Hiburu 11 - Ngudradreadrekadhane Ka Sisiu 魯凱語聖經

Patharukai ki Salrwane

¹ Ala, kai salrwane yai manemane? Kai salrwane papia ki nisidramadramane malritheethe ku angimiane, papia ki kaika nimaka drelaneana maka wadrelenga.

² Kunadruma ku umawmase ku maka dulru kilrigu ki Twaumase ngwalai ku salrwane lini ki Twaumase.

³ Amani kai salrwane, la thingaleta kai lepawngane ngwakai ki vaga ki Twaumase kibekace, laka miyaiya kai, kudra adrelanenga twalai kudra ki kaika amakadrelane kibekace.

⁴ Ngwalai ki salrwane, ku Abele mathaithariri ki Kaingi ku patarumaraini ku sapatarumarane ki Twaumase. Ngwakai ki salrwane, si kilrigu ki Twaumase, ku kitumadringelreseini, amani sa ngikakamani ku Twaumase tarumara ku saceacebeini. Adravane sapacainga, ngwakaiyana ki salrwane si kawriva.

⁵ Ngwakai ki salrwane, ku Inuke kai wapacai, kiapubelenge mwa ki Twaumase, kadrwa ku maka kiadringai iniane, asi lwiyane ku Twaumase tarwamara iniane. Amia kikai kai Sisiu, kai lasu sakaiyana ki pubelenge kiakiragainga ki Twaumase.

⁶ Luka kadrwa ku salrwane ku umawmase kai lri dulru kikiragai ki Twaumase. Sanaka mwacucubungu ki Twaumase ku umawmase lri tara kasalru ka yakai ku Twaumase, si kasalru iniane ka lri pakalreva ku kiasilape iniane ku umawmase.

⁷ Ngwalai ki salrwane, ku Nua ikai kudra ki kaiyana adrelaneana kudra ki manemane, kialalra ku tapakipapawlringavane ki Twaumase, si tuvaeva tuvarukuru, la udripi makanaelre ku wacekecekele. Kikai miyaiya kai, kwi lasu twapasalrivane kwini ki zidai, ngukai iniane la patwalai ki Twaumase tarumara ku ngwakai ki salrwane si kitumadringelrese.

⁸ Ngwalai ki salrwane, ku Aberahame pwakawnu pasalaladha ku tadawlane ki Twaumase, si katwase mwa kudra pinalrainganenga ka abaadhane ki Twaumase iniane ka kadaengane. Sa katwatwase ki cekeleini, kai wathingale ku amwane.

⁹ Ngwalai ki salrwane, la ikai ki palrainginga ki Twaumase ka kadaengane, ikai ki maelane ka kadaengane abadhabadha, ikai ki balrawbau, mararamau kudra ki thadaalrane iniane tarumara ku pinalraingane ki Twaumase ka Isake si Yakubu.

¹⁰ Asi lwiyane ku Aberahame siadrama kudra lekete si tudaane ki Twaumase ka makecenge ku karwalai ka cekele.

¹¹ Ngwalai ki salrwane, ku Sara adravane sa kai maka katawbaliri, la ngilribatenga ku atulalakaneini ku caili, kai alisu wadulrwana maka tulalake, asi lwiyane kai alisu masalru wadulrwana maka tulalake, asi lwiyane kai alisu masalru ki Twaumase ka lri tara pangimiya ku palraingingaini.

¹² Adravane kai Aberahame ka maru wapacainga, patwalai iniane ka tangeangea kudra mwacungulu ku agagane la mianga ki tariau belenge si enai babiabila ki laveke ku kalraane.

¹³ Kilakikai umawmase yai amani ka pakeela ki wapacai ku salrwane lini. Kai lalasu la kaika tarwamara ku palrainginga ki Twaumase, ai patwalai adaaili drele, ku kidremedreme lini kiararagai, la ngithathingale ku taikaiyane lini kawmasane ka maelane ka cekele si katwatwatwase ka badhabadha.

¹⁴ Ku amia kai kawriva ku umawmase athingaalane ka ngiapapasikaikai kisilape ku vaeva ka cekele.

¹⁵ Kaika mavalringivingi kudra katwasenga lini ku kadaengane, ana mia kwini, nai dulrwana siwlri.

¹⁶ Kudra akulikuli lini amani kudra mathaithariri ka cekele ibelenge, la kamani, ku Twaumase kai ngwalai ku ta si Twaumasane lini iniane si kalrumale, asi lwiyane padulrunga pasikai liniane ku vaeva ka cekele.

¹⁷ Ngwalai ki salrwane, ku Aberahame sa kilrialringau ku Twaumase iniane, wamalra ki lalakeini ka Isake patarumara, si tusapatarumarane ka waudriwdripi. Ku Aberahame amani ku tarwamara ku pinalrainganenga ki Twaumase, ai palraaingi malra ki beraberathane ka lalakeini tusapatarumarane si patarumara.

¹⁸ Ku Twaumase naamia kai iniane, “Lri patwalaisu ki Isake tarumara ku palraingingali ku agagane.”

¹⁹ Kai lasu lu kidremedreme ku Twaumase lri dulru patwalai ki wapacai si pasielane papanianiake ki Isake. Ai ku patengatengane, nai iyata kai, ku Aberahame patengane ka nawamalra ki Isake patwalai ki wapacai.

