Daniele 2 - Ngudradreadrekadhane Ka Sisiu 魯凱語聖經

Sipi ki Nibukadenezere

¹ Sa tara drusanga ka caili ku taatalialaladhane ki Nibukadenezere, kwi lasu wasipi ku vaeva; kwini sipi la pakawpungu ki kidremedremeini, si kai maka kasipelrenge.

² Ngwalai kikai, kwi lasu pakatwase ki umawmase dawlu ki latarakithingale ku angimiane, lataratulrisi, lataraivigi, lataraarakai ki tariau kithingale, lri pasikai iniane lalrwai kwi sipini. Kwi lalasu sakelanga makanaelre, si acegecege ikai cucubungu ki talialalai,

³ ku talialalai amia kai liniane, “Wasipiaku ku vaeva, si kawpungu kai kidremedreme, lri thingalaku ku pacugane kwini sipi.”

⁴ Kwi lalasu la arakai ku vaga ki swa Arame tubalre ki talialalai, iya kai, “Talialalai banzai! Ala pelaela naiane kwini sipi, la nai pasikai muswane lalrwai.”

⁵ Ku talialalai la iya kai, “Malritheethenga naku ku lrika apelaelane numi nakwane kwini sipili, ala lalrwadha ku pacugane, alaiyasi kai numi maka dulru, lri ngangetelaku kwi laalrima si drapale numi, lai pakinaburukanaku ku ladaane numi.

⁶ Alaiyasi maka dulru numi iya kwi sipili, si lalrwai ku pacugane kwini sipi, lri pakalrevaku numiane, la drima baai ku lrigu numiane. Kaiasasane, pelaela kwini sipili, si lalrwai pakilalalra nakwane.”

⁷ Kwi lalasu la tubalre ki talialalai, iya kai, “Talialalai ala pelaela naiane kwini sipi, la nai pasikai ki talialalai lalrwai.”

⁸ Kikai kwidra, ku talialalai la kalisi si akwadrau, “Wathingalenga naaku, ka kiasanu sasasai numi ku zikange, asi lwiyane wathingale numi ka malrithethenga naku.

⁹ Alaiyasi kai numi maka iya kwi sipili, vaeva ku apangimianeli kiecebe numiane. Mapealaelanga numi, ku lrika atavuvulrucane nakwane, si arakai ku zikange pakabalrithi kai tangimiane. Kaiasasane kirimwa pelaela kwi sipili, la nau thingale ka lrika tengatengane numi lalrwai ki sipi.”

¹⁰ Kwi lalasu la tubalre, “Kai kawmasane kadrwa ku umawmase ku lri dulru iya ku nau thingale iyaiya ki talialalai. Kadrwana ku talialalai ku amia kai ki tarakithingale ku angimiane, taratulrisi, taraarakai ki tariau kithingale; adravane ka sanianiangenga, ka sapupukuanenga ka talialalai kadruana.

¹¹ Kwi kivagasu ka talialalai makucingalre turamuru tubalre. Kathane ku latwaumase, kadrwa ku umawmase ku lri dulru tubalre, ai ku twaumase kai yakai kai ki kawmasane.”

¹² Ku talialalai twaebebelre ki lisiane, la drekase papacai sanaka takivagane ka yakai ki daane ki talialalai ki swa Babilunia.

¹³ La pakatwase ku drekase ki talialalai, lri papacai patuelre sanaka takivagane, paelre ki Daniele si latalragilragini.

Ku Twaumase peaelaela ki Daniele ku pacugane ki sipi

¹⁴ Ku Daniele matwase kikawriva kudra ki kiasikawlu ka lri pangimia ku drekase ki talialalai papacai ka kiacapili ki tarakadrekadrenge ka Ariuke.

¹⁵ Ku Daniele la pakukuruane kivaga ki Ariuke, ku talialalai ani pakilringawnga pia kai drekase. Ku Ariuce la pelaela ku tangimiamiane iniane.

¹⁶ Ku Daniele la makakaai kitubi ki talialalai ku aru pwadailaneana ku vai, ku lrika adulrwananeini ikai ku zikange lalrwai ku pacugane kwini sipi ki talialalai.

¹⁷ Ku Daniele ala katwase mutavanane, si pelaela ki latalragilragini ka Hanania, Misaele, si Azaria ku tangilribatane kikai.

