Habakuke 2 - Ngudradreadrekadhane Ka Sisiu 魯凱語聖經

Ku Tamatama twabalre ki Habakuke

¹ Lri kapaku mwa palralramathane, si drele ukalava lukamanemane ku aiyane nakwane ki Tamatama, la drele iniane lulri tumanaiya tubalre ku tasidrurwaneli.

² Ku Tamatama la tubalre nakwane iya kai, “Lri pacasesu pudriadriingai ku pelaelali muswane pikai ki labaali, sana drele ku umawmase lani makakaai dulru silrigu.

³ Kusu malra pacase, asi lwiyane kudra lrika angimiane ka vai kaiyana wakeela. Ai lri padaalrunga si kela ku vai, ku pelaelali muswane lri padaalrunga si ngimia. Ani ngiabalainga alau lri iyasu, ai mukalavaa, lri tara ngimiya, si lai lri kai pwigananenga.

⁴ Amani kikai ku pelaelali muswane ka vaga, ‘Ku manganganga ka umawmase lri kai maka panianiake, ai ku madringelrese ka umawmase lri ngwalai ku tapakaelreeane ku salrwane si tarumara ku niake.’ ”

Ku kai madringelrese ku umawmase lri kimwa ku amatikurwane

⁵ Kai tacekecekelane kaika asudralrwalrwane. Ku marau ka umawmase ngiakalrilrigu, kai maka yasaselebe, mia ki wapacai, palralrawthu kai ngulwalwadhane. Kwi lalasu pamalebenga ki vaeva ka kuni la pamaleebenga ki vaeva ka kuni, ala yakai kai ku tatwaladhane.

⁶ Kudra kiapamalebe ku laumawmase lri pusu liniane, si kaelaelathe liniane iya kai, “Wamalra numi ku lamanemane ki palrapalra si ngitatu lamanemane, lri kimwa numi ku amatikurwane! Ku satalu numi malra ku kiame si satacekecekelane lri pakela numi lwigane?”

⁷ Lu kaisu thingathingale, kusu ka pamalebe ki palrapalra ka umawmase lri kamaningasu ku akiame, si lai lri kivutha pamukiame ku makaakalra ku lalake. Ku badha lri kela upungu muswane; si bulathe muswane.

⁸ Nawaravasengasu ki takaalra ka kuni, kaiasasane kudra laabalu ku umawmase lri ravase muswane; asi lwiyane papacaisu ki umawmase, la pakwalrisu ki umawmase kawmasane si lacekele lini.

⁹ Kiamwangasu ki amatikurwane! Arakaisu ku tabulathanesu si pangiradhekane ki daanesu. La pikai ki taabelengane tulisisuku pakai ku auberane ki matikurwane.

¹⁰ Ai kwi lrigilanesu papia ki ngialisiane lri kamani ku pakiarubwane papia ki daanesu. Pakamudusu ki taikalrane ka kuni ka laumawmase, la ngidadawdawlu ku akamudane.

¹¹ Adravane ka balingibingi ka lrenege lri karaleale kikaruburu muswane, lri mialri iya kwini karaleale ku bulri ki daane.

¹² Kiamwangasu ki amatikurwane! Arakaisu ku pasalrivane tucekele, la arakaisu ku apapacadhane si cegecege ku cekele.

¹³ Ku nasakwalrialrisu pamalebe ki laumawmase si takisamulamulanesu kadrwanga ku paluludane; ku tudaane lini kwalama patueelre. Kikai yai tapiane ki Tamatama ka abebeelengenga ki sanaka kwapingi.

¹⁴ Ai, kai kawmasane lri kitulrepenge ku tathingalane patharukai ku lrigu ki Tamatama, mia ki laveke ka swaete ku acilai.

¹⁵ Kiamwangasu ku amatikurwane! Ikai ki elathanesu twasinalremesu ki pasiagiagisisu; la malrasu liniane palridrawdrawdrau mia ki mabusuku ka umawmase.

¹⁶ Lai lri mialrisu ka akiarubwananenga, kawlrawnga ku lrigu. Lri ngwalaisu ki busukane lridrawdrawdrawnga dadavace. Ku Tamatama lri paungulu ku sakipathavunganesu ku kupu; ku lrigusu lri akabalrithi ka akiarubwaananenga.

¹⁷ Wacalrigisu ku angatungatu ka Lebanungu, kikainga lri kicalrigisu. Papacaisu ku lawaudriwdripi ki yakai angatungatu, kikainga lri kukuludrunga muswane kai lawaudriwdripi. Kikai yai lai tara ngimiya; asi lwiyane papacaisu ki umawmase, la pakwalrisu ki umawmase kawmasane si lacekele lini.

¹⁸ Manemane ku paluludane ki samiamiange? Kwini pia ki umawmase; kathane ku atavuvulrucane, kai maka kawariva ku maneemanenga. Ku amani ku paiya iniane ku umawmase masalru iniane, yakai ku manemane ku akaesadhane? Adravane ka akawrivaane kai maka avavaga!

¹⁹ Kiamwangasu ku amatikurwane! Amiasu kai ki angatu, “Pacuna!” La iyasu kai ki lrenege, “Ngidrakaala!” Ku samiamiange lri dulru pelaela muswane ku manemane? Alau niarakaiyane ku kingi ku gingi cabu iniane, ai ku adringini kadrwa ku niake.

²⁰ Ku Tamatama yakai ki daaneini; kikai yakai kawmasane sanaka umawmase isaselebana icucubungu iniane.