Amuse 8 - Ngudradreadrekadhane Ka Sisiu 魯凱語聖經

Maburusi ngukai ki akuvaeva ki karadrare ka madru ki angatu

¹ Ku abebeelengenga ka Tamatama padrele nakwane ku vaeva ku maburusi: Wadrelaku ku yakaradrarane ku lreeme ku madru ki angatu.

² Ku Twaumase la kivaga nakwane iya kai, “Amuse, wadrelesu ku manemane?” La tubalreaku, “Yakaradrarane ka lreeme ka madru ki angatu.” Ku Tamatama la iya kai nakwane, “Ku lrika alikaiyanenga ki kawkawluli ka swa Iseraylri wakelanga. Kikai lri kainaku pacepenga liniane!

³ Kwini vai kwidra, ku senai ikai ki daane ki talialalai lri akabalrithi awatubitubi silringau; lri ngisarade ikai kidruanga ku lawapacai, si lri matiseepelenga.”

Amatikurwane ki swa Iseraylri

⁴ Kunumi ka laumawmase ka twasinalremelreme ki matiakukuru, waravase ki kwalrialri, kilalra!

⁵ Ngiaiya numi kai, “Saniange ka lrisi ka vai kirimwa ngilribate! La nai sarakatwase kilangai kai taleke nai. Kirimwa ngilribate ka Taisadrasadrane ka vai! La nai sarakatwase siwbai. Lri dulrunga nai aru tukucingalre kai lawbubulu, si arakai ku kaika patengane ku lekete, si sabungubungane lrilrigili ki lawalangai.

⁶ Lri dulru nai tukucingalre ku kai mathariri ku takamugiane, lri silape nai ku kai lri dulru ukiame ku matiakukuru ku umawmase, si arakai ku mararaamau ku vaeva ku sulripa ku kucingalrane ku paisu si langai iniane tuduri.”

⁷ Ku Tamatama ka Twaumase ki swa Iseraylri kiaketekete iya kai, “Lri kainaku karimuru lutumane ku ngilisianane ku kakwakudhane ki swa Iseraylri.

⁸ Lri palingilingaku ki kadaengane, sanaka umawmase lri kipadradreesenge makanaelre ku akwalriane. Kai kadaengane lri ngivelevele patueelre, mia ki kadravane ka Nile lu aru kaadrau si lu aru katikiane.

⁹ Lu kelanga kwini ki vai, lri palriwgaku ki vai lu icengecenge ulringedele, la apaadradrimitane ki vaiyane. Ki kikai yai amaniaku ka abebeelengenga ka Tamatama ka amia.

¹⁰ Ku tatulrisisisiane numi lri paakabalrithaku ka tasateateatedrane ki wapacai ka vai, ku senai ki mapeapeaperau lri akabalrithi awatubitubi karaleale. Lri pakikiritaku ku awlru numi, si sikaimadhane. Lri tubi numi mia ki wapaacai ku vaeva ka lalake. Kwini vai kwidra lri awngu tubitubi.

¹¹ “Wakelanga kudra vai, lri tukalasilravane kai swa Iseraylri palraelre. Kudra kasilrau lini kaika kadrwa ku akaneane ku pange; ku kakadhame lini kaika kadrwa ku awngulane ku acilai. Ku kasilrau lini amani sa kai maka kilalra ku vaga ki Tamatama. Ki kikai yai amaniaku ka abebeelengenga ka Tamatama ka amia.

¹² Twalai tali lrawdru pakeela tali dradha, twalai tali talrawane pakeela tali talriwgane, kwini lalasu lri mwa kidruanga silape ku vaga ki Tamatama, ai kai lri maka kidringai.

¹³ Ikai kwini ki vai, adravane ka latathaithaariri ka yacengeecenge ka ababai ka tangicaecaeme ka yacengecenge ka sawvalai lri ngwalai ki kadhamane si tubakebake.

¹⁴ Kudra la nawasukubunga ki samiamiange ki swa Samaria, si kudra kiaketeketenga icucubungu ki twaumase ki swa Dange si swa Bereseba ku umawmase, lri tubakeebake makanaelre, si lai kai maka ngidrakalenga.”