Daniele 6 - Ngudradreadrekadhane Ka Sisiu 魯凱語聖經

Ku Daniele yakai ki taraiyungane ka lrubange

¹ Ku talialalai ka Dariuse wakelrete ku ta 120 ku siwciu ka amani ku marasiakaikai ki kuni lini.

² La kaika kathane kikai, kwi lasu la pakamaninga ki Daniele si drumane ka tadrusa ka amani ku wadrangalru kai ki lasiwciu, ku lrika apalakebane ku akaesadhane ki talialalai.

³ Kwi Daniele la makakaai athingalane ka silrialribate ki drumane ka marasiakaikai si lasiwciu. Ngwalai ku tamukalrivilane ku lrigilane, ku talialalai la kisanu pakamanimani iniane rathudu ki kuni.

⁴ Ngwalai kikai, kudra drumane ka taramarasikaikai si lasiwciu la raeratenge turamuru ku tapasalrivaneini ki takauawngane ikai ki ngwakai ki kuni, ai kai maka kiadringai, asi lwiyane ku Daniele twakapatengatengane matisudralru, ka kadrwa ku tapamamamane.

⁵ Kwini lalasu la madrekadrekase, “Lu pangukaaita ku takisuswaneini ki Daniele pwalrima, lutumane kaita lri maka kidringai ku atakaiyaneta kukusu iniane.”

⁶ Kwi lalasu ala madredresenge si mwa kikawriva ki talialalai, la iya kai iniane, “Talialalai ka Dariuse banzai!

⁷ Yakai nai ki kunisu kipuawngane ka lataramarasikaikai, siwciu, mwasakadrusa ki siwciu, si latabebelenge mapalrailraingi nai ku lrika apasalraelreanesu pelaela ku kaika apangimiane ka drekase, adravane ka aneane ka umawmase, ikai kai ki minaka matulrulane ka vai kai lri maka papia ki natwaumasenga inulri kitubi, kai lri maka papia ki naaneanenga ka umawmase kitubi ku namaneemanenga, kathane lu papia ki talialalai kitubi ku apalraingane. Ku aneane ku kai pangiamia kikai nipakaicilrane ka drekase, lri kiciilri pwa ki taraiyungane ka lrubange.

⁸ Talialalai ala pakatwasa pelaela pasalraelre kikai nipakaicilrane ka drekase, si puhange ku hangesu ka talialalai, lani ngimia. Lu singikaiyane ku hulrice ki Media si Perisia, ku miyaiya kai ku drekase kai lri dulrunga tupela.”

⁹ Ku talialalai ka Dariuse la puhange pikai ki apakatwasane ka drekase.

¹⁰ Ku Daniele sa kilalra ka pinuhangeanenga kwini apakatwasane kwi drekase, la katwase mutavanane. Ikai belenge ki daaneini yakai ku vaeva ku taikaikaiyane, ku lribange papia Yerusalrime. Ku Daniele la ikai ki nimuelebane ki lribange pidruru, la singikai ku tapiapiane ka twalrawngaini, lukakaiya kingitulrulu papia ki Twaumase kiaseasene si inulri.

¹¹ Ku badha ki Daniele la drele iniane sa papia ki Twaumase inulri,

¹² la katwase karededele mwa ki talialalai kukusu iniane. Kwi lalasu amia kai ki talialalai, “Talialalai, napakatwasengasu ku vaeva ku kaika apiane ka drekase, si tukakudhane adravane ka aneane ka umawmase, ikai ki minaka matulrulane ka vai kai lri maka papia ki sanaka twaumase inulri, kai lri papia ki naaneanenga ka umawmase kitubi ku manemane, kathane lu papia ki talialalai kitubi. Ku aneane ku pasalriu kikai kaika apiane ka drekase, lri kiciilri pwa ki taraiyungane ka lrubange.” Ku talialalai la iya kai, “Patengane, kikai yai vaeva ka nipelaelane ka drekase; lu singikaiyane ku hulrice ki Media si Perisia, kai lri maka tupelanga.”

¹³ Kwi lalasu la iya kai ki talialalai, “Kudra twalai Yuda kiravase ka Daniele, kwi lasu kai mwasakene ki talialalai, la kai pasalaladha ku pakatwase ki talialalai ku drekase, paiya ku tapiapiane kingitulrulu inulri ki vaivai.”

