Hiburu 2 - Ngudradreadrekadhane Ka Sisiu 魯凱語聖經

Matiasamali ku tapalribulane

¹ Lakamani, tatara kakecenge pikai ku kilalrangata ku patengane ka sabulrwane, amani lu kialudruta kai ki bavane ka kakudhane.

² Kudra pelaela mitane ki sasiakawlu belenge athingalanenga ka tengatengaane ka asudralrwane, patuelre ku kai paluludu kai ki nipelaelane ku umawmase tarwamaranga ku naika akipathavungane lini.

³ Lukamiyaiya kai, alaiyasi tudrekaseta kikai maadrau turamuru ka sapalribulane, tumane maka mubere ku sapathavungane? Ku Tamatama amani ka aswalanga pelaela kikai sapalribulane, kudra la kialalranga ku umawmase, la papia mitane patengane iya.

⁴ Laka thadaalrane, ku Twaumase ngiakakamani arakai ku maelane ka puku, ku matiasamali ka awngane, si makaelaela ka pinangu Twaumasane ka puku, arakai drima kudra pelaelaela lini ala ka patengane, la singikai ku kidremedremeini baai apavalavala mitane ku migemi ki Siri.

Pasiakai ku akipalribulane ki umawmase sudalrane

⁵ Ku Twaumase kai wamalra kwidra iyaiyata kwini lrika bilrilane ka kawmasane, parathudu ki sasiakawlu belenge.

⁶ Ngiabaalelringa, mararamau ku taiyane kai ki Sisiu: Twaumase, sapatumatumane kai umawmase, si la kakalithisu iniane; kai umawmase kawmasane sapatumatumane, la kakalithisu iniane.

⁷ Wabekacesu iniane, laka alelebe ki sasiakawlu belenge ku tikiyane; arakaisu ku lrigu, ku kiwsakenane pasicivare iniane;

⁸ si parathudu iniane sanaka manemanenga. Kikai amia kai, “Ku Twaumase parathudu sanaka manemanenga ki umawmase”, kikai athingalane ka paelre sanaka manemanenga. Ai, kikai asasane kaita wadrele ki umawmase lu rathudu.

⁹ Wadreelelringata ki Yesu kamani, ka kiapasaleelebe ku tikiyane ku taabelengane ki sasiakawlu belenge, pakai ku apangukaiyane ku migemi ki Twaumase, pasikai ki laumawmase pacai. Kaiasasane, wadreeleta iniane ngwakai kwalri ki apacadhane si malra ku lrigu, si ku civare ki kiwsakenane.

¹⁰ Kudra amani ku wabekace si apamwamwa sanaka manemanenga ka Twaumase pangwakakai ki Yesu ku akwalriane, si kamaninga ku kiatulrepenge, pakai ku taelre ki lalalake kisupilri ku lriguini, ku tapiane kai ki Twaumase mamamwa. Asi lwiyane ku Yesu naamani ku thamadalane ka wasangililuku liniane mudaane ki akipalribulane ki thamadalane.

¹¹ Amani ku wasinau bula ku pasalrivane ki umawmase, ikai kudra ki la mabulanga ka umawmase yakai ku vaeva ka Tama lini. Lakamani, ku Yesu kai ngwalai ku tasiretesanane liniane si kalrumale.

¹² Kai lasu amia kai: Twaumase, lri pelaelaku ku naganesu papia ki retesaneli, lri icucubungaku ki tayelrelreane ki laumawmase senai drengedrengere muswane.

¹³ La mialri iya kai kwi lasu: Lri satalwaku ki Twaumase. La pela iya kai: Drela! Kwaku si Twaumase kudra baai nai ki lalalakeli yakai kai patuelre!

¹⁴ Kikai lalalake kudra yakai makanaelre ku erai ku beate ka umawmase, ku Yesu la mialri ka thadalrane ku takaumawmasane. Lakamiyaiya kai, ngwakai ki tapacadhaneini, wadulru kabebetethe amudu kudra ki magagemegeme ku puku ki apacadhane ka Akema,

¹⁵ si pulatadre kudra la ngwalai ki kiwcane ki apacadhane si ka aduringa ku panianianiakeini.

¹⁶ Athingalane, kaika paralubu ki sasiakawlu belenge, paralubu ki agagane ki Aberahame.

¹⁷ Lakamani, ikai ki manemanenga lri tara mararaamau ki laretesaneini, kamani ku mathariri ka matiasudralru ka abebeelengenga ka barakalai icucubungu ki Twaumase, pakai ku akipacepane ku pasalrivane ki umawmase.

¹⁸ Asi lwiyane kai Yesu kialringaunga ku akikituthiathingalane, la kipakwalri turamuru, kikainga kai Yesu wadulrunga paralubu kudra ki kiatuthiathingale ka umawmase.