Hiburu 10 - Ngudradreadrekadhane Ka Sisiu 魯凱語聖經

¹ Kai hulrice kaika patengane ka lamanemane kaika tengatengaane ka sapatwalravane, alalingu sikakathane ku lrika angimiane lubibilrili ka mathariri ka lamanemane. Thadaalrane ku sapatarumarane lukacaili patarwamara, kai hulrice lri maka dulru pangukai kikai ki sapatarumarane si ku mwacucubungu ki Twaumase ku umawmase maka kitulrepenge?

² Alaiyasi ku pasalrivane ki wasukubu ki Twaumase ku umawmase ka patengane kipakabula, naika kadrwanga ku pasalrivane ki takidremedremane lini, ku pangukai ki apatarumarane nai pisadranga patuelre.

³ Ku patengatengane yai, ku nipatarumarane lukacaicaili sapangulringavane ki umawmase ku pasalrivaneini sikakathane,

⁴ asi lwiyane ku erai ki sawvalai ka lwange si kiu kai lri maka mwalra ku pasalrivane ki umawmase.

⁵ Lakamani, ku Kirisitu lu mwanga kai kawmasane, si iya kai ki Twaumase: Kaisu mwarikai ki sapatarumarane ka waudriwdripi si lawbubulu; pasiakaingasu nakwane padulru ku kinawmasane.

⁶ Malrasesu ku yabelenge ki tapatarumaramarane ka Lama ka lrisi, la mialri kalraase ki Balrithane ki pasalrivane ka lrisi.

⁷ La iyaku kai: Twaumase, wakelanganaku, pakai ku apaluludane ku kidremedremesu, mararaamau ku tapacasane ki hulrice ka hungu, pangukai nakwane.

⁸ Paswala iya kai, “Malrasesu, la kaisu kadalame kikai sapatarumarane ka waudriwdripi si lamanemane, si kudra yakai ki tapatarumaramarane ka Lama ka lrisi si Balrithane ki pasalrivane ka lrisi.” Unu kilakikai sapatarumarane kai lamanemane yai singiakai ki hulrice si patarumara, kwini lasu amiyana kikai kawriva.

⁹ La pacuungulu iya kai, “Twaumase, wakelanganaku, pakai ku apaluludane ku kidremedremesu.” Ku Twaumase mwalranga ku siaswalanane patuelre ku sapatarumarane, pakai ku apawbalrithane ku tangicacilriane ki Kirisitu.

¹⁰ Ku Yesu Kirisitu paluludunga ku kidremedreme ki Twaumase, ngipapatarumara ku kinawmasaneini, kingivavaale si tulrepenge, ala kabulangata si papia ki Twaumase.

¹¹ Sanaka barakalai ki swa Yuda taacegecegane si kawaungu pasikai ki Twaumase, sangwakaalrale patarumara ku thadaalrane ka sapatarumarane, ai kilakikai sapatarumarane palralrawthu kailri maka dulru atalingikaiyane ki umawmase mwalra ku pasalrivane.

¹² Ai, ku Kirisitu kingivavaale patarumara si kapalralrawthunga ngimia ku sapatarumarane ku Balrithane ki pasalrivane ka lrisi, ala nene ikai ki vanale ki Twaumase,

¹³ ikai kwini ukalavalava ki Twaumase ku apamalebeane iniane ki badha si pitailebe ki drapaleini.

¹⁴ Ku kingivavaaleini ngiacacilri pacai, lrika palralrawthunga kitulrepenge kudra la kia pakabulanga si ka Twaumasanenga ka umawmase.

¹⁵ Ku Siri la mialri napeaelaela mitane, paswala iya kai:

¹⁶ Ku Tamatama amia ka: Ikai ki bilrilanenga ka vai, lrika miyaiya kai ku kiketeketeli liniane: Lri malraku kai hulriceli si pikai ki kidremedreme lini, pacase pikai ki awlru lini.

¹⁷ La pacuungulu iya kai, “Lri kainaku ngulringaunga ku pasalrivane lini si tapasalrivane lini.”

¹⁸ Lakamani, kudra kiapacepenga ku lapasalrivane, kailri murikainga kudra samupasalrivane patarumara.

