Daniele 9 - Ngudradreadrekadhane Ka Sisiu 魯凱語聖經

Ku Daniele pasiakai ki sakacekele inulri

¹ Ku Dariuse ka swa Media ka lalake ki Ahasueruse warathudu Babilunia ka kuni.

² Ku aswalalanga ka caili ku taatalialaladhaneini, sialrigulrigwaku ki Sisiu, si kidredredreme ku tapelaelane ki Tamatama ki yuginsia ka Yerimia ku ngwakai ku atawlrakavane ki Yerusalrime taramapitulu ka caili.

³ Walaisaku, si silaimai ku kaimadhane, la nene ikai ki thuvugu, la cucubungu ki Tamatama ka Twaumase papiapia iniane inulri.

⁴ Papiaku ki Tamatama ka Twaumaseli inulri, pasikai ki sakacekeleli ngipapelaela ku pasalrivane. Amiaku kai, “Tamatama, madradraungasu ka Twaumase; mwasakene nai muswane. Pangiamiasu ku kiketeketesu, papiasu kudra ki lamadalame muswane, paluludu ku drekasesu ku umawmase pathingale ku palralrawthu kai akabalrithi ka sakialibake.

⁵ “Pasalriu nai pia ku ngialisiane, kaadrau turamuru ku tapasalrivane, baebalre ku padradrekasesu.

⁶ Ku sasiakawlusu, ka layuginsia, napangwakai ku naganesu si papia ki latalialalai nai, lawarathudu naiane, lacucungulane nai, si kuni palraelre kawriva; ai kai nai kialalra paluludu liniane.

⁷ Tamatama, ku tangivelevelanesu taaparamaramaavane, ai kai nai watelrai ngipapakiarubwane. Unu, kunai ka laumawmase ka yakaikai Yuda si Yerusalrime, si kudra lawabaebalrenga muswane, si kipaacaicali mwa adaili mwa adethe ki lakuni ka swa Iseraylri, ngwalai ku kaika takapatenganane papia muswane, si ngipapakiarubwane.

⁸ Tamatama, kunai, ku latalialalai nai, lawarathudu naiane, si lacucungulane nai pasaalriwnga makanaelre muswane, dawlu ku akiarubwanane.

⁹ Tamatama ka Twaumase nai, unu wabaebalrenga nai muswane, la kakalikaalithiananasu naiane, si pacepe naiane.

¹⁰ Tamatama ka Twaumase nai, pangwakaisu ki sasiakawlusu, ka layuginsia, papia naiane pelaela ku hulrice naiane; ai kai nai kialalra pasalaladha ku vagasu.

¹¹ Sanaka swa Iseraylri wabaebalrenga ki hulricesu makanaelre, kadrwa ku kialalra paluludu muswane. Pasaalriwnga nai muswane. Ngwalai kikai, kudra nipacasane pikai ki hungu ka hulrice ki sasiakawlusu ka Musi ku sapuswane wamwanga ki kinawmasane nai patuelre.

¹² Piakaisu ki kinawmasane nai si lawarathudu pangimia ku taiyanesu ku vaga. Ku tapathavunganesu ki Yerusalrime parawramuru ki tapathavunganesu ki sanaka cekele kawmasane;

¹³ Wamalrasu kudra nipacasane ikai ki hulrice ka hungu ki Musi patuelre ku sapathavungane si pulebe pikai ki kinawmasane nai patuelre. Ai, Tamatama ka Twaumase nai, pakeela kaiasasane, kai nai matwaseana kidaili ki pasalrivane, si paluludu ki patengane ka sabulrwanesu, si pakiragai muswane.

¹⁴ Tamatama ka Twaumase nai, napadulrungasu ku lrika apathavungane naiane; ku patengatengane, pathavungungasu naiane; asi lwiyane ku tangivelevelanesu taaparamaramaavane, ai kai nai maka kialalra paluludu muswane.

¹⁵ “Tamatama ka Twaumase nai, napadrelengasu ku maadrau ka puku, si ililuku ki kawkawlusu katwase Izipiti, ku naganesu pakeelanga kaikameane kiamapelaelaelana; la piapia nai ku ngialisiane si pasalriu!

