Daniele 7 - Ngudradreadrekadhane Ka Sisiu 魯凱語聖經

Ku Daniele peaelaela ku maburusi (Daniele 7.1–12.13) Wadrele ku supate ka maadrau ka waudriwdripi

^1-2 Saka aswalalanga ki caili ku taatalialaladhane ki swa Babilunia ki Bilesazare, yakai sakamaungu, kwaku ka Daniele la sipiaku ku vaeva, si drele ku maburusi. Kudra dreleli sakamaungu wapacasaku: Yakai ku valrigi ku twalai kidruanga kainganai, si valrigi ki laveke;

³ la ikai ku lamakaelaela ku tangimiane ka supate ku awlru ka maadrau ka waudriwdripi ku twalai ki laveke kainganai mubelenge.

⁴ Ku aswalalanga ka maadrau ka waudriwdripi mia ki raiyungu, ai yakaai ku supate ku sapakepake ki takanga. Sa icengecengaku dredredrele, ku paridini kiapurici; la kidrakale, si acegecege ikai cakena, mia ki umawmase; kwini waudriwdripi yakai ku lusu ki umawmase.

⁵ Ku mwasakadrusa ka maadrau ka waudriwdripi mia ki cumai, arakai ku lrilrikudru ku drapale acegecege; la tangadre ku tulru ku vigwa. La ikai ku lingau ku amia kai iniane, “Kanea, ngisasingikaiya kane kwini beate!”

⁶ Sa icengecengaku dredredrele, yakai ku maelane ka vaeva ka maadrau ka waudriwdripi ku mwataluvaivai. Mia ki lrikulau, ki drelrekeini yakai ku supate ku sapakepake, mia ki sapakepake ki adhadhame, laka supate ku awlru, lu drelane matiangeange.

⁷ Sa icengecengaku dredredrele, ku mwasakasupate ka maadrau ka waudriwdripi mwataluvaivai. La ngicaeme ku tacebeane matikikiwcu, kwini waudriwdripi arakai ku adreme ka valisi kace si baburau ki nipanane, ala arakai ku drapale dredre. Makakaela kudra ki aswalala ku tulru ka maadrau ka waudriwdripi, mangeale ku lawngu.

⁸ Sa icengecengaku dredredrele kilakikai lawngu, kudra kabicelrakane ki lalawngu wacebe ku tikiyane ka maelane ka lawngu; kikai tikiyane ka lawngu la malra patwalai ki mangeale ka sakwa ikaai ka lawngu akucu ngutulru. Kikai tikiyane ka lawngu yakai ku maca ki umawmase si vaeva ka twaadrau turamuru lu kawriva ka ngudwi.

Wadrele ku palralrawthu ikai

⁹ Sa icengecengaku dredredrele, wadrelaku ku piya ku nipikaiyane kwini ku taetalane. Kudra yakai palralrawthu wanene ikai kwini ki vaeva ki lataetalane. Ku laimaini mia ki pasabu ku bulane, ku isiu mia ki ubale ki kiu ku lrapungane. Ku taetalaneini yai wakelrakelrakelrabe ka apwi, swatelrai ikai belenge ki madrareeange ka apwi ka palridingi.

¹⁰ Kwi taetalane wakelrabe ku madrareeange ka apwi, mia ki mwalwaludru ka vaalru. Ku tathathatha ku laumawmase yakai cucubungu ki taetalane pasikaikai iniane; ku takaakalra ku umawmase acegecege ikai cucubungu iniane. Kwi lasu la kawriva pelaela ku asaibangane, si mubalrulu ku hungu ka ngwakai ki pasalrivane.

¹¹ Sa icengecengaku dredredrele, kialalrana naku kudra ki tikiyane ka lawngu sa kawrivariva twadradradrau. Sa lengethaku drele, ku mwasakasupate ka maadrau ka waudriwdripi kiapapacai, ku kinawmasane la kicilri pwa ki apwi kilama.

¹² Kudra drumane ku tulru ka maadrau ka waudriwdripi, kwi lalasu ku pukuini la kiribicinga, ai kiapalraingi panianiakeana ku kaika thaininunga ku zikange.

