Hiburu 3 - Ngudradreadrekadhane Ka Sisiu 魯凱語聖經

Ku Yesu walribate ki Musi

¹ La pinilriane ki Twaumase ka laretesane! Kidremedrema ki Yesu, amani ku sikawlu ki Twaumase ka sasiakawlu, amani ku pasudalepe ki salrwaneta ka abebeelengenga ki barakalai.

² Pangiamia ku kidremedremeini ki wapilri iniane si pakainganai kaungu ka Twaumase, mia ki Musi pangiamia ku kidremedremeini pasikai patuelre kaungu ki wacekecekele ki Twaumase.

³ Ku kilrigu ki twadaane ka umawmase walribate ki tudaaneini. Lakamiyaiya, ku Yesu swadalepe ka makaakalra ki Musi ku akilrigwane.

⁴ Sanaka daane tudaane ki umawmase, ai kai Twaumase wabekace sanaka manemane.

⁵ Ku Musi ikai ki wacekecekele ki Twaumase patuelre pangiamia pasingikidremedreme ku takasasiakawlane, ka amani ku peaelaela ku lrika akawrivane ki Twaumase lubibilrili.

⁶ Ai, ku Kirisitu sakai ki taka Lalakane pangiamia ku kidremedremeini rathudu ki daane ki Twaumase. Alaiyasi kakeecengeta ku sidramadramata, lri ikai ku garangane, lri ikai ku salrwane, amaningata ku wacekecekele ki Twaumase.

Taisadrane ki kawkawlu ki Twaumase

⁷ Lakamani, mararamau ku taiyane ki Siri: Kaikameane, alaiyasi kilalra numi ku lingau ki Twaumase,

⁸ madha kakelrathe, ngialrau kunadruma baebalre ki Twaumase, ikai ubulane kituthiathingale iniane.

⁹ Ku Twaumase amia kai: Unu ikai ki tinaramasupatelane ka caili, ku cucungulane numi nawadreelenga ku takaunganeli, ai yakaiyana kwini kituthiathingale nakwane, kilrialringau nakwane.

¹⁰ Lakamani, ku papiali kwini ki zidai ki laumawmase kaelaela. Amiaku kai: Kai lalasu kaika patengane ku kidremedreme makanaelre, la baebalre ki drekaseli.

¹¹ Yakaiyaku ki elathane kiketekete: Kai lalasu lri apalralrawthu kai malra ku baaili ku aisadrane!

¹² Laretesaneli, dradreela, amani lu ikai numiane ku ngialisiane ku takidremedremane, si kai maka kasalru, la ngibalre kidaili ki apalralrawthu panianianiake ka Twaumase.

¹³ Ai, sa ikaiyana kaikameane, mapasapukupukupukwana luka kaiyaiya, ikai numiane amani lu kipamama ki pasalrivane, lu kakawlukulu ku kidremedreme.

¹⁴ Alaiyasi dulruta ka sakamiya ku salrwane sakapathagilane, pakela ki taalikaiyane kai akabalrithi, amaningata ku kiaredelane ki Kirisitu kipuawngane.

¹⁵ Kai Sisiu amia kikai: Kaikameane, alaiyasi kilalra numi ku lingau ki Twaumase, madha kakelrathe, ngialrau kunadruma baebalre ki Twaumase.

¹⁶ Aneane ku kialalra ku lingau ki Twaumase si la baebalre iniane? Kaika amani kudra ililuku ki Musi patwalai Izipiti ka laumawmase?

¹⁷ Ikai ki tinaramasupatelane ka caili, ku Twaumase papia ki aneane kaelaela? Kaika amani kudra ki lapasalriu si ikai ubulane pacai ka laumawmase?

¹⁸ Ku Twaumase sa kiketekete amia kai, “Kai lalasu kai lri dulru malra ku baaili liniane ku aisadrane”, kikai papia ki aneane avavaga? Kaika papia kwidra ki wabaebalre ka umawmase?

¹⁹ Lu piane kai drele, kudra kaika maka kisupilri lini ki aisadrane amani sa kai kipawtenga.