Daniele 11 - Ngudradreadrekadhane Ka Sisiu 魯凱語聖經

¹ “Kwi lasu siamece ku aparalubane nakwane, ku apalakebane nakwane.

² Kikaiasasane kai lrika apelaelaneli muswane kai vaga patengatengane.” Kwini sasiakawlu belenge amia kai, “Lri ta tulrwana ku talialalai ku lri rathudu ki Perisia, ala lri ikai ku mwasakasupate ku talialalai. Kikai mwasakasupate ka talialalai lrika silrialribate ku tacekecekelane ki drumane ka talialalai. Kwi lasu luka taicengecengane ikai ku puku, ka magagarangenga, kwi lasu lri papia ki Gurike kikaruburu.

Izipiti si Siria

³ “Ala lri ikai ku tangea ku magagarange ku talialalai ku lri mutaluvaivai; kwi lasu lri ngisasingikaai ku kidremedremeini rathudu ki maadrau ka kuni.

⁴ Ai, kwi lasu luka taicengeceengane ku pukuini, kwi kunini lri kasuburu, masivavagai mau supate. Ku mwabaibalrithi iniane kai lri dulru mucungulu ku takatalialaladhaneini, ku kunini lrika palrapalra ku warathudu, ai kai lri ngimianga iniane sa icengecenge ku ngiradhekanane.

⁵ “Ku talialalai ki swa Izipiti lri kaadrau ngiradhekane, ai ikai ki mabelenge ki lakwapingini lri ikai ku tangea ku magagarange iniane ku lri mutaluvaivai, kwi lasu lri rathudu ku madradrau ku kuni.

⁶ Lu kawlainga ku caili, ku talialalai ki swa Izipiti si talialalai ki swa Siria lri matutalragi, ku lalakeini ka ababai lri pakithareve baai iniane. Ai kikai tamatutalragiane kai lri kawlai. Kwi alisu si taelrelreini, lalalake, si kudra twapapalra iniane ku lasasiakawlu lri kipapacai makanaelre.

⁷ Lai lri kai tarathainu, kudra tangea ka wacekecekeleini lri atalialalai, si lri kikaruburu ki kwapingi ki talialalai ki swa Siria, si mudaane ki yakai ku kepale ka cekele lini, lai lri paamaki liniane.

⁸ Kwi lasu lri malra patuelre ku lasamiamiange lini si lalawbubulu ka kingi, gingi si iluku mu Izipiti. Lu tara piyanga ka caili ku takasulivalivaatane ku vai,

⁹ Ku talialalai ki swa Siria lai lri mucekele ki swa Izipiti, ai lri kipasiwlri.

¹⁰ “Ku lalalake ki talialalai ki swa Siria lri padulru ku akikaruburane, lai lri sarubu ku maadrau turamuru ka lakwapingi. Kudra tangea ka lalake ki talialalai lri mia ki lriau ka acilai ka walriau ki yakai ku kepale ka cekele.

¹¹ Ku talialalai ki swa Izipiti lri ikai ki girimucane ililuku ki lakwapingi kikaruburu, lri kikaruburu ki talialalai ki swa Siria, si tuduri ki maadrau ka lakwapingini.

¹² Ku talialalai ki swa Izipiti ngwalai ku taamudane ki kwapingi ki badha si akaci la ngikalrilrigu turamuru, ai kwi taakacianeini kai lri tarathainu.

¹³ “Ku talialalai ki swa Siria lri siwlri mwa ki kunini si sarubu ku maadradrau ka magaagarange ku lakwapingi; sana kela ku vai, kwi lasu lri sangililuku kwini ki maka ngiararukudru ka magagarange ka lakwapingi si kainganai siwlri.

¹⁴ Lukamaninga kwidra, lri takaalra kulri baebalre ki talialalai ki swa Izipiti. Daniele, kwi sakacekelesu lri ikai kudra la tangikararakacane ku lri mialri baebalre, lai lri ngimia kwini maburusi; ai kwi lalasu lri kipamaki.

¹⁵ Ku talialalai ki swa Siria lri lringulu si kikaruburu lai lri malra kudra ki tasakaiyane kikaruburu ku cekele; ku tagagagaarangenga ka lakwapingi ki swa Izipiti lai kai maka dulru kiecebe.

¹⁶ Kudra twalai Siria kainganai kikaruburu lri ngisasingikaai, kadrwa ku umawmase ku lri dulru kiecebe. Kwi lasu lri malra kudra nipukawnanenga ku kadaengane, si lrika amaninga ku wagemegeme iniane.