¹³ Ikai ki maungu ki maburusi, wadrelaku ku vaeva ku mia ki Lalake ki Umawmase, ngukakaikai ki ememe kainganai. Kwi lasu kiaililuku mucucubungu kudra ki palralrawthu ikai,

¹⁴ si tarumara ku puku, lrigu, si puku ki talialalai, ku lrika apasikaiyane kaungu iniane ki lakuni, zuku, si kawarivariva ku makaelaela ku vaga ka umawmase. Ku sarathudaneini lrika palralrawthu ikai; ku pukuini kadrwa ku taalikaiyane.

Walalrwai ki maburusi

¹⁵ Ku tadrelaneli kwini maburusi kwaalri kai kidremedremeli, si kai kasulivate turamuru.

¹⁶ Wadadavacaku mucucubungu ki tangeea ka taratupapapalra, si lalrwai nakwane kikai patueelre. Kwini lasu la pasikai nakwane lalrwai kikai maburusi.

¹⁷ Kwi lasu amia kai, “Kikai supate ka maadrau ka waudriwdripi yai amani kudra lri ikai kai kawmasane ngiradhekane ka taisupatane ka kuni.

¹⁸ Ai ku kawkawlu ki Abebeelengenga ka Twaumase lri tarumara ku kindri ki talialalai, lri ngipapikai kikai kindri ki talialalai, pakela lu palralrawlrawlrawthu.”

¹⁹ Apiathingalaku pulringalringau kudra ki mwasakasupate ka maadrau ka waudriwdripi, asi lwiyane kikai matiakiwcu ka makakaela kudra ki drumane ka tulru ka waudriwdripi. Kwini waudriwdripi arakai ku lriwlu ka kalesekesane adreme ka valisi kace baburau ki nipanane, ala ara drapale dradredre.

²⁰ La mialriaku apithingale ku pacugane kudra yakai belenge ki awlruini kudra mangeale ka lawngu si wacebe sakabilrilane ka tikiyane ka lawngu, la malra tuluthu kudra ki drumane ku tulru ka lawngu. Kwini tikiyane ka lawngu yakai ku maca si wadulru tuadrau lu kawriva ka ngudwi, athingalane ka matikikiwcu ki drumane ka lawngu.

²¹ Sa icengecengaku dredredrele, kwidra tikiyane ka lawngu si kawkawlu ki Twaumase la makakaruburu si pamalebe liniane.

²² Sakabilrilinga, la kela kudra yakai palralrawthu, si pusakai ki kawkawlu ki Abebeelengenga ka Twaumase. Ku atarumarane ki kawkawlu ki Twaumase ku kindri ki talialalai wakelanga.

²³ Kudra taratupapapalra la lalrwainga nakwane iya kai, “Kavai mwasakasupate ka maadrau ka waudriwdripi yai amani kudra lri ikai kai kawmasane ngiradhekane ka mwasakasupate ka kuni. Kwi lasu makakaela kudra ki drumane ka kuni, kwi lasu lri malra elreelrenga kai kawmasane, kabebetethe, cacwake kai ki kadaengane patueelre.

²⁴ Kudra mangeale ka lawngu yai amani kudra lri macucungulu rathudu ki kuni ka tamangeale ka latalialalai. Sakabilrilinga ku maelane ka tangeea ka talialalai lri ngidrakale, makakaela kudra ki siaswalane ka talialalai; kwi lasu lri balre ki tatulru ka talialalai.

²⁵ Kwi lasu lri palribate ku vaga, si kiecebe ki Abebeelengenga ka Twaumase, si tulilisi ki kawkawlu ki Twaumase. Kwi lasu kiadremedremedreme ku apakabalrithane ki lahulrice ki takisuswane si latatulrisilrisiane. Ku kawkawlu ki Twaumase lri kirathudu iniane taratulru ka caili si apararamau.

²⁶ Ala, ku tarasaibange ka belenge lri saibangenga, si malra ribici ku kindri ki sarathudaneini, la pakisaalru amudu iniane.

²⁷ Ku kawkawlu ki Abebeelengenga ka Twaumase lri tarumara ku puku ki kawmasane ki lakuni; ku kindri ki taatalialaladhane lini lri kai kaelanga, ku latararathudu ki kawmasane lai lri kauawngunga pasikai liniane, si pasalaladha liniane.”

²⁸ Ki kikai lri pakeakelanga kai. Kwaku ka Daniele, makiwcaku turamuru, si kasalese ku lringau. Kilakikai patuelre piakaiyaku ki kidremedreme.