Amuse 6 - Ngudradreadrekadhane Ka Sisiu 魯凱語聖經

Ku kamudu ki swa Iseraylri

¹ Kudra yakai Ziyungu pakamaesaesaesai ku umawmase, lri matisalregesege numi! Kudra yakai Samaria lregelrege si malakebe nai iyaiya ku umawmase, lri matisalregesege numi! Anai athingathingaalane ikai ki kuni ki swa Iseraylri, la kiusakesakene ki palrapalra amiamia numi!

² Kunumi lu mwa si drele ki cekele ki swa Kalene, ala mwa ki maadrau ka Hamathe, si la mwa ki cekele ki swa Pelisitine ka Gathe drele. Kilakikai kuni, swainu ku kaika sanianiange ki swa Yuda si swa Iseraylri? Ku kadaengane lini, swainu ku kaika swadradrau numiane?

³ Lu kidremedreme numi kudra maadrau ka amatikurwane ka vai kaina lri kela amiamia numi; ai kwini kakwakudhane numi ngiapapakamwamudunga numi.

⁴ Asiamiya ala matiasalregesege numi! Kunumi ka laumawmase waapeceana numi ikai ki niarakaiyane ku valisi ki zu pangiragelane ka tapeapecane, la nene numi suteelrai ikai ki mathariri ka taetale, si kanekane ku niputalekane ka mamameelreana ka lwange si maricuru ka kiu.

⁵ Patwapapalra numi ki patungutungu, si senasenai, mia ki Davidi.

⁶ La ungulu numi ku malimeme ka bava, si ngisasakidri ku mathaithaariringa ka sangwalreme, ai kai numi watubitubi ku taaru turamuramurane ki swa Iseraylri.

⁷ Lakamani, lri aswala numi kipakatwase ki cekele, ku tangilralraingane ki kinawmasane numi ikai ki peravane lai lri palikainga.

⁸ Ku abebeelengenga ka Tamatama ka abebeelengenga ki sanaka kwapingi ka Twaumase ngiapapapia kiketekete, si iya kai, “Magirimucaku ki swa Iseraylri lu ngikalrilrigu; la kalrasaku ku tinutharirane turamuru ku daane lini. Lri malraku kwi tangadrane ki kuni lini ka cekele si ku yakai adringi ku tacekecekelane ki daane patuelre si baai ki badha lini.”

⁹ Alaiyasi kudra wacekecekele la ikaiyana ku tamangeale ku umawmase, kwini tamangeale lri paacai makanaelre.

¹⁰ Kudra laretesane kwini ki wapacai lu kela si malra kwini ki lawapacai lama, lri iya kai kwini ki yakai daane kilepenge, “Yakaiyana ku yakaai kwini?” Kwini umawmase lai lri iya kai tubalre, “Kadrwanga.” Kwini piretesanane lalri iya kai, “Icelreba, madha avavagavaga, kaita lri maka matikai ku nagane ki Tamatama.”

¹¹ Lu drekase ku Tamatama, ku madrau ku tikiane ku daane lri kaburuku, si akinaburukane.

¹² Ku rigi lri dulru ikai ki twatukadrane lrabwabwale? Ku lwange lri dulru ikai ki laveke kauawngu? Ai, kunumi wamalra numi kwini aparamaramavane si paaduku, la malra numi kwini dringelresane si paamapalili ka sasulravane.

¹³ Kunumi ngiakalrilrigu numi ku tapaamakiane numi ki swa Ludibare. Amia numi kai, “Pukuta ku paamalebeta ki swa Karanaime.”

¹⁴ Ku Tamatama ka abebeelengenga ki sanaka kwapingi ka Twaumase amia kai, “Swa Iseraylri, lri pakelaku ki kwapingi ki maelane ka kuni si lri malra ki cekele numi; lri twalai tali dradha ki samamudaane kavai Hamathe, pakeela talikai lrawdru kavai valrwalru Yurudange, kwini lalasu lri kainganai si kabebetethe numiane.”