¹⁷ “Ku talialalai ki swa Siria lri kikake ku lrika avelevelaneini sanaka kwapingi katwase kikaruburu ki swa Izipiti. Pakai ku lrika amudane ki swa Izipiti, kwi lasu kiadremedreme ku lrika apaswalaneanaini tutalragi ki swa Izipiti, si pwa kwini pakithareve ki lalakeini ka ababai; ai kwini kikake ki lasu kai lri maka ngimia, laka kadrwa ku akaesadhaneini.

¹⁸ Sakabilrilinga, kwi lasu lri kikaruburu ki ngwababiabila ki laveke ka lakuni, si pamaki ki takaalra ki kuni. Ai yakai ku taingea ka maelane ka kuni ku mabelenge ki kwapingi ku lri pamaki iniane, si telenge ki ngikarakacananeini, ku lrika angikakabebetethananeini ngukai ki ngikarakacanane.

¹⁹ Kwi lasu lri siwlri mubalriu, si mudaane mwa ki yakai ku kepale ka cekeleini, kiapamakinga ki umawmase; amani kai ku tangimianeini.

²⁰ “Kwi lasu lukabibilrili lri ikai ku maelane ku talialalai ku lri mucungulu; kikai talialalai twasinalreme dredrepete ki laumawmase, la aragaraangane malra ku padulru, pakai ku adrimane ku tacekecekelane ki kuni. Ai kai lri tarathainu kai lasu lai lri kipapacai, kai lri ikai ki tamakakaruburane pacai.”

Ngiakarakacane ka talialalai ki swa Siria

²¹ Kwidra sasiakawlu belenge la pacungulu lalrwai iya kai, “Lukabilrilinga, yakai ku tangea ku ngialisiane ka umawmase ku lri ribici ku taetalane ki talialalai ki swa Siria. Kwi lasu kadrwa ku kindrini mucungulu, ai sakai thingathingale ku umawmase, pangwa lrilrigili ribici kwini puku ki ngwkunkwane.

²² Kwi lasu lri demedeme amudu kudra ki wabaebalre ka puku, paelre ki abebeelengenga ki barakalai ki Twaumase.

²³ Kwi lasu arakai ku samakaketeketane matutalragi tavuvulrucu ki drumane ka kuni; kwi lasu unu tikiyane ku rathuduini ku kuni, ai arwa kadradrau kagarange.

²⁴ Kwi lasu lu kai thingathingale ku palrapalra lri mwa ki ngiaesaesadhane ka siu kikaruburu si malra, si lri pia kudra kaiyana ka pia ki cucungulaneini. Kwi lasu ku niravasane ku lawbubulu apavalavala baai ki laumawmaseini. Kwi lasu lri kikake ku akikaruburane ki yakai ku kepale ka cekele, ai ku vaini kai lri kalragi.

²⁵ “Kwi lasu lri kagaarange sangililuku ki madrau ka lakwapingi kikaruburu ki talialalai ki swa Izipiti; ku talialalai ki swa Izipiti lai lri mialri arakai ku madrau kagarange ku lakwapingi kidresenge kikaruburu, ai kai lri siku, asi lwiyane kwi lasu lri kipapacai ki wabaebalre iniane.

²⁶ Ku sakaikaainga iniane ka umawmase lri papacai iniane; ku lakwapingini lai lri kiamudu, ku lakwapingi lri kamudu makanaelre.

²⁷ Lu ngilribatenga kai kwini tadrusa ka talialalai lri kalringulu ikai ki cukwi, ai ku kidremedreme lini tara yakaai ku ngialisiane, si matatavuvuvulrucu. Kwi lalasu kai lri maka ngimia ku kidredredreme lini, asi lwiyane kudra nikelretane ku vai kaiyana wadaruru.

²⁸ Ku talialalai ki swa Siria lri kateelrege ku ravase lini siwlri mubalriu, lai kalritheethe ku amudane ku takisuswane ki kawkawlu ki Twaumase. Kwi lasu lri ngisasingikaai ku ngikarakacanane, ala lri siwlri mubalriu.

²⁹ “Lu kelanga ku vai, kwi lasu lri peela kikaruburu ki swa Izipiti; ai kikai makakaelanga ki siaswalane.

³⁰ Ku ngwavarukuru ka kwapingi ki swa Ruma lri kela kikaruburu iniane, kwi lasu lai lri kathathiburu turamuru si kai lri thingale ku atumanane. “Ku talialalai ki swa Siria lri mailuku ku lisiane katwase siwlri, si lri tasukai kabebetethe ku takisuswane ki kawkawlu ki Twaumase. Kwi lasu lri kilalra ku taiyane kwidra ki lawabaebalre ki takisuswane.

³¹ Kwidra pakelaini ku lakwapingi lri tumeamelrace ki daane ki Twaumase, lri paisadra kudra patarumaramara lini ku lamanemane luka vaivaivaai, lai lri malra kudra ‘Akamudane ka matiavalracevace ka lamanemane’ pikai adringi ki daane ki Twaumase.

