Galatia 2 - Ngudradreadrekadhane Ka Sisiu 魯凱語聖經Ku Pawru kia kitarumara ki drumane ka lanisikawlane 1 Satara 14 ka caili, kwaku si Barenabase siwlri nai mwa Yerusalrime, la ililuku nai ki Titu. 2 Ku mwali Yerusalrime yai singiakaiyaku ku tapelaelane ki Tamatama. Sa tarungeangeaku kikawriva kwidra ki kiathingathingale ka lakiacapili, peaelaelaku liniane ku taikaiyaneli ki sakamaelanane ka umawmase pelaelaela ku hukuingi. Kainaku palraingi ku natakaunganeli si kaunguli kaikameane mucilri kawlrau. 3 Kai twapapalra nakwane ka Titu, unu swa Gurike, la kai kiavutha tarumara ku lrisi ki akigelregelrane. 4 Ai yakai kwidra ngiaka retetesane ku kiabubuli mwa kipaelre kiwkai si tarumara ku akigelregelrane iyaiya iniane, kikai laumawmase mia ki amani kwidra tara kibububuli kilalalra ki maneemanenga ka kaiyanganai mudaane, lri kibubuli dredrele mitane ka ngwalai ku takisuswane ki Yesu Kirisitu si kisupisupilri ki angilralraingane, pakai ku atuduriane naiane. 5 Ai, ngwalai ku apasikaiyane numiane pikai kikai patengane ka sabulrwane ka hukuingi, lri kai nai kalrupi kai ki miyaiya kai ki umawmase. 6 Ai, kudra la kiamatikaikai kipusamalramalra ka taramasasangililuku (kai lalasu ku abelenge ku alebe lini, kainaku twamanemane, asi lwiyane ku Twaumase kailri singikai ki tacebeaneini si drele ki umawmase), amiaku kai, kwidra la kiamatikaikai kipusamalramalra ku umawmase kadrwa ku bavane ku pelaela lini nakwane. 7 Ngiabaalrelringa kamani, kwi lalasu wadrele ki Twaumase sabaai nakwane kai awngane ka apelaelane ku hukuingi ki sakamaelanane ka umawmase, mararaamau sabaai ku awngane ki Pitiru ku apelaelane ku hukuingi ki swa Yuda. 8 Asi lwiyane, ku Twaumase arakai ku pukuini si kamaninga naku ka nisikawlane ikai ki sakamaelanane ka umawmase, mia ki Pitiru kamani ku nisikawlane ikai ki swa Yuda. 9 Ku Yakubu, Pitiru, Yuhani, ka tatulru ka ulrudru ki kiwkai, kudra wathingalenga ki Twaumase ka pawakalrivili baai nakwane kikai maelane ka awngane, la gemegeme ku alrimali si Barenabase, kudra taelrenga nai kawaungu, la palrainginga nai: Kunaku si Barenabase lri mwa nai ki sakamaelanane ka umawmase kaungu, kwi lalasu la ikai ki swa Yuda kawaungu. 10 Kai lalasu kiatubi si kakathane ku apulringavane nai ku urikai ki yakai Yerusalrime ku lamatiakukuru ka umawmase. Ki kikai awngane amani ku kisamulamulali pia. Ku Pawru yakai Anetiuke kaelaela ki Pitiru 11 Sakabilrilanenga, ku Pitiru la kela Anetiuke; asi lwiyane yakai ku athingaalane ku pasalriuini, la picucubungaku kaelaela iniane. 12 Ku natangimiane, sakaiyana daruru ku pakatwase sikawlu ki Yakubu, ku Pitiru wakane taelre ki sakamaelanane ka umawmase. Ai kwini laumawmase sa kela, kai lasu mwabere, si ukuludru kalringulu liniane, asi lwiyane mwakuludru kwidra ki la lri tara kitulrisi kigelregelre kai sakamaelanane ka umawmase amiamia ka umawmase. 13 Kudra drumane ka swa Yuda ka sinzia la mialri tupapalra ki Pitiru, mia ki amani kwidra kadrwa ku tasingikaiyane ku kakudhane ka umawmase, adravane kai Barenabase lakiasangililukunga liniane. 14 Sadreelaku liniane ka kai pangiamiamia ki hukuingi ka patengane ka sabulrwane, la icucubungaku ki laumawmase iya kai ki Pitiru, “Swa Yudasu ka umawmase, ai kwi sikacesu mia ki sakamaelanane ka umawmase, kai ngiamia ki swa Yuda. Lukamiyaiya kai, asu kiriimu vutha ki sakamaelanane ka umawmase patupapalra ki sikace ki swa Yuda?” Kai swa Yuda si sakamaelanane ka umawmase makitwa kasalrunga si kipalribulu 15 Tengane, kuta sa kitulalaketa swa Yudata, kaita ka sakamaelanane ka mapasaisalriu. 16 Ai, wathingaleta, ku umawmase lu kikadalru ki Twaumase yai ngwakai ki salrwaneini ki Yesu Kirisitu, kaika singiakai ku tapaluludane ku hulrice ki Musi. Kuta la kasalruta ki Yesu Kirisitu. Pakai ku akasalrwane ki Kirisitu si makakathariri ki Twaumase, kaika satalu ku apaluludane ki hulrice. Asi lwiyane kadrwa ku umawmase ku wadulru singikai ku paluluduini ki tinukakudhanane si kikadalru ki Twaumase. 17 Miyaiya kai, alaiyasi kuta ka la kiasilasilape ki ngwalai ki salrwane ki Kirisitu si kikadalru ki Twaumase ka umawmase la mararaamawanata ki sakamaelanane ka umawmase, ka pasalrisalriu makanaelre ka umawmase, kikai ku Kirisitu la paralubu ki pasalrivane miidra? Ini kai ngiamia kwini! 18 Asi lwiyane, alaiyasi apapelaelaku cegecege ku burukungali, amani ku sapelaelane ka mabebetethaku ki hulrice. 19 Ngukai ki hulrice, wapacainga naku, ka kiapapacai ki hulrice, pakai ku adulrwaneli pasikai ki Twaumase panianiake. Taelrenga naku ki Kirisitu kipakedrekedre ikai ki ziwzika, 20 lakamani, kikai panianianiakeli kainaku ka amaninga, amaninga ku Kirisitu ka yakai ki niakeli adringi panianianiake. Ku panianiakeli kikai, ngwalai ku salrwane ki Lalake ki Twaumase si panianiake, ku Kirisitu madalame nakwane si pasiakai nakwane cilri ku niakeini. 21 Lri kainaku pasiwlri ku migemi ki Twaumase. Alaiyasi kai umawmase la dulru satalu ku hulrice si kikadalru ki Twaumase, ku Kirisitu la kaika avutha pacai? |