Hiburu 12 - Ngudradreadrekadhane Ka Sisiu 魯凱語聖經

Tamaita ka Twaumase

¹ Kikai yakainga kai tathathatha ku akasi ki umawmase, mia ki ememe ka ngiathalringulu mitane, lata mwalra kai watelenge patuelre si taikaiyane mitane ka pasalrivane, si kiadili kai kaela papia lailai ku yacucubungu mitane ku kadalranane.

² Tadrele pudriadringai ki Yesu, asi lwiyane amani ku twapathagili si twalrepenge ki salrwaneta. Kai tiakelepane icucubungu ki ziwzika, ngiabaalrelringa, pakai kwidra mwakalavalava ku sakiaragaini, kai twamanemane kwidra matikiarubwane ikai ki ziwzika pacai. Kikai yakainga vanale ki taetalane ki Twaumase nene.

³ Kidremedrema kudra tangilribataneini. Watumane kiadili ku lisiane ki mapasaisalriu ka umawmase! Lakamani kunumi madha kasulrisulri.

⁴ Ku tamakakaruburane numi ki pasalrivane, kainu kiaecebeana pakela ki twaeraerai.

⁵ Marimurunga numi ku tapiane ki Twaumase arakai ku sapasapukwanane ka vaga ki lalake pasapukwane numiane? Amia kai: Lalakeli, dradreela ku sabulrwane ki Tamatama, madha ngwalalai ku takaelaelaneini si kasulri;

⁶ asi lwiyane ku Tamatama wabulru ku kadalameini ka umawmase, la lrumai kudra tarumaraini silalake makanaelre.

⁷ Kunumi kiadila kibulru, asi lwiyane lu kibulru numi sapelaelane ku tapangimiane ki Twaumase numiane mia ki lalakeini. Yakai ku lalake ku kai kia bulrubulru ki tamaini?

⁸ Alaiyasi kai numi ngimia ki drumane ki lalake tarumara kibulru, kai numi ka patengane ka lalake, amaninga kudra nikibubuliane ka lalake.

⁹ Ku ngwkai ki beate ka tama, tarwamarata kibulru, si la usakeneanata liniane. Ala, ku ngukai ki abake ka Tama, kaita ka lrika mapasalaladha, si malra ku niake?

¹⁰ Ku ngwakai ki beate ka tama singiakai ku kidremedremeini si bulrwana mitane; ai, ku sabulrwane ki Twaumase pakai ku akaesadhaneta, si kitudrulru ku alrivilrivaneini.

¹¹ Lu kibulrubulruta, kai ta kiaragai. Ai luka bilrilanenga, kudra la ngwalai ku takibulrwane si ki pakitwalrau ku umawmase wadulru pumadru ku madru ki rathudane, si ngukai ki madringelrese ku tacekecekelane.

Wabulru si pakiapapawlringau

¹² Lakamani, kunumi cidinga kwini kadrwa ku puku ka alrima, la seege kwini twaramuru ka paculru!

¹³ Ngukakaikaikaiya ku madringelrese ku kadadalranane dadavace, lani kai kisalru ku mapilai ku drapale, ani siwlriwlri sapukwane kamani.

¹⁴ Kisamula kikadalru ki umawmase, si ngukakai ki mabula ku tacekecekelane, ku kadrwa ku bulane ku tacekecekelane kadrwa ku lri maka drele ki Tamatama.

¹⁵ Dradreela, amani lu ikai ku sakacilri ku migemi ki Twaumase. Dradreela, amani lu ikai ku umawmase ku ngiamia ki yakai ku sapapacai ku ubulu, lu kadrawnga mabebetethe ki laumawmase.

¹⁶ Dradreela, amani lu ikai ku wacapange ki ababai ki sawvalai, amani lu ikai ku mia ki Isau kaika patengane ku tawsakenane, ngwalai ki tikiane ki akaneane si kilangai ku nagane ki tinueapanane.

¹⁷ Sakabilrilinga, wathingale numi, pasana tarumara ku sasubulrubulrwane ki tamaini, ai kai kiatarumara; adravane tubi alralrese si kisanu malrana sawlri, kai maka wasawlringa kudra tapianengaini.

¹⁸ Kai numi wakela si mwa kudra ki adulrwane kirecenge lregelrege Sinai, mia ki tamwane ki laumawmase ka swa Iseraylri, ikai kwini yakai ku wakelrakelrakelrabe ka apwi, ku ememe, ku dradrimitane, si ku valrigi,

¹⁹ Yakai ku elrange ki rapa si lingau ki kawariva. Sa kilalra ku laumawmase kikai vaga, la kitubi ku kaika akawrivanenga liniane;

²⁰ asi lwiyane kai lalasu kai maka siamece kwini drekase, amia kai, “Ku kiarecenge kai ki lregelrege, adravane ka waudriwdripi arakaiya ku lrenege papacai iniane.”

²¹ Kudra tangimiamiane matiaukuludru turamuru, la kamani ku iya kai ki Musi, “Manwagiligilaku ukuludru turamuru!”

²² Ai kaiyanganai numi mwa lregelrege Ziyungu, ka kaiyanganai numi mwa ki cekele ki palralrawthu ka Twaumase, ka Yerusalrime ka belenge, yakai ku kaika asiasipane ku sasiakawlu belenge.

²³ Kunumi yai kaiyanganai numi mwa ki taikaiyane kirararagai ki latinwapane ki Twaumase, kilakikai tinueapane ku nagane lini wapacasenga ikai belenge. Kunumi yai kaiyanganai numi mwacucubungu ki wasaibange sanaka umawmase ka Twaumase, ka wakelanga numi kudra ki abake ki kiatulrepenge ka madringelrese ka umawmase.

²⁴ Kunumi wakelanga numi mucucubungu ki kadawdalrwane ki bavane ka sakiketeketane ka Yesu, ka wakelanga numi kudra ki niparalikilikane ka erai, kikai erai ku sapelaelane walribate ki erai ki Abele.

²⁵ Lakamani, kunumi dradreela, madha pasiwlriwlri kudra kawariva numiane. Asi lwiyane ku kai tarwamara kwidra ki yakai kawmasane pelaelaela ku hukuingi liniane, kai lri dulru ubere ki pasalrivane, alaiyasi kaita tarumara kudra ki twalai belenge kawriva mitane, lrika makuciacingalre ku akatwasaneta ki pasalrivane!

²⁶ Sakamani kwidra, ku lingauini wavelevele ki kadaengane, ai kikai palrainginga, “Lu peelanga, kai nau lri pangivelevele ki kadaengane sikakathane, adravane kai belenge lri ngivelevele.”

²⁷ Kwini “Lu peela” niyane ka vaga athingalane ka papia ki binekacane ka lamanemane yai lrika kia pangivelevele, lri kipataluela, pakai ku apasurane kudra la kai kia pangivelevele.

²⁸ Lakamani, tapasikai ku atarumaraneta kudra kai lri maka kivelevele ka kuni kiaseasene. Lri singikaita ku takiragadhane ki Twaumase, arakai ku patengatengane ku sawsaesakene ukuludru ku kidremedreme pasikai iniane,

²⁹ asi lwiyane ku Twaumaseta amani ku lri amudu ka apwi.