Galatia 5 - Ngudradreadrekadhane Ka Sisiu 魯凱語聖經

Angilralraingane ki Kirisite

¹ Pakai ku angilralrainganeta, ku Kirisitu ngwakerengenga mitane. Lakamani, kunumi yai bicakana kwi tuku numi, kwi tikungu ki duri ani kai ruthukunga numiane.

² Kwaku ka Pawru lri pudriadriingadhaku pelaela numiane, alaiyasi kitulrisi numi kigelregelre, ku Kirisitu papia numiane kadrwa ku akaesadhane.

³ Kaiasasane lri pelana naku pakipapawlringau numiane, sanaka aneanenga ku kiatulrisi kigelregelre ku umawmase lri tara paluludu ki hulrice patuelre.

⁴ Ku kiasanu satalu ku apaluludane ki hulrice si kikadalru ki Twaumase ku umawmase amani ku malretakenga ku tamacacapilane ki Kirisitu. Ka ngiapapakamudu ku migemi ki Twaumase.

⁵ Ala kuta yai, sataluta ki Siri, ngwakaita ki salrwane, si sidramadrama ki Twaumase kulri pakakadalru mitane iniane. Kikai yai puku ki Siri la ngukai ki salrwaneta si pangimia.

⁶ Asi lwiyane lu ikaita adringi ki niake ki Yesu Kirisitu, ku kiatulrisi kigelregelre ku kai kiatulrisi kigelregelre kai lri katumane; kathane kwidra arakai ku sakialibake ngivelevele si paathingalane ku salrwane kamani ku makucingalre.

⁷ Takatharirane ku tapangimiane numi! Aneeanenga ku watelenge numiane si kainu palululudunga ku patengane ka sabulrwane?

⁸ Kikai amiamia kai pasapukwane numiane kaika amani kudra wadawlu numiane ka Twaumase.

⁹ Yakai kudra vaga ku amia kai, “Ku tikiyane ku sapawsemasemakane wadulru pawsemake ki nilrevegane ku milrikinku patuelre.”

¹⁰ Ai kiapawteengana naku numiane, asi lwiyane taelreta ikai adringi ki niake ki Tamatama, masalrwaku numiane kai numi lri kikaela kai ki takidremedremaneli. Ai kudra walrithavulu numiane, adravane ka aneane, lri kipathavungu ki Twaumase!

¹¹ Laretesane, alaiyasi pacungulwana naku pasalraelre pelaela ku akitulrisane kigelregelre, anau kihakeegaiyana? Lu piaku kikai, adravane pelaelaelaku ku ziwzika ki Kirisitu nai kai asatelengane liniane.

¹² Naika maesaesai ana ngitatuminwalra kamani kwini la walrithavuthavulu numiane!

¹³ Laretesane, ku Twaumase wapilri numiane, ani kamani ku ngialralraingi ka umawmase amia numiane. Ai madha arakaikai kikai angilralraingane si tusarakaiyane pangilralraingi ki murikaiyane ki kinawmasane, arakaiya ku sakialibake si mapasikaikai.

¹⁴ Asi lwiyane kai hulrice patuelre waelrelre ikai ki “Akilibakane ki umawmase mia lu ngikakilibake” kikai ki drekase adringi.

¹⁵ Dradreela alaiyasi ka miyaiya numi ki waudriwdripi makakakace, lri tara kamudu numi maramaramau!

Siri si takaumawmasane ki umawmase

¹⁶ Ku lrika atukucingalraneanali yai: Pasalaladha ku taarakane ki Siri, madha ngulwalwadhane ku murikaiyane ki kinawmasanesu.

¹⁷ Asi lwiyane ku murikaiyane ki kinawmasane makakabadha ki Siri, tara maulrudru, lai kai numi maka dulru pia ku nau pia iyaiya numi.

¹⁸ Ai, alaiyasi arake ku Siri numiane, kai numi lri kiruthukunga ki hulrice.

¹⁹ Ku murikaiyane ki kinawmasane ki umawmase yataluvaivai kadwai adrelane; pwataluvaivai ikai ki wacapange ki sawvalai si ababai, makudrulru ku tangivelevelane, kai makalecege ku takatwatwasane,

²⁰ wasukubu ki samiamiange, waivivigi, kiatubadha, ribicane, pathalra ka lisiane, girimucane, ngipapakaesadhane, makitulrilrigane, makiatukwakudha ku tairubwane,

²¹ pathalrane, mabubusuku, pasialribate ku tangiakaneanane, si ku drumane ku la ngimiyaiya kai. Kunadruma pakiapapawlringaunga naku numiane, kaiasasane lai pakipapawlringaunga naku numiane: Ku paiya kilakikai ku umawmase lutuumane kai lri maka aumawmase ki kuni ki Twaumase.

²² Pangukai ku madru ki Siri, amani kai: sakialibake, sakiaragai, rathudane, sakiadiadili, kalithane, tharirane, patengatengane,

²³ sulrapelane, ngiraruthukane. Kilakikai kadrwa ku lahulrice ku lri paisadra.

²⁴ Kudra la swakainga ki Yesu Kirisitu ku umawmase, wakedrekedrenga pikai ki ziwzika patuelre ku ngialisiane ku takidremedremane pangukai ki beate lini.

²⁵ Kudra wabaainga ku Siri mitane ku bavane ka niake, la tapakamani iniane ililuku ki tapanianianiakaneta.

²⁶ Takai ngikalrilrigu, mapakalilisi, mapathathalra.