Daniele 12 - Ngudradreadrekadhane Ka Sisiu 魯凱語聖經

Paliakainga ku vai

¹ Kudra sialaimai ku malubibiri ka kaimadhane ku laimai ka sasiakawlu belenge amia kai, “Lukamani kwidra, kudra palakelakebe ki sakacekelesu ka kiacapili ki sasiakawlu belenge ka Mikaele lri mutaluvaivai. Lai lri ikai ku lrika amatikurwane, twalai ku tacegecegane ki kuni madradraunga ka amatikurwane. Ikai kwini, ki sakacekelesu ku kiapacase pikai ki mibu ki niake ku nagane, lri kipalriibulu makanaelre.

² Ku wapacainga ka umawmase lri takaalra ku siaelane panianiake. Yakai ku lri kisupisupilri ku palralrawthu ka niake; yakai ku lri kitusinalrelrelreme palralrawthu.

³ Ku ngiathingale ka latarasangililuku lri tupapalra ki tatwaladhane ki ledra masiasilange ledraedra. Kudra la wabulrubulru ki laumawmase ku akadringelresane, lri mia ki latariau palralrawthunga ledra.

⁴ “Daniele, kikaiasasane malra apaelre kikai hungu, si padakipi ku pinuhangeane, pakeela ku alikaiyane ki vai kai kawmasane. Lri takaalra ku umawmase ku lri pasawlra ku sakwalrialri, kisanu thingathingale ku lrika angimiane.”

⁵ Pacungulu, wadrelaku ku tadrusa ku umawmase, ku tangea yakai talikaiyane kai ki kadravane, ku tangea yakai talikaiyane kavai ki kadravane.

⁶ Kudra tangea la kivaga kudra ki sialaimai ku malubibiri ka lalasare ka kaimadhane ka sasiakawlu belenge, “Kikai matiasamaimali amukalavane pakela lwigane ala lri palikai?”

⁷ Kwini sasiakawlu belenge la cidingi ku drusa ku alrima, si papia belenge, pangukai ku nagane ki palralrawthu panianiake ka Twaumase kiketekete. Kialalraku ki lasu amia kai, “Lri taratulru ka caili si apararamau. Lu palikainga ku takihakegadhane ki kawkawlu ki Twaumase, kilakikai lri ngilribate patuelre.”

⁸ Kialalraku ku taiyaneini ku vaga, ai kainaku wathingale luka manemane ku pacugane. Ngwalai kikai la kivagaku, “Tamatama, ku lrika angimiane kilakikai ngitwatumane?”

⁹ Kwi lasu la iya kai, “Daniele, lu katwasa, asi lwiyane kikai lavaga aseketane pakeela ki talikaiyane ka vai.

¹⁰ Takaalra ku umawmase ku lri kisinau, kibula, kipakundringi. Ku manganga ka umawmase lri pacungucungulu kanganga; kwi lalasu kai lri maka ngipapulringau, kathane kudra ngiathingale ka umawmase ka lri maka pulringalringau.

¹¹ “Twalai kudra taisadrane ki nipatarumaramarane ki vaivaivaai, ka amani kudra sapikai pasutelrai kudra ki ‘Lri pakamudu ka matiavalracevace ka lawbubulu’ pathagili, lri tara 1,290 ka vai.

¹² Kudra tengatengane ku kidremedreme pakeela ku talikaiyane, si ngilribatenga ku nitara 1,335 ka vai ku laumawmase lri kaesailringa!

¹³ “Daniele, kapatengatengana kwi kidremedremesu pakela ku talikaiyane. Lu bibilrilinga lri isadrangasu; ai ikai ki talikaiyane ka vai lri sielasu panianiake, si tarumara ku pakalreva.”