Hiburu 13 - Ngudradreadrekadhane Ka Sisiu 魯凱語聖經

Watumane madu si kikiragai ki Twaumase

¹ Anu ka tamiane ki mabetabetake si makilibalibake.

² Pasudalrua ki singi babadhane ka pwa ki daane numi. Nayakai ku umawmase ku paiya kikai, sa kai thingathingale ala ka paswadaalru ki sasiakawlu belenge.

³ Pulringava kudra la kiaemenge ku umawmase, miakau taelre numi itaememengane. Pulringava kudra la kiapakwalrialri ku umawmase, miakau miyaiya numi kipakwalrialri.

⁴ Sanaka aneane tukucingalra kai tamacacapilane ki ngwakai ki akarudrangane, ku ladrwadrusa lri pakaelre ku kidremedreme ka patengatengane mapapasikai. Ku Twaumase lri saibange ku wacapange ki sawvalai si ababai ku umawmase.

⁵ Madha akuli ki lapaisu, ngulwadhana kudra pikaikai su patuelre. Asi lwiyane ku Twaumase amianga kai, “Kainaku lri katwase muswane, lai kainaku cilri muswane palralrawthu.”

⁶ Ala, kuta takagarange iya kai: Ku Tamatama amani ku takiparalubaneli, kainaku lri mukuludru, ku umawmase lri dulru tumane nakwane?

⁷ Ngulringava kunadruma kudra waililuku numiane, si pelaela numiane ku hukuingi ki Twaumase. Siwlriwlria kidremedreme kudra sa ikawmasaneana ku pangiatumane panianiake, ku pangiatumane pacai, twalralrava ku salrwane lini.

⁸ Ku Yesu Kirisitu, adravane kwiya, adravane kaikameane, pakela lumamilringi, thadaalrane.

⁹ Madha pamamama ki kadalranane numi kudra maelaelane ku la taiyane. Satalwa ku migemi ki Twaumase, si pasapukwane kitulrepenge ku kidremedreme numi, madha satalutalu ki nitukakudhanane ku ngwakai ki akaneane, ku satalu ki nitukakudhanane ku umawmase kadrwa ku akiparalubane.

¹⁰ Ku yakai ki Alrivilrivi ka balrawbau kawaungu ku barakalai ki swa Yuda kadrwa ku kingidri lini kane ku yabelenge ki tapatarumaramarane ku sapatarumarane.

¹¹ Ku abebeelengenga ki barakalai ki swa Yuda mailuku ku erai ki waudriwdripi mudaane ki Alrivilriviilrivinga ka taikaikaiyane, la tusamwalrane ki pasalrivane ka sapatarumarane si patarumara. Kudra lakinawmasane ki waudriwdripi la pikai lrilringulu lama.

¹² Lakamani, ku Yesu la pacai ikai latadre ki cekele, pakai ku arakaiyane ku eraini si pakabula ku pasalrivane ki umawmase.

¹³ Ala, la ta mulatadre ki cekele silape iniane, si kisapalra ku takitusinalremeaneini.

¹⁴ Ikai kawmasane, kadrwa ku lrika palralrawthu ku cekeleta, kiapasilasilapeta kudra cekele lukabibilrili.

¹⁵ Ta sakai ki Yesu, si la arakaikai ku sadrengedrengerane tusapatarumarane, la patarumara ki Twaumase, amani kwidra lri arakaita ku bibiane pelaela ku naganeini.

¹⁶ Madha karimurimuru ku apiane ku mathariri si aparalubane ki palrapalra, asi lwiyane ku miyaiya kai ku sapatarumarane amani ku kadalame ki Twaumase.

¹⁷ Pasalaladha ki tarasangililuku numiane, si kilalra ku vaga lini. Taradrangalrungalru ki abake numi, asi lwiyane lukabibilrili lri papia ki Twaumase baai ku takaungane lini. Lu kilalra numi liniane, lri kiragai kaungu, sana kai mia kwini, lri kasulri si kasalrai, luka miyaiya kai manemane ku akaesadhane numi?

¹⁸ Madha idrengedrengere ku apasikaiyane numi naiane inulri. Ngiaka kasalru naika mabula ku kidremedreme naika mwabangalre ka tangukakaiyane ki madringelrese ki kadalranane.

¹⁹ Laka kiatuubiaku numiane ku apasikaiyane numi nakwane inulri, kitubi ki Twaumase ku adulrwaneli siwlri mwa numiane.

Inulri

^20-21 Ku Twaumase patwalainga ki wapacai pasiela ki Tamatamata ka Yesu. Pangwakai ku tueraerai ki Yesu si pelaela ku palralrawthu ka sakiketeketane, la kamaninga ku maadrau ka tarapagwagwagu ki kiu. Ala ki kai lri patarumara ku sulivatane ka Twaumase ani ikai ki makaelaela ki mathariri ki takaungane numi pakitulrepenge numiane, lanu dulru paluludu ku kidremedremeini. Ani pangukai ki Yesu Kirisitu ikai ki kinawmasaneta tulrepenge ku kadalameini ku awngane. Ku lrigu ani papia ki Kirisitu, pakela palralrawthu! Amingi.

Bibiilrilinga ka vaga

²² Laretesane, kiatubiaku numiane kiadila tarumara kai sapasapukwanane ka vaga; kainaku twalragi turamuru pacase kikai tigami.

²³ Lri pathingalaku numiane, kai retesaneta ka Timuthi mwa latadrenga ki taememengane. Alaiyasi ana sarakela, nai tupalra nakwane katwase drele numiane.

²⁴ Mwadringadringai madu iyanga ki latarasangililuku numiane si lasinzia makanaelre. Ku twalai Italri ku laretesaneta aii amiamia numiane.

²⁵ Ku Twaumase ani baai ku migemini numiane makanaelre!