Hagai 1 - Ngudradreadrekadhane Ka Sisiu 魯凱語聖經

Wadrekase ku Tamatama ku atupelane tudaane ku daane ki Twaumase

¹ Sakadrusa ka caili ki sakaeneme ka dramare ka aswalaalanga ka vai ku taatinuhikane ki Dariuse ki swa Perisia, ku Tamatama pangukai ki yuginsia ka Hagai si kawriva ki lalake ki Saletile ka Zerubabele ka siwciu ki swa Yuda si Yesua, ka abebeelengenga ki barakalai ka lalake ki Yehuzadake.

² Ku Tamatama ka abebeelengenga ki sanaka kwapingi amia kai ki Hagai, “Kai laumawmase amia kai, kikai yai kaika tatupelaelaneana tudaane kai daane ki Tamatama.”

³ Ku Tamatama ala pangukai ki yuginsia ka Hagai pelaela ki laumawmase kikai lebe kai aiyane ka vaga.

⁴ Ku Twaumase amia kai, “Aubulanenga kai daaneli, la ikaikai numi ki nitudaanane tuthariri turamuru ka ladaane!

⁵ Kikai kwaku ka Tamatama ka abebeelengenga ki sanaka kwapingi ani ngikakidremedreme kai tangimiamiane lini amiaku numiane.

⁶ Lri pakakalra numi sabulu ku eape, ai lrika bekeelane ku akitalekane; lri ikai ku akaneane numi, ai lri kai numi kabucubucuku; lri ikai ku bava, ai lri kai numi makakelrekelrete; lri ikai ku laimai, ai lri kai numi kaculuculu. Ku kipaisisu ki tarakaungu lri kai makakelrekelrete ki acekecekelane.

⁷ Kwaku ka Tamatama, ka abebeelengenga ki sanaka kwapingi ani ngikakidremedreme kai tangimiamiane lini amia ku numiane.

⁸ Kikai kunumi lu mulregelrega thurade, la tupela tudaane kai daaneli; la nau kiragai, si malra ku naika akiwsakeenaneli.

⁹ “Ana kakaalra ku akitalekane amia numi, ala ka bekeelane ku nimalrane; ku nikitalekane la iluku numi pubalriu, ai lri alraku si ipi iniane. Kwaku ka Tamatama, ka abebeelengenga ki sanaka kwapingi anau piya kaiya? Amani sa akinaburukanenga kai daaneli, ai kunumi la karacacaacange numi ku angitatudaanane,

¹⁰ Ngwalai kikai, kai belenge kai lri udale, kai kadaengane lai lri idrengere ku acebeane ku taleke.

¹¹ Lri pakipadradresengaku ku cengelrau kai ki kadaengane, lalrelrelrege, laumawma, lababuduane, la maulriulrive, sanaka nipacebeane ka taleke, laumawmase, nilapulapwane ka lawaudriwdripi, si sanaka lreedreke ki umawmase.”

Ku laumawmase kialalra pasalaladha ku drekase ki Tamatama

¹² Ku Zerubabele, si abebeelengenga ki barakalai ka Yesua, si twalai Babilunia kainganai siwlri ka naacaicali ka laumawmase makanaelre, pasalaladha pangimia ku drekase ki Tamatama ka Twaumase lini. Asi lwiyane kwi lalasu mwakuludru, la kirimu kilalra si pasalaladha ku vaga ki yuginsia ka Hagai ka nisikawlane ki Tamatama.

¹³ Ku Hagai papia ki laumawmase pelaela ku vaga ki Tamatama, iya kai, “Palraingaku ku aikaiyane tapalra numiane.”

¹⁴ Ku Tamatama la kandu ki siwciu ki swa Yuda ka Zerubabele, si abebeelengenga ki barakalai ka Yesua, si lasiaulringa ka laumawmase ka namatwasenga acaicali; kwi lalasu la pasikai ki Tamatama ka abebeelengenga ki sanaka kwapingi ka Twaumase lini, tupela tudaane ku daane ki Tamatama.

¹⁵ Kikai yai amani sa sakadrusa ku caili ki sakaeneme ki dramare si 24 ka vai ku taatinuhikanane ki Dariuse.