi. Kwi lalasu sakilalra kikai matiakiragai, kaika wamalra ku akaesadhane, asi lwiyane kwi lalasu sa kilalra, kai arakai ku salrwane tarumara.

³ Kuta ka kiapawtenga lri dulruta malra ku taisadrane ki Twaumase, mararaamau ku taiyaneini: Yakaiyaku ki elathane kiketekete: Kwi lalasu lrika palralrawthu kai kisupilri ku baaili ku aisadrane! Adravane ku Twaumase twalai kudra sabekace kawmasane ka twalrepengenga ku awnganeini, kai Twaumase amiyana kikai miyaiya kai ku vaga.

⁴ Ikai ki sisiu yakai ku tamatikaiyane ki samakapitulu ka vai, amia kai, “Ikai ki samakapitulu ka vai, ku Twaumase yasadra ku awnganeini patuelre.”

⁵ Ai ikai ki thadalrane pangukai kwini ku saarakaiyane ku taiyane ki sisiu amia kai, “Kwi lalasu lrika palralrawthu kai malra ku baaili ku aisadrane.”

⁶ Kudra la aswala kilalra ku hukuingi kailri maka malra ku aisadrane, asi lwiyane kwi lalasu kai masalru, ai yakai ku drumane ku laumawmase ku lri kisupilri ku aisadraneini.

⁷ Kikai peaelaelanga ku Twaumase ani pakitukudha kelrete kudra minaka vaalane, ka amani kwidra “Kaikameane” niyane. Sa kawlainga ka caili kudra pangukaini ki Davidi kawriva, kai Sisiu yakainga ku pacase: Kaikameane, alaiyasi kilalra numi ku lingau ki Twaumase, madha kakelrathe.

⁸ Alaiyasi ku Yesua ka waililukunga ki laumawmase mwa ki palrainginga ki Twaumase ka taisadrasadrane, ku Twaumase sakabilrilanenga naikai matikainga kudra drumane ka vai.

⁹ Lukamiyaiya kai, yakaiyana ku drumane ku “Taisadrasadrane ka vai”, ka pasiakai ku apaisadrane ki umawmase ki Twaumase.

¹⁰ Asi lwiyane, sanaka mwa daane mwa ki palrainginga ki Twaumase ka taisadrasadrane, amani ku yasadranga ku awnganeini, mararaamau ki Twaumase sa isadranga ku awnganeini.

¹¹ Lakamani, takisamula mwa kwini ki taisadrasadrane, lukamiyaiya kai, anika aneaneane kai lri ngimianga kudra ki la pathaele ku drekase si tubakebake amalebe.

¹² Ku vaga ki Twaumase mapapidiki ka yakai ku angimiane. Marairangisi ki dramu, adravane ka ri si abake, ka pararegeregane si lusu, wadulru pwadringi culrulu. Wadulru thingale ku urikai si takidremedremane ki kidremedreme ki umawmase.

¹³ Kadrwa ku navaevanga ku adulrwane sekete ki Twaumase, kai nibekacane sanaka manemanenga ikai ki maca ki Twaumase kadrwa ku paidringi. Lri tara icucubunguta iniane makanaelre si pelaela ku tapianeta.

Abebeelengenga ki barakalai ka Yesu

¹⁴ Lakamani, tamagagemegeme kudra pelaelata si thingale ka salrwane, asi lwiyane yakai ku tangea ku saniange ka abebeelengenga ki barakalai, amani ku Lalake ki Twaumase ka Yesu, wamwanga cucubungu ki Twaumase.

¹⁵ Ku abebeelengenga ki barakalaita kaika kailri dulru kakalithi ki turamuraneta; ngiabalre kamani, namiyaiya mitane ikai ki maneemanenga kipadradresenge ku akikituthiathingalane, ai kai pasalriu.

¹⁶ Lakamani, takagarange kainganai mucucubungu ki migemi ka taetalane ki Twaumase, lata tarumara ku thalradhane si migemi ka amani ku takiparalubaneta.