Galatia 4 - Ngudradreadrekadhane Ka Sisiu 魯凱語聖經

¹ Yakaiyana, kudra kaiyana pucacugane ka lalake ka lri ucungulu ki tamaini ku tacekecekelane, adravane ka iniane patueelre ku tacekecekelane, kadrwa ku tamakakaelane ki duri.

² Sakavavalakeana, yakai ku siarapale iniane, si atalingikaiyane iniane marasikai ki awngane, pakela ku takelane ku kelrete ki tamaini ku vai.

³ Laka thadalrane, luka vavalakeanata ku takisuswane, kiamarasikaita ki ngwalepawngane kwidra ki ri ki latariau.

⁴ Ai sadarurunga ku takelretane ku vai, ku Twaumase siakawlu ki Lalakeini, si kitulalake ki ababai si panianianiake itailebe ki hulrice,

⁵ pakai ku apalribulane ki yatailebeane ki hulrice panianianiake ka umawmase, si ka alalalakengata ki Twaumase.

⁶ Asi lwiyane kuta lalalakengata iniane, ku Twaumase la sikawlu ki Ri ki Lalakeini si mwadringi ki kidremedremeta, la tawtau iya kai, “Ama! Ka Tamali!”

⁷ Laka miyaiya kai, kaisu ka duringa, lalakengasu, kudra lalakengasu ki Twaumase, ku Twaumase lri pakamaninga muswane ku lri ucungulu.

Ku Pawru makalithi ki swa Galatia

⁸ Kunadruma kai numi wathingale ki Twaumase, kiatuduri numi kwidra ki kaika twaumase ka lasamiamiange.

⁹ Kikainga wathingalenga numi ki Twaumase (ku amia kai, kiathingalenga ki Twaumase), anu kisanu katuasenga siwlri silape kwidra ki kadrwa ku puku ka ri ki latariau? Anu kisanu tupelanga mwa si aduri liniane?

¹⁰ Laka tapaluludane numi kwidra ki taingeane ka vai ka dramare, ka lrisi, ka caili!

¹¹ Matelrege kai kidremedremeli numiane, makalithaku ku siaswalane sa ikaiyaku numiane ku takaunganeli lu avutha patuelre.

¹² Laretesane, lri pakipapawlringavaku numiane, ngialralrava mia nakwane, asi lwiyane miyaiyaku numiane. Kadrwa ku tapasalrivane numi nakwane.

¹³ Wathingale numi, asi lwiyane ngwalai ki caemaneli, ala kamani ku ikai ku tadindwaneli numiane pathagili.

¹⁴ Adravane ka wavangavange numiane kai caemaneli, ai kai numi taupungu nakwane, si cilri nakwane. Ngiabaalrelringa numi si tarumara kilibake nakwane, mia ki tarwamara pasudalru ki sasiakawlu ki Twaumase, mia ki tarwamara pasudalru ki Yesu Kirisitu.

¹⁵ Sakamani kwidra kiaragai numi turamuru, la ngitumanenga numi kaiasasane? Lri dulrwaku iya kikai, sakamani kwidra, adravane malra numi garirungu kwi maca numi si baai nakwane nai ubangalre numi.

¹⁶ Kaiasasane pasingiakidremedremaku pelaela numiane, lai ngibalre si abadhaku numiane?

¹⁷ Kwini laumawmase paathingalane ku parakane numiane, ai kaika mathariri ku takidremedremane. Kwidra pacugane lini yai lri puthili patangeangea nakwane, pakai ku lrika apangimiane numi parake papia liniane.

¹⁸ Lu kisamulane ikai ki mathariri ka awngane yai mathariri, ai madha ka kathane lu taelreta ku apiane kikai.

¹⁹ Lavalake! Lri peelana naku kwalri pasikai numiane mia ki tina ku takiangeangane sa tulalake, pakela ku tangidarepane ku tawkalrivilane ku tangimiamiane ki Kirisitu ikai ki niake numi.

²⁰ Apia ikaiyaku numiane kaiasasane, si arakainga ku maelane ku apangimiane pasudalru numiane. Ngwalai numiane, kai masulivalivate kai kidremedremeli!

Arakai ki Hagare si Sara pelaela

²¹ Lri kivagaku papia kwidra la pasana panianianiake ikai ki hulrice ku umawmase: Kai numi kialalra ku hulrice ki Musi?

²² Amia kai pacase ku hulrice, tadrusa ku lalake ki Aberahame, ku tangea twalai ki duri ka ababai kitulalake, ku tangea laka twalai ki ngialralraingi ka ababai kitulalake.

²³ Ku twalai ki duri ka ababai kitulalake yai patwapapalra ku tatulalalakane kitulalake; ku twalai ki ngialralraingi ka ababai kitulalake laka twalai ki tapukawnane ki Twaumase.

²⁴ Kikai lri kai katumane arakai ku patharevane: Kwini tadrusa ka ababai amani kwini drusa ka sakiketeketane. Ikai kwini ku tangea yai Hagare, kai alisu twalai Sinai lregelrege, ku nitulalakane duri makanaelre.

²⁵ Hagare lu iya amani ki yakai Arabia ka Sinai lregelrege, ka maru amaaninga kaikameane ka Yerusalrime, kwi alisu si lalalakeini ku tapanianianiakane lini yakai ki duri.

²⁶ Ai kudra yabelenge ka Yerusalrime yai ngialralraingi, amani ku tinaita.

²⁷ Asi lwiyane kai Sisiu amia kai pacase: Kudra kai maka katawbaliri, kaiyana twalalake ka ababai, kiraragadha! Kudra kaiyana kiangeange ki atulalakane ka ababai, akwadrava kiraragai! Asi lwiyane ku kiakasekelrame si kai kipulringalringau ku ababai, lrika makaakalra ku lalalakeini ki maikai ki taelrelreini cekecekecekele ka ababai!

²⁸ Laretesane, mararaamau ki Isake, kunumi ngwalai numi ku pukawnu ki Twaumase si alalalake iniane.

²⁹ Sakamani kwidra, kudra ngiamia ki tatulalalakane si kitulalake wahakegai kwidra ki kiatulalake ki Siri; kaiasasane laka miyaiya.

³⁰ Ai kai Sisiu la tumanaiya? Amia kai, “Pakatwasa kwini ki duri ka ababai si lalakeini, asi lwiyane ku lalake ki duri ka ababai si tulalake ki ngialralraingi ka kataelrelreane ka ababai kai lri dulru tara mucungulu ku tacekecekelane.”

³¹ Lakamani, laretesane, kaita ka lalalake ki duri ka ababai, kiatulalaketa ki ngialralraingi ka kataelrelreane ka ababai.