¹⁶ Kunadruma napalribulungasu naiane, kaiasasane madha papiapia ki saniange ka lregelregesu ka Yerusalrime kalisi. Ngwalai ku tapasalrivane nai si tapiane ku ngialisiane ki cucungulane nai, kai la ngwadadethe ka lakuni twadrekase Yerusalrime si kawkawlusu.

¹⁷ Lakamani, Twaumase nai, kilalra kai inulri si kitubi ki sasiakawlusu. Pakai ku apathingalane ki umawmase ala ka Twaumasesu, paledra, si sirapaleana kudra kiakabebetethe ka Alrivilrivi ka daanesu.

¹⁸ Twaumase, kilalra kai kitubi nai! Kakalitha naiane si kudra yakai lebe ki naganesu ka cekele ku takipakwalrialriane! Ku kitubi nai muswane kai nai singiakai ku tapiane nai ku mathariri, singiakai nai ku maadrau ka kalithanesu.

¹⁹ Tamatama, kilalalra! Tamatama, pacepa! Tamatama, kilalalra si palribulu! Madha pwadaidailane, lani thingale sanaka umawmase ala ka Twaumasesu; asi lwiyane kikai cekele yai cekelesu, kilakikai umawmase yai kawkawlusu.”

Ku Gaberiele walalrwai ki maburusi

²⁰ Pacungulaku inulri, ngipapelaela ku pasalrivaneli si pasalrivane ki sakacekeleli ka swa Iseraylri, si la pasikaiyaku ki saniange ka lregelrege ki Twaumase papia ki Tamatama ka Twaumaseli kitubi.

²¹ Sa icengecengaku inulrinulri, kudra naadrelane ku paswalala ikai ki maburusili ka Gaberaile la kirarimu ngipalai mwa nakwane kai; kudra zikange yacengeecenge ka tapatarumaramarane ki maungane.

²² Ku Gaberiele pwadriadriingai pelaela nakwane, “Daniele, wakelaku papia muswane lalrwai, ku lrika aikaiyane ku lrigilanesu si dulru thingale.

²³ Sa pathagilisu papia ki Twaumase kitubi, palraingi muswane. Madalame muswane, lakamani ku kelali papia muswane pelaela kai vagaini. Kaiasasane kicacaligira kai alalrwadhaneli kwini maburusi:

²⁴ “Ku mapitulu ka pitu ka caili yai kelrete ki Twaumase ka lri palribulu ki sakacekelesu si saniange ka cekele kidaili ki pasalrivane ka zikange. Luka amani kwidra, ku Twaumase lri pacepe ki pasalrivane, si cegecege ku palralrawthu ka dringelresane, lalri ngimia utaluvaivai kwi maburusi si yugingi, ku daane ki Twaumase lai lri tupela patarumara.

²⁵ Thingala, si pulringalringau: Twalai ku tapelaelane ka drekase ku lrika atupelane ngiradhekane ki Yerusalrime pakeela ku tapilriane si mutaluvaivai ku tarasangililuku, ikai kwini ku angilribatane lri ka pitu ku pitu ka caili. Lri tupela tucekele Yerusalrime, yakai ku kadalranane ki cekele si makecenge ka kepale; lri kakeecenge ku 62 ka pitu ka caili, ai kwini amani ku lrika akwalriane.

²⁶ Lu ngilribatenga kikai, kudra pilri ki Twaumase ku tarasangililuku lri kivutha kipapacai; kikai cekele si daane ki Twaumase lri kikabebetethe ki lakwapingi ki tangea ka talialalai. Kikai angimiane lri ngimia ki lriau ka acilai kainganai lriau, lai malra iluku kudra padulru ki Twaumase ku amakaruruburane si akamudane.

²⁷ Kwini talialalai lri kitutalragi ki tapangale ka umawmase tarapitu ka caili, ai lu ngilribatenga ki apararamau kai ki nitarapitwane ka caili, kwi lasu lri pakaicilri ki umawmase patarumara ku lawaudriwdripi si lataleke. Luka amani kwidra, kudra ‘Lri amudu ka mativalracevace ka lamanemane’. Lri kipikai ki daane ki Twaumase ki taka abebelenganenga, lri kisuru pikai kwini, lri pakela kudra ki amani ku piakai kwini sarare ku umawmase lu kipadradresengenga kudra pasikai iniane ki Twaumase kelrete ka amatikurwane.”