¹⁸ Kwi lasu kiatubi liniane ku apapiane ki yabelenge ka Twaumase inulri, kitubi iniane ku akakalithane, si pelaela ku kaika athingalane ka matiasamaimali kikai sipi, kwi lalasu lani kai karededele ki drumane ka latakivagane ki swa Babilunia kipapacai.

¹⁹ Sakamaungu kwini ki vai, ku Daniele yakai ki maburusi tarumara ku tapelaelane ki kaika athingalane ka matiasamaimali. Ngwalai kikai, kwi lasu wadrengedrengere ki yabelenge ka Twaumase:

²⁰ Ku nagane ki Twaumase ani kidrengedrengere, kai kamwamudu palralrawthu! Asi lwiyane wathingale si dulru sanaka manemanenga.

²¹ Ku Twaumase pakabaalrithi ki zikange, ki kalamanemanane; ku Twaumase waamudu ki talialalai, wacegecege ki talialalai; patarwamara ku lrigilane ki malrigili ka umawmase, patarwamara ku thingalane ki ngiathingale ka umawmase,

²² Ku Twaumase peaelaela ku matiasamali; kwi lasu wathingale ku nitakadradridrimitanane; ku ledra taikaiyane tapalra iniane.

²³ Twaumase ki cucungulaneli, kiaseasenaku muswane, wadrengedrengeraku muswane! Patarwamarasu baai nakwane ku thingalane si puku; kialalrangasu ku kitubili, si pelaela ku apangimiane nai papia ki talialalai lalrwai.

Ku Daniele pasiakai ki talialalai lalrwai ku sipi

²⁴ Ku Daniele ala katwase mwa kikawriva ki Ariuke ka takivagane ki daane ki talialalai ka kiasikawlu ki talialalai papacai, amia kai iniane, “Madha papacapacai liniane; ila ilukaili kikawriva ki talialalai, lri pasikaiyaku ki talialalai lalrwai ku sipini.”

²⁵ Ku Ariuke la makakaai iluku ki Daniele mwa cucubungu ki talialalai ka Nibukadenezere, si iya kai ki talialalai, “Yakaiyaku ki niravasane ki swa Yuda kidringai kai tangea lri dulru lalrwai ku sipisu.”

²⁶ Ku talialalai la iya kai ki Daniele (la sinagane si Beletisazare), “Lri dulrusu pelaela ku sipili, si lalrwai ku pacuganeini?”

²⁷ Ku Daniele la tubalre, “Talialalai, sanaka taratulrisilrisi, taraivigi, tarakithingale, ku tarakithingale arakai ku tariau kai wadulru makanaelre papia muswane swacenge kikai;

²⁸ ai, ikai subelebelenge yakai ku tangea ka Twaumase ku padrele ku kaika athingalane ka matiasamaimali, ku Twaumase peaelaelaanga ki talialalai ku lrika angimiane lukabibilrili. Kaiasasane kwi sipi ki talialalai, ka amani kudra sa apecesu ka talialalai si drele ku maburusi lri lalrwadhaku ki talialalai.

²⁹ “Sa apecesu ka talialalai, wasipisu si drele ku ngwakai lukabibilrili. Ku padrele ku kaika athingalane ka matiasamaimali ka Twaumase ku lrika angimiane lukabibilrili pathingale ki talialalai.

³⁰ Kaiasasane, mialriaku kipadrele; kikai kaika ngwalai ku takamalrilrigilaneli ki palrapalra, pakai ku lrika athingalane ki talialalai ku pacugane kai ki sipi si ku tapwalrane ki talialalai ku tangimiamiane.

³¹ “Talialalai, yakaisu ki maburusi drele ku yacucubungu muswane ku vaeva ku maadrau ku nitu umawmasane, waledra likalikathe, ku laumawmase kai wathuru drele.

³² Kikai nitu umawmasane ku awlru yai niarakaiyane ku kakingiane, ku tuku si alrima arakai ku gingi, ku tasilakelaketanesu mapudupuduku arakai ku lriwlu,

³³ Ku vagisi arakai ku adreme, ku drapale adreme si dae apaibu.

³⁴ Sa icengecengesu dredredrele yakai ku vaeva ka kaika niara alrimane ki umawmase cekale ka maadrau ka lrenege twalai belenge ki lregelrege ka alrisapesape kainganai ngivalrulavulu, si makakai kwini ki nitu umawmasane, la tuthiri kudra ki niapaibwane ku adreme si dae ka drapale.