Taaru adeethe ki Twaumase

¹⁹ Alakamani laretesaneli, ngwakai ki tapacadhane ki Yesu si surasakenga ka kadrwa ku kiwcane mudaane ki Alrivilriviilrivinga ka taikaikaiyane.

²⁰ Pasiakai mitane sudalrane ku bavane ka kadalranane, sivale ka ngwakai lribate ki make ka amani ku ngwakai ki kinawmasaneini ka panianianiake ka kadalranane.

²¹ Kuta kikai yakai kai saniange ka barakalai ka amani ku maecenge ku daane ki Twaumase,

²² ala kuta tatara arakai ku patengane ka kidremedreme si mapapedrenge ka salrwane, arakai ku nibulanenga, ka kadrwa ku pwalane ku kidremedreme, si nisinavanenga arakai ku acilai ka kinawmasane, kainganai aru adeethe ki Twaumase.

²³ Ala takakecenge kai ngivelevele pikai ku pelaelaelata ka thingaleta ku sidramane, asi lwiyane ku palrainginga ki Twaumase matiasudralru.

²⁴ Ala tamakakalikalithi maparaluralubu, putaluvaivai ku sakialibake, mapakalrumalrumale pia ku mathariri.

²⁵ Madha twalralrau kudra la kiatwalrawnga isadra ki akipaelreane sukubu, mapasapukupukwanalringa kamani, kudra wathingale numi ka lri padalrunga si kela ku vai ki Twaumase, naika arwa ngimiyaiya numi kikai.

²⁶ Alaiyasi thingalengata ku patengane ka sabulrwane, laka sakamianata ranau pasalriu, kadrwanga ku namanemanenga ku adulrwaneta patarumara ki akimupasalrivane.

²⁷ Kuta kathane ku aukuludrane ukalava ku sasaibangane si salamane ki kiaecebe ki Twaumase ku umawmase ka apwi!

²⁸ Kudra pasalriu ku hulrice ki Musi, sana ikai ku tadrusa ku tatulru ku patengane amia ku pasalrivaneini, lri tara kipapacai, kai lri kipacepe.

²⁹ Si kudra, pangukai ki siadrekase ki Lalake ki Twaumase, twatikiane ki Twaumase ku sakiketeketane ku erai, kaamani kudra wabula ki pasalrivaneini ka erai, si kudra twasinalreme ki migemi ka Ri, ku miyaiya kwini ku umawmase lai tumane pathavungu iniane? Kidremedrema, kai lrika mapakilrialringau ku akipathavunganeini?

³⁰ Wathingaleta kudra amia kai, “Yakai nakwane ku lri putaluvaivai ku vinuthane, lri tara bilriaku”; la iya kai, “Ku Tamatama lri saibange ki umawmaseini.”

³¹ Ku Twaumase yai palralrawthu panianiake, ku makakai ki alrimaini matiaukuludru turamuru!

³² Pulringava ku siaswalane ku vai. Ku Twaumase sa paledranga numiane, kiapadradresenge numi ku makaalra ku akwalriane, ai kai yakai ki tamakakaruburane amalebe.

³³ Yakai lu ki pucucubungu numi ki laumawmase kitusinalreme si kipakiangeange, yakai lu satalikai numi ki lakiapakwalrialri ki umawmase.

³⁴ Twapapalra numi ki kiaemenge kwalri. Lu kiravase patuelre ku lawbubulu numi, pasingia kidremedreme numi kiadili, asi lwiyane wathingale numi, yakaiyana ku pikai numi ku mathaithariri ka palralrawthu ka tacekecekelane.

³⁵ La kamani, kunumi madha pakakadrwadrwa ku garangane numi, kikai garangane numi lri iluku baai numiane ku madraadrau ku pakalreva.

³⁶ Pakai ku apangimiane ku kidremedreme ki Twaumase si tarumara ku palraingingaini, kunumi tara kiadiila.

³⁷ Asi lwiyane ikai ki Sisiu amia kai: Lri kai tarathainunga, kudra lri kainganai lri kela, kailri pwadailane.

³⁸ Ku swakai nakwane ka madringelrese ku umawmase lri ngwalai ki salrwane si malra ku niake. Ai, alaiyasi ikai ku umawmase ku siaulriwlri, lri kainaku kadalame iniane.

³⁹ Kaita ka siaulri si arungilisiane ka umawmase, yakai ku salrwaneta si kipalribulunga ka umawmase.