²⁰ Ngwalai ki salrwane, ku Isake pasiakai ku angimiane lukabibilrili si la subulrubulru ki Yakubu si Isau.

²¹ Ngwalai ki salrwane, ku Yakubu sakaiyana pacai pawvagai subulrubulru ki tadrusa ka lalake ki Yusepe, la siwkudru si sukubu ki Twaumase.

²² Ngwalai ki salrwane, ku Yusepe sakaiyana pacai matiakai ku ngwakai ki swa Iseraylri ku akatwasane lini Izipiti lukabibilrili, si pelaela ku apangimiane dralreke ki kinawmasaneini.

²³ Ngwalai ki salrwane, ku Musi sa kitulalakenga, ku marudrawdrangeini wadrele kwini tharirane ki daini, la malra sekete iniane taratulru ka dramare, kai mwakuludru ku drekase ki talialalai.

²⁴ Ngwalai ki salrwane, ku Musi sa kaadrawnga, kai mwabangalre kisilalake kudra ki ababai ka lalake ki talialalai ki swa Izipiti.

²⁵ Kai lasu la palraingi kamani taelre ki kawkawlu ki Twaumase kipakwalrialri, si kai ubangalre ikai ki pasalrivane kiraragai ka lri padaalru ka akiragadhane.

²⁶ Lu drele, ku apasikaiyane ki Kirisitu kitusinalreme, makuciacingalre ki lawbubulu ki swa Izipiti. Asi lwiyane siadrama ku pakalreva lukabibilrili.

²⁷ Ngwalai ki salrwane, ku Musi sakatwase Izipiti, kai mwakuludru ku takaelaelane ki talialalai, asi lwiyane kai lasu miakau wadreelenga ku kaika adulrwane ara maca drele ka Twaumase, si kakeecenge kiadili kai ubangalre siwlri.

²⁸ Ngwalai ki salrwane, la cegecege ku Takilragavane ka lrisi, si pelaela ku aparalikilikane arakai ku erai ikai belenge ki lrawlrawdru, ku amani ka kiasikawlu papacai ka sasiakawlu belenge la kai papacai ki tinueapane ki swa Iseraylri.

²⁹ Ngwalai ki salrwane, ku swa Iseraylri la dulru talubalre ki Suize ka laveke, mia ki wadadaavace ikameamealane, ku swa Izipiti sa palalava, la kidralreke ki acilai.

³⁰ Ngwalai ki salrwane, ku swa Iseraylri ngiathalringulu cekele Yeriku makapitulu ku vai, ku alradre ki cekele la ulebe kaburuku.

³¹ Ngwalai ki salrwane, ku pairairange ka Rahabe la kai kipakarededele ki papacai ki kai pasalaladha ki Twaumase, asi lwiyane kai alisu paswadalru ki taralrilriu.

³² Lri pacuungulwana naku pelaela? Kai makakelrete ku zikangeli matikaiyana ki Gidiunge, Barake, Samesunge, Yepeta, Davidi, Samuile, si tangilribatane ki layuginsia.

³³ Kai lalasu ngwakai ki salrwane, si kikaruburu akaci ki la ngiathalringulu ka lakuni. Kai lalasu arakai ku dringelresane, tarumara ku pinalrainganenga ki Twaumase, kai lalasu la metemete ki ngudui ki raiyungu,

³⁴ la edrepe ki madrareange ka apwi, si ubere ki akipapacadhane ki dramu. Twalai ki turamurane lini akabalrithi si kakeecenge, la kagarange sapukwane kikaruburu, si pamalebe ki kwapingi ki maelane ki kuni ka badha.

³⁵ Ngwalai ki salrwane, yakai ku la labaibai ku tarwamara kudra ki la siaela twalai ki tapacadhane ka laretesane lini. La ikaiyana ku ladrumane ku kai mwabangalre ku akipulatadrane, palraingi pacai ikai ki pakialringau ki takipathavungane lini, pakai ku amalrane ku mathaithariri ka bavane ka niake.

³⁶ La ikai ku umawmase ku kiaadili kitusinalreme, kilrumai, la ikai ku kiakerenge, kiaemenge pi taememengane.

³⁷ La ikaiyana ku umawmase ku kia cabiri kipapacai, kia ridraidri ki ngetele, kiacalrigi ara dramu si pacai. La ikaiyana ku umawmase ku siaebele ku lrangici ki nikubawbalane ka kiu si katwase acaicaicali, kiadili ki matikurwane, ki hakegai si kipakiangeange.

³⁸ Kai lalasu lu drele kai kawmasane kadrwa ku paluludane! Kai lalasu mia ki amani kudra kadrwa ku cekele ka laumawmase, yakai ubulane ki lalregelrege katwatwase, si salikaikai ki libi si barungulu.

³⁹ Ku salrwane kilakikai umawmase kiadrengedrengere ki Twaumase, ai kai lalasu kaika tarwamara kudra palrainginga ki Twaumase,

⁴⁰ asi lwiyane ku Twaumase kiadremedremenga kelrete ku mathaithariri ku apangimiane mitane. Ku kidremedremeini yai: Kwi lalasu lri tara kiredelane mitane ala lri dulru kitulrepenge.