Daniele 8 - Ngudradreadrekadhane Ka Sisiu 魯凱語聖經

Wadrele ku balase ka nikiubawbalane ka kiu, balase ka kakiuane

¹ Saka taratulru ka caili ku taatalialaladhane ki Bilesazare, wadrelaku ku sakadrusa ku maburusi.

² Ikai ki maburusi, ala kiarimwaku thingale ala ka yakaiyaku tali Ilame ka cekele Susa. Acegecegaku ikai thili kadravane Ulai,

³ si drele ku vaeva ku balase ka nikiubawbalane ka kiu, twalawngu tu drusa kaeelrenge, la acegecege ikai kwini, ku lawngu makakaela ku takalragiane, kwidra malrailragi ka lawngu yai tau cebecebe.

⁴ Wadrelaku kwini balase ka nikiubawbalane ka kiu arakai kwini lawngu si papia tali sapakalriwgu, tali dradha, tali lrawdru lalawngu iya; sanaka waudriwdripinga kai maka wadulru telenge iniane, la kai maka dulru mubere ki pukuini. Sanaka kiragaini nau pia kwini iya paiya, arwa pakilringalriingau ku ngikarakacanane.

⁵ Sa kidredredremaku manemane ku pacugane iyaiya, ala pangitutuluku ikai ku vaeva ka balase ka kiu twalai tali sapakalriwgu lailai kainganai, ku ridarane kai watakelakela cakena ku drapale. Kudra kabicelrakane ki macaini wacebe ku athingaalane ku lawngu.

⁶ Kwini la papia kudra paswalali drele kudra acegecege ikai thili ki vaalru ka balase ka nikiubawbalane ka kiu mwa ciwru.

⁷ Wadrelaku samwamwa lawngu ki balase ka nikiubawbalane ka kiu, la pangicaaeme lawngu iniane, si ngetele kudra drusa ku lawnguini. Kwini balase ka nikiubawbalane ka kiu kai maka wadulru kiecebe, la kisatasate pikai cakena, si kidredre, kadrwa ku umawmase ku wadulru palribulu iniane.

⁸ Kwidra balase ka kiu arwa ngikarakarakaacane; ai kudra pukuini sa icengeecenge, ku lawnguini mangetele. Ikai kwini ki natacebeane la ceebenga ku athingaalane ka supate ku lawngu, la makaelaeela ku tapapiane cebe.

⁹ Ikai kwini ki supate ka lawngu kudra ki vaeva ka lawngu la ceebenga ku vaeva ka tikiyane ku lawngu; kwini tikiyane ka lawngu papia tali lrawdru, tali talrawane, si nipukawnanenga ka kadaengane paru swadrau ku puku.

¹⁰ Kudra pukuini madrau ka lri dulru kikaruburu ki kwapingi belenge si latariau, si verevere kudra ki la drumane ki kwapingi belenge si tariau pwa kai lebe, la dredre iniane.

¹¹ Kwini lasu la kiecebeana ki amaanilringa ku tarasangililuku ki kwapingi belenge, si telenge ki laumawmase ku patarwamaramara iniane pivai, la kabebetethe ki daane ki Twaumase.

¹² Ku laumawmase yakai kwini pasalriu, lukakaiya la patarumara ku kaika apatarumarane, wacilri picakena ku patengane ka sabulrwane. Kikai tikiyane ka lawngu ku piapiaini patuelre masulialialivate.

¹³ Pacungulu, kialalraku ku tangea ku sasiakawlu belenge kiavaga ki tangea ka sasiakawlu belenge, “Kikai adrelane ikai ki maburusi kilakikai lri pacungulu pakela lwigane? Kudra mativalracevace ka pasalrivane mwabalrithinga ki naika apatarumarane luka vaivaivaai lri pakela lwigane? Kai kwapingi belenge si daane ki Twaumase lri pakela lwigane kidredredre?”

¹⁴ Kialalraku kudra ki sasiakawlu belenge sa tubalre, “Kilakikai lri pacungulu tara 1,150 ka vai. Ikai kikai, ku daane ki Twaumase kadrwa kulri patarumara ku sapatarumarane ki maungu si mialrealre. Lu ngilribatenga kikai, kai daane ki Twaumase ala lri siwlriwlriane kuna tangimiamiane ki siaswalane.”

Ku sasiakawlu belenge ka Gaberiele walalrwai ki maburusi

¹⁵ Sa icengecengaku apithingathingale kikai maburusi, ala pangiatutuluku ikai ku tangea ku acegecege icucubungu nakwane.

¹⁶ Kialalraku ku lingau ku watawtawtau twalai kadravane Ulai, “Gaberaile, papia iniane lalrwai kudra dreleini ku maburusi.”

¹⁷ Ku Gaberiele la kainganai mwa thili nakwane; makiwcaku, si guruthungane icakena. Kwi lasu amia kai nakwane, “Lri tara kawlrau ka umawmase, thingala kikai maburusi. Kai maburusi ngwakai ki satwalrepenge ki lrikisi.”

¹⁸ Kwi lasu sa kawrivariva, waguruthunganaku icakena, si kai pulringalringalringau. Ai kwi lasu wadrakale nakwane,

¹⁹ la iya kai nakwane, “Lri pelaelaku muswane ku lrika angimiane lu kalisi ku Twaumase; kikai maburusi ngwakai ki alikaiyane ki zikange.

²⁰ “Kudra drelesu ku drusa ku lawngu ka balase ka nikiubawbalane ka kiu yai amani ki Media si Perisia ka kuni.

²¹ Kudra balase ka kiu yai amani ki Gurike ka kuni, kudra kabicelrakane ki macaini kudra athingaalane ka lawngu yai amani ki aswalalanga ka talialalai.

²² Kudra sa kangetelenga kwini lawngu la ceebenga ku supate ka lawngu yai amani kikai kuni lri mawvagavagai mau supate ka kuni, ai kudra puku lini kai maka walribate ki siaswalane ka kuni.

²³ “Kilakikai kuni sa suetenga ku pasalrivane, yakai ku tangea ku mangaanga, matavuvulrucu ka talialalai ku lri utaluvaivai.

²⁴ Ku pukuini arwa swadradrau, ai kai satalu ki pukuini. Kwi lasu lrika amani ku lri amudu; sanaka tapianeini lri tara ngimiya. Kwi lasu lri amudu ki sapukuane ka umawmase si kawkawlu ki Twaumase.

²⁵ Asi lwiyane kwi lasu matavuvulrucu, lu tavuvulrucu ngiamiamia. Kwi lasu ngiakalrilrigu ngitatwadrau, lu kai pulringalringau ku umawmase wamwa kikaruburu, si amudu ki takaalra ki umawmase. Kwi lasu adravane ka talialalai ki sanaka talialalai kiaecebe, ai kwi lasu lukabilrilinga lri kiamudu ki walribate ka puku.

²⁶ Ki ngwakai ki sapatarumarane ki maungu si mialrealre ka maburusi papianga muswane lalrwai. Kikai maburusi lri tara ngimia; ai kaiasasane seketa maadha pelaelaela, asi lwiyane amanimani ki lukabibilrili kai taiyane.”

²⁷ Kai kidremedremeli ka Daniele maupungu, si kacaeme maka piale ki vai. Sakabilrili la ngidrakalaku, si mwa ki awnganeli, kaungu ku baai nakwane ki talialalai ku awngane; ai kiaupungaku kai ki maburusi, kai maka thingale ku pacucugane.