Galatia 1 - Ngudradreadrekadhane Ka Sisiu 魯凱語聖經

¹ Amaniaku ku nisikawlane ka Pawru, ku takisikawlaneli kaika umawmase ku wapilri, la kaika nisudralrwane ki umawmase, amani ku Yesu Kirisitu si kudra amani ku patwalai ki wapacai pasiela papanianiake iniane ka Tama ka Twaumase ka siakawlu.

² Kwaku si taelre nakwane ka lasinzia ka watigami baai ki lakiwkai ki swa Galatia.

³ Ku Tamaita ka Twaumase si Tamatama ka Yesu Kirisitu ani baai numiane ku migemi, ku sulivatane!

⁴ Ku Kirisitu ngwalai ku apalribulane mitane si pakidaili kai ki ngialisiane ka zidai, la pangimia ku takidremedremane ki Tamaita ka Twaumase, pasikai ki pasalrivaneta ngipapatarumara.

⁵ Ku lrigu ani papia ki Twaumase pakeela lu palralrawlrawthu! Amingi.

Kathane ka hukuingi

⁶ Ngiatulukaku! Ku tapakadwadhane numi katwase ki Twaumase kamani ku pangwakai ku migemi ki Kirisitu si pilri numiane, si katwase numi tupapalra ki maelane ka hukuingi.

⁷ Ku patengatengane, kadrwa ku drumane ku hukuingi. Lu iyaku kai kawriva, amani saikai ku umawmase ku kaiyanganai si vangavangavange numiane, kiasanu pakabalribalrithi ku hukuingi ki Kirisitu.

⁸ Ku patengatengane anika aneaneane, adravaneta, adravane ka twalai belenge kainganai ka sasiakawlu, alaiyasi pelaelaela numiane ku maelane ka hukuingi, ka makakaela ku pelaela nai numiane ku paswalala, kwi lasu lri kipusu!

⁹ Amianga nai, kaiasasane lai lri peelanga naku pelaela: Adravane ka aneane alaiyasi pelaela numiane ku maelane ku hukuingi, si ka makakaela ku tarumara numi ku paswalala, kwi lasu lri kipusu!

¹⁰ Lu iyaku kai kawriva pakaiyaku ku akilrigwaneli ki umawmase? Ini! Ku urikaili yai akilrilrigwane ki Twaumase! Nau kikadalame ki umawmase amiaku? Alaiyasi nau kikadalame ki umawmase iyaku, kainaku ka sasiakawlunga ki Kirisitu.

Watumane si anisikawlane ku Pawru

¹¹ Laretesane, ani thingale amiaku numiane, kai pelaelaelali kai hukuingi kaika kidremedreme ki umawmase.

¹² Kadrwa ku patwalaili ki naneeanenga tarumara kikai hukuingi, la kainaku kibulru ki naneeanenga, amani ku Yesu Kirisitu ka ngiakakamani pelaela nakwane.

¹³ Kunadruma kai takaumawmasaneli sa kisususwanaku ki Yudaiyakiu, ku takaumawmasaneli wathingale numi patuelre. Kadrwa ku kalithaneli twalilisiaku ki kiwkai ki Twaumase, si kabebetethe iniane.

¹⁴ Ikai ki silasilanganeli ki swa Yuda ka umawmase walribataku ki palrapalra ka mapaluluuludunga ku tinukakudhanane ki swa Yuda, ka makisamwamulanga paluludu ku nipawsururane ku sabulrwane ki cucungulane.

¹⁵ Ai ngwalai ku migemi ki Twaumase sa kainaku kitulalakeana wapilriinga nakwane. Si dawlu nakwane ku apasikaiyane iniane.

¹⁶ Sa lri pelaelanga nakwane ki Lalakeini, si lri ikaiyaku ki sakamaelanane ka umawmase pelaela ku pangukai ki Kirisitu ku hukuingi yai, kainaku kiabulru ki naneanenga ki umawmase,

¹⁷ la kainaku mwa Yerusalrime si kikawriva kudra ki la aswalalala nakwane kisikawlu ku umawmase, makakaiyaku katwase mwa Arabia, ala siwlriaku mu Damasekuse.

¹⁸ Sa taratulrunga ka caili ala mwaku Yerusalrime kikawriva ki Pitiru, si taelre ikai iniane maka 15 ka vai.

¹⁹ Kathane ku betakane ki Tamatama ka Yakubu, kadrwa ku drumane ku kikawrivali ku nisikawlane.

²⁰ Kai iyali tengatengane patuelre, ikai cucubungu ki Twaumase, kainaku wadraedrangelre.

²¹ Sakabilrilinga la mwaku tali Siria si Cilikia.

²² Sakamani kwidra, kai swa Yuda ku Kirisite ki kiwkai kai wathingale nakwane.

²³ Kwi lalasu kialalra ku vaga ki palrapalra sikakathane ku amia kai, “Kudra natwalililisi kabebetethe mitane kunadruma, kikainga peaelaelaelanga kudra nakabebebetetheini ku takisuswane!”

²⁴ Lakamani, kai lalasu ngwalai nakwane si drengedrengere ki Twaumase!