Amuse 4 - Ngudradreadrekadhane Ka Sisiu 魯凱語聖經

¹ Lalabaibai ki swa Samaria, kilalra kai vagali. Kwi bitulrwane numi mia ki tina ka lwange ki Basane. Twasinalrelreme numi ki twaramuru, la dredrepete numi ki matiakukuru. La pagugu numi ki taelrelre numi ku bava si paungulu numiane!

² Ku abebeelengenga ka Tamatama papia ki saniange ka naganeini kiketekete iya kai, “Kudra vai lri tara keela, lri ikai ku umawmase ku lri kaili numiane arakai ku sakakaili, mia ki kange ka kia pulrakwilane.

³ Lri tarungeangea numi kibilibili pwa deethe ki takaburukane ki kepale ki cekele, si kicilri pulatadre ki cekele.” Ku Tamatama amia kikai pelaela.

Kai maka tarwamara ku sabulrwane ku swa Iseraylri

⁴ Ku abebeelengenga ka Tamatama amia kai, “Swa Iseraylri! Lu mwa kudra ki taikaiyane ka saniange ka Bithele si pasalriu! Lu mwa Gilegale si pakaelre ku kidremedreme numi pasalriu! Lukavaivai patarwamaara numi ku sapatarumarane, la kingivaale ki minakatulrulane patarumara ku taingeane ki taimangealane!

⁵ Kunumi lu ngisasingikaiya patarumara ku pange tu Sakiaseasenane ka lrisi! Lu ngisasingikaiya ngidradrengedrengere ku twabakane numi patarumara! Asi lwiyane kilakikai yai kadalame numi ka awngane!

⁶ “Unu, amaniaku ka Tamatama ka pwalebe pwa ki sanaka cekele numi ku silravane, ala kamani ku kakadrwa ku taleke numi. Ai kunumi kai numi maka siaulriwlri mwa nakwane.

⁷ Lu urikaikaai ki udale ku lalredredreke numi, lri kainaku pawdale. Lri ikaiyaku kai ki cekele pawdale, lai lri ikaiyaku kavai ki cekele kai pawdale; lri paudalaku kai ki angangade kai ki daane, lai lri pakameamealaku ki drumane ka angangade.

⁸ Lri ikai ku taidrusa ku taitulru ku cekele ku laumawmase lri kakadhakadhame ka kadrwa ku lapuku lini, lai lri mwamwa ki ngwadadethe ki cekele ababange ku acilai si ungulu, ai kai lri maka ngukadhamane! Lai lrika sakamiyana numi kai maka ngibangulu papia nakwane.

⁹ “Kwaku ka Tamatama lri pakingivaalaku pavalrigi ku maculu ku valrigi, si pakulama ku taleke numi; lai lri sikawlaku ki apapawku, kane demedeme ku lacenge numi, ku budu numi, ulrive, si icizike. Ai kunumi sakamiyana numi kai maka ngibangulu papia nakwane.

¹⁰ “Kwaku ka Tamatama pwalebeaku ku swalrubu pikai numiane, mia kunadruma sa pulebeaku pikai Izipiti. Yakaiyaku ki tamakakaruburane papacai ki layacengecenge numi, la pathirakupaku ki rigi numi. Pasabalriaku numiane ku sangwabalre ikai ki tasalikaiyane numi kikaruburu kudra ki kinawmasane ki lawapacai. Ai kunumi sakamiyana numi kai maka ngibangulu papia nakwane.”

¹¹ Ku Tamatama amia kai, “Ikai numiane lri ikai ku apakamudaneli ku laumawmase, mia sa pakaamudaku ki swa Sudume si swa Gumura. Kunumi ka latedranenga ka waudripi panianiake mararaamau ki niribicane patwalai ki apwi ka vaeva ka angatu. Ai kunumi sakamiyana numi kai maka ngibangulu papia nakwane.

¹² Lakamani, swa Iseraylri, lri pathavungaku numiane! Ngwalai kikai lri kiecebaku numiane, kunumi kirimwa padulru ku apapiane ki Twaumase numi kisaibange!”

¹³ Ku Twaumase wabekace ki lregelrege, la bekace ki valrigi, la pelaela ki umawmase ku takidremedremaneini; pakabalrithi ki vaiyane paamaungu, wagemegeme rathudu kawmasane. Ku naganeini yai Tamatama ka abebeelengenga ki sanaka kwapingi ka Twaumase!