³² Kwi lasu lri tavuvulrucu papia kwidra ki la twapapapalra ki tarabaebalre; ai kwidra la tengatengane tupapalra ki Twaumase ku umawmase lri ngidrakale kiecebe.

³³ Kudra la tarasangililuku ikai ki cekele lri bulru ki laumawmase, kwi lalasu lai lri pulringalringau; ai, lri ikaiyana ku zikange, yakai ku laumawmase ku lri kikaruburu si pacai, lri kilama si pacai, lri kiribici ku lawbubulu, lri kiravase.

³⁴ Kudra lu icengecenge kipapacapacai, ku kawkawlu ki Twaumase lri kiparalubu ku tikiyane, ai yakai ku tapia ku umawmase ku kaiyanganai kipaelre mwa liniane yai ngwalai ki ngipapakaesadhane.

³⁵ Yakai ku la ngiathingale ku tarasangililuku ku lri kipapacai, ai ku tangicacilriane lini lri sinau, pakundringi ki laumawmase, kwi lalasu lai lri kabula. Kikai ngimiyaiya kikai lri pacungucungulu, pakeela ku takelretane ku apalikaiyane ki Twaumase.

³⁶ “Ku talialalai ki swa Siria lri ngilralraaingi ku apiane, si ngikalrilrilrigu ka sanianiange ki sanaka twaumase, ka walriibate ki sanaka twaumase ka Twaumase. Kwi lasu lri pacungulu pia kikai ngikarakacane pia sanaka manemane, pakeela ku tapathavungane iniane ki Twaumase ka vai. Ku Twaumase lri tara pangimia ku kikakeini, kai lri akabalrithi lutumane.

³⁷ Kikai talialalai kai mwasakene ku sukusukubu ki cucungulane ka twaumase, la kai musakene kudra kadalame ki lalabaibai ka twaumase. Ku patengatengane, kwi lasu kai mwasakene ki sanaka twaumase, asi lwiyane kwi lasu ngiatatu sanianiange ki sanaka twaumase.

³⁸ Kwi lasu ngiabaalrelringa kamani katwase sukubu kudra kaika sukubwana ki cucungulane kudra ki latarapalribulu ki lanikepalane ka cekele ka tarakikaruburu ka twaumase. Kai lasu papia kai ki twaumase patarumara ku kingi, gingi, tinukucingalrane ka lrenege, si drumane ka tinukucingalrane ka lasaceacebe.

³⁹ Kwi lasu arakai kudra ki kiasususu ki drumane ku takisuswane ka lakwapingi kadrenge ki tasalikaikaiyane kikaruburu ka cekele. Ku tarwamara ku tarathudaneini ku umawmase, kwi lasu wabaai liniane ku abelengane, si vala ku kadaengane, tusapawlrawlravane.

⁴⁰ “Ku alikaiyane ki talialalai ki swa Siria lulri padaalrunga si kela, ku talialalai ki swa Izipiti lri iluku ku kwapingi kikaruburu iniane. Ku talialalai ki swa Siria lai lri sarubu sanaka kwapingini, lri arakai ku sakikaruburuburane ka palridingi, sakikaruburuburane ka rigi, si sakikaruburuburane ka varukuru kainganai kidresenge kikaruburu. Kwi lasu lri drikisi si malra ki takaalra ka kuni, lri mia ki walriau ka acilai suete kawmasane,

⁴¹ lri pakeela ki wamwa drikisi si malra ki nipukawnanenga ka kadaengane, si papacai ki tathathatha ka laumawmase; ai kudra abalu ku laumawmase ki swa Idume, Muabe, si Amune lri mubere.

⁴² Kwi lasu lu mwa drikisi kwini ki lakuni, adravane ka swa Izipiti kai lri maka mubere.

⁴³ Kwi lasu lri ravase ku la takuciacingalre ki swa Izipiti ku kingi gingi ka lawbubulu si drumane ka la takuciacingalre ka lamanemane. Kwi lasu lri pamaki ki swa Lribia si swa Kuse.

⁴⁴ Luka bilrilinga ku twalai tali talrawane si tali dradha ku wakela ku vaga lri ngituluku si kakiwcu kwi lasu; kwi lasu lai lri arupakilriingau kikaruburu, si papacai ki takaalra ki umawmase.

⁴⁵ Kwi lasu lri ikai ki maadrau ka laveke si matisalru ka saniange ka lregelrege cegecege ku maadrau ka balrawbau ka daane ki talialalai. Ai ku apacadhaneini wakelanga, kadrwa ku umawmase ku lri dulru palribulu paralubu iniane.”