¹⁴ Ku talialalai sa kilalra kikai vaga la kwalri ku kidremedreme, si kidremeedreme ku apalribulane ki Daniele, awngu ku vai kidredredreme ku apangimiane, pakela ki miauawbu.

¹⁵ Sakabilrilinga kwidra laumawmase la karedeedelenga kainganai si iya kai ki talialalai, “Wathingalesu ka talialalai, lu singikaiyane ku hulrice ki Media si Perisia, ku pakatwasenga ki talialalai ku drekase yai kai lri maka tupelanga.”

¹⁶ Lakamani, ku talialalai la drekase, ku umawmase la mwa pwalra ki Daniele, si cilri puadringi ki taraiyungane ka lrubange. Ku talialalai la iya kai ki Daniele, “Ku sukusukubusu ka patengatengane ka Twaumase ani palribulu muswane.”

¹⁷ Kwini lrawlrawdru ki barungulu arakai ku vaeva ku lrenege celrepe; ku talialalai arakai ku hange ki talialalai si hange ki latabebelenge puhange ki sacelrepane, ku kaika adulrwanenga ki umawmase palribulu ki Daniele.

¹⁸ Ku talialalai samwa ki daaneini, kai maka masipelrenge taleare, la kai kane ku manemane, la kalrase ki peravane.

¹⁹ Sakaliare, ku talialalai ngiadrakaale, si kirariimu mwa ki taraiyungane ka lrubange.

²⁰ Ku talialalai samwa thili ki taraiyungane, la karacange si akwadrau kawriva, “Daniele, sasiakawlu ki palralrawthu panianiake ka Twaumase! Ku tuvaevasu kisusususu ka Twaumase kai palribulu muswane pakidaili ki langudwi ki laraiyungu?”

²¹ Ku Daniele la tubalre, “Talialalai banzai!

²² Ku Twaumase siakawlu ki sasiakawlu belenge kainganai tamenge ki ngudwi ki raiyungu, kikai laraiyungu la kai dulru kabebetethe nakwane. Ku tapiane kai ki Twaumase, wathingale nakwane ala ka kiavuthaku kitupasalriu, kadrwa ku navaevanga ku pasalriwli ki talialalai.”

²³ Ku talialalai la kiraraagai turamuru, la drekase ki twapapapalra malra palribulu ki Daniele. Kwi lalasu la malra bilibili ki Daniele patwalai ki lrubange, la drele iniane ka kadrwa ku takadulane ku natikiyanenga, asi lwiyane kai lasu swadralrwalru ki Twaumase.

²⁴ Sakabilrilinga, ku talialalai la drekase pwalra kudra wakukusu ki Daniele makanaelre, la malra liniane si lataelrelre lini, lalalake lini, si cilri pwa ki taraiyungane makanaelre. Kwi lalasu sakaiyana daruru cakena, ku raiyungu wakelaanga lredepe, si patalaculrale ututu liniane.

²⁵ Sangilribatenga kwini, ku talialalai ka Dariuse kawariva ki yakawmasane ki lakuni, zuku, si makaelaela ku vaga ka laumawmase: “Anu kasulivaliivate katharithariri ku kinawmasane!

²⁶ Kaiasasane lri drekasaku, ikai ki tarathudaneli ki latabebelenge ki kuni, lri tara musakene mukuludru ki Twaumase ki Daniele! Ku Twaumase palralrawthu panianiake ka Twaumase; ku Twaumase lrika palralrawthu rathudu. Ku lrekeme ki Twaumase lrika palralrawthu ikai; ku pukuini kadrwa ku taalikaiyane.

²⁷ Ku Twaumase palribulu, paralubu, ikai belenge si ikai lebe paiya ku pinangu Twaumasane ka puku ka matiasamaimali. Ku Twaumase palribulu ki Daniele pakidaili ki ngudwi ki raiyungu.”

²⁸ Twalainga kai, ku Daniele sa icengecenge rathurathudu ku Dariuse si tinuhika ki swa Perisia ka Sairuse masulivaliivate sanaka awngane.