Habakuke 3 - Ngudradreadrekadhane Ka Sisiu 魯凱語聖經

Inulri ki Habakuke

¹ Kikai yai inulri ki yuginsia ka Habakuke:

² Tamatama, sa kilalraku ku takaunganesu, kai kidremedremeli swaete ku usakenane si ukuludrane. Kiatubiaku muswane ikai kai ki zidai ku atupelanesu pia ku napiangasu ku maadrau ka awngane; kiatubiaku muswane ikai ki elathanesu la mialriya paathingalane ku kalithane.

³ Ku Twaumase lri peela twalai Idume kainganai; ku sanianiangenga ka Twaumase lri twalai Parange lregelrege kainganai. Ku lriguini lri kabungu subelebelenge; kai lebe lai lri suete ku wadrengedrengere iniane ku lingau.

⁴ Ku Twaumase mailuku ku ledra ki lrikace; ku thelare lri twalai ki alrimaini, twalai kudra ki kai adredrelane ka sapukwane ka alrimaini paledra.

⁵ Ikai cucubungu iniane yakai ku swalrubu ka caemane; ikai lrilrikudru iniane yakai ku apacadhane.

⁶ Ku Twaumase sana idrengere, kai kadaengane lri ngiveleevele; ku Twaumase sana lengethe, lri manugiligili sanaka kuni. Ku makecenge palralrawthu ka lalregelrege lri aegacane; ku yakai palralrawthu ku lalrelrelrege lri kabengathe; kikai yai natadadavacanengaini patuelre kunadruma.

⁷ Wadrelaku ki swa Kusange ka umawmase ka mwakulukuludru, ku swa Midiange ka umawmase la manugiligiligili.

⁸ Tamatama, amani kai kadravane ka pakagirimucu muswane? Amani kai laveke ku pakalisi muswane? Ngwakaisu ki ememe kainganai; ku ememe amani ku sakikaruburanesu ka palridingi. Paakacisu ku takikaruburane ki kawkawlusu.

⁹ Wabilakacesu ku bu, padulru ku alrailane; ku kadravanesu paegacane ki kadaengane.

¹⁰ Kai lalregelrege sa drele muswane manwagiligili; ku acilai la twalai belenge gugu. Kai yalebe ki kadaengane ku acilai la ngiburai, ngibikabiki ku tangiberadhane.

¹¹ Ku ridarane ku lrailisu sa katwase, ku walikalikathe ku idirisu sa lribate, ku vai si dramare makitua idrengere.

¹² Yakaisu ki elathane talakadre ki kawmasane; yakaisu ki lisiane dredre sanaka kuni.

¹³ Matwasesu palribulu ki kawkawlusu, palribulusu ki pilrisu ka talialalai. Patwabakebakesu ki tarasangililuku ki manganga ka umawmase, si pakamudu kudra ki papapalraini.

¹⁴ Kudra kwapingini sa mia ki umuku si pasarau naiane, mia ki amani kudra kiabububuli tusinalreme ki matiakukuru ka umawmase lelelepenge naiane, ku lrailisu palreegese ki tamatama ki kwapingi lini.

¹⁵ Ngwakaisu ki rigi si dredre ki laveke. Ku acilai la ngibwaburai.

¹⁶ Sa kilalraku kilakikai manwagiliigilaku; kai ngudwili ngwalai ki kiwcane si manutaketake. Kadrwanga ku puku kai alrima si drapaleli; walridrawdrawnga naku ku tadadavacaneli. Lri isaselebanaku ukalava kudra akelane kwini ki zikange, lukamaninga kwidra ku Twaumase lri pathavungu kwini ki kiakaruburu naiane.

¹⁷ Adravane kai pumadru ku icizike ka angatu, la kakadrwa ku madru ki budu ka cebe; adravane kai pumadru ku ulrive ka angatu, la kai cebe ku taleke ki angangade; adravane pacainga patuelre ku lakiu, la ka kadrwanga ku lwange ki talwangane;

¹⁸ Lri tusakamiyaku ngwalai ki Tamatama si kiraragai, ngwalai ki Twaumase ka Takipalribulribulaneli si kiraragai.

¹⁹ Ku abebeelengenga ka Tamatama wabaai nakwane ku puku. Wamalra nakwane tungimiyaiya ki thadi pakapapedrenge ku tapudrapalane; si pakapapedrenge nakwane ku tadadavacaneli ikai ki abelenge ka lregelrege.