³⁵ Kwini dae, adreme, lriwlu, gingi, kingi la makakaai katatithiri, mia luka kaladralrangedrangane ku thuvugu ki takitaletalekane, kipalai ki valrigi, adravane ka navaeevanga ka ubulu kaidu maka kidringainga. Ai kwini madradrau ka lrenege arwa kadraadrau, si avaevanga ka maadrau ka lregelrege, kabungunga kawmasane.

³⁶ “Talialalai, kikai yai amani ku sipisu. Kaiasasane lri papianga naku muswane lalrwai.

³⁷ Talialalai, ikaisu ki sanaka talialalai sanianiangengasu ka talialalai. Ku yabelenge ka Twaumase wacegecege muswane paatalialalai, la patarumara muswane ku lrekeme, ku puku, ku lrigu.

³⁸ Ku Twaumase parathudu muswane ku taikaiyane ki umawmase kikai kawmasane, pamarasikai ki ngiapalapalai ka laadhadhame, lawalrawlrakwane ka waudriwdripi. Amanisu kudra nitu umawmasane ka kingi ka awlru.

³⁹ Ku bibilrili muswane lri ikai ku maelane ka vaeva ka kuni ku lri mutaluvaivai, ai kaika maiya muswane kadrau ka kuni; lubibilrili lai lri ikai ku sakatulru ku kuni ku mwataluvaivai, amani kudra lriwlu ka kuni, lri rathudu ki yakawmasane.

⁴⁰ Lu pelanga ka bibilrili yakai ku mwasakasupate ka kuni, kwini mia ki adreme ku kecengane, wadulru cacwake sanaka lamanemane. Mararaamau ki adreme lu cacwake ki lamanemane, kwini lri paukadrulu ki aswalalala ki kuni patuelre.

⁴¹ Kudra drelesu ku maibu ki adreme si dae ka drapale si galawgau ki drapale yai papia ki lubibilrili yakai ku vaeva ku mauvagai ka kuni ku lri mutaluvaivai; kwini yakai ku adreme ka puku, asi lwiyane niapaelreane ku adreme si dae.

⁴² Kudra niapaelreane ku adreme si dae ka galawgau ki drapale yai amani kudra ki kuni lri kagarange ku talidrumane, ku talidrumane lai lri turamuru.

⁴³ Wadrelengasu kudra niapaelreane ku adreme si dae; kikai yai amani kudra ki warathudu ki kuni ka kiasanu arakaikai ku amathaetharevane si alra elrelre ki laminzuku, ai kai lri maka pangimia, mia ki adreme si dae kaidu dulru apaelre.

⁴⁴ Kudra warathudu lu icengecengeana itaetalane, ku Twaumase ka yabelenge lri cegecege ku vaeva ku kadrwa ku alikaiyane ka kuni. Kikai kuni kai lri kipamalebe lutumane, lri amudulringa kamani ki sanaka kuni lai lrika palralrawthunga ikai.

⁴⁵ Wadrelesu ku vaeva ka kaika umawmase ka wacekale ka maadrau ka lrenege twalai belenge ki lregelrege ka alrisapesape kainganai ngivalrulavulu; la drelesu sa cacwake ki niara kingiane, gingi, lriwlu, adreme, si dae tuumawmase. Ku saniange ka Twaumase yai lri pathingale ki talialalai ku lrika angimiane lukabibilrili. Ku sipi ki talialalai pwadriadriingainga naku pelaela, la lalrwainga naku ku pacugane kikai sipi.”

Pakalreva ku talialalai ki Daniele

⁴⁶ Ku Nibukadenezere ka talialalai waguruthungane ikai cakena, papia ki Daniele sukubu, si drekase papia iniane patarumara ku lamanemane si lama ku sangwalreeme.

⁴⁷ Ku talialalai amia kai, “Amani sa lalrwaisu kikai kaika athingalane ka matiasamaimali, wathingalaku ki Twaumasesu ka sanianiangenga ki latwaumase, Tamatama ki sanaka talialalai, padrele ku kaika athingalane ka matiasamaimali ki Twaumase.”

⁴⁸ Ku talialalai ala patarumara ku pakalreva ki Daniele ku makaalra si ka takuciacingalre ka saceacebe, la aru pabelenge iniane, si pakamaninga iniane marasikai ki swa Babilunia, la kamaninga ku tamatama ki latakivagane ki daane ki talialalai.

⁴⁹ Ku talialalai la tarumara ku kitubi ki Daniele, ku lrika apakamaniane ki Saderake, Misake, si Abidenigu marasikai ku awngane ki swa Babilunia; ku Daniele la asurwana ikai ki daane ki talialalai.