Hiburu 1 - Ngudradreadrekadhane Ka Sisiu 魯凱語聖經

Ku Twaumase pangwakai ki Lalakeini kawriva

¹ Ikai sakanadruma, ku Twaumase kingikalrale arakai ku taikalrane ku saarakaiyane, pangukai ki yuginsia kawriva ki cucungulaneta;

² ai ikai kikai ki satwalrepenge ka vai, pangwakai ki Lalakeini kawriva mitane. Kikai Lalake, ku Twaumase napangwakainga iniane bekace kai ki kiacaebe belenge, si la pilri iniane paucungulu sanaka manemane.

³ Kai lasu amani ku paledra ku ledra ki Twaumase, ka pakiatulrepenge putaluvaivai ku kinawmasane ki Twaumase, arakai ku puku ki vagaini pawlrudru sanaka maneemane. Samwalranga bula ku pasalrivane ki umawmase yai, la takaenenenga ikai belenge ki vanale ki sapupukuanenga.

Ku Lalake sabebelenge ki sasiakawlu belenge

⁴ Kikai takasaniangane ki Lalake walribate turamuru ki sasiakawlu belenge, mararaamau ku baai iniane ku nagane ka walribate turamuru ku matiwsakenaneini ki sasiakawlu belenge.

⁵ Ku Twaumase kaiyana kawariva ki naaneanenga ki sasiakawlu iya kai: Kusu yai amanisu ku Lalakeli; Kikai Tamanga naku muswane kaikameane. La kai papiana ki sasiakawlu belenge ki natangeanga iya kai: Lri a Tamaku iniane, lai a Lalake nakwane.

⁶ Ku Twaumase salri sikawlu ki takataakanga ki Lalakeini mwa kai kawmasane, la iyana kai: Ku sasiakawlu belenge ki Twaumase makanaelre lri tara sukubu iniane.

⁷ Pangukai ki sasiakawlu belenge, amia kai: Ku Twaumase paavalrigi ki sasiakawluini, la paapwi ki sasiakawluini.

⁸ Pangukai ki Lalake, la iya kai: Twaumase! Ku taetalanesu lri ikai palralrawthu! Arakaisu ku paramaramavane magagemegeme ki puku.

⁹ Madalamesu ki dringelresane, si kalraase kikai madringelrese; la kamani ku Twaumase ka Twaumasesu wapilri si cegecege muswane; la baai ku sakiaragai muswane, palribate ki papalrasu.

¹⁰ La iyana kai: Tamatama! Sakapathagilane wabekacesu kai kadaengane; la bekacesu belenge.

¹¹ Kai belenge si kawmasane lri kawlrau, ai kusu lri ikaisu palralrawthu; kai belenge si kawmasane lri mia ki laimai kasupilri kapurici.

¹² Lri malrasu balrulu kai belenge kai kawmasane, lri mia ki kiapabalrithi ku laimai, lrika sakamiyasu kai kaelaela; ku vaisu ku cailisu kadrwa ku alikaiyane.

¹³ Ku Twaumase kadrwana ku takawrivane iya kai ki naaneanenga ki sasiakawlu belenge: Bwala takaenenea ikai vanaleli, si ukalava ku apapidrurane ki badhasu ikai tailebeane ki drapalesu.

¹⁴ Lu mia kwini, kai sasiakawlu belenge laka manemane? Pasiakaikai ki Ri ki Twaumase; ku Twaumase siakawlu liniane pakainganai si paralubu kwini ki la lri tarumara ku sapalribulane.