Amuse 3 - Ngudradreadrekadhane Ka Sisiu 魯凱語聖經

¹ Swa Iseraylri, kilalra ku pelaelaela numiane ki Tamatama ku vaga; kikai vaga amanimani numiane ka kuni palraelre ka laumawmase. Ku Tamatama napatwalai numiane Izipiti ililuku;

² amia kai, “Ikai kai ki kiacaebe belenge ka tathathatha ka lakuni, kathane numiane ku pilrili, la pasalrisaalriwana numi ka thathatha; ngwalai kikai, lri tara pathaavungaku numiane.”

Awngane ki yuginsia

³ Ku tadrusa lu kai maka mapapalraingi, lri maka tarudradrusa dadavace?

⁴ Ku raiyungu lu kai maka kidringai ku apananeini, lri maka ikai angatungatu girigiringi? Ku yacengecenge ku raiyungu lu kakadrwa ku panaini, lri maka ikai ki barunguluini girigiringi?

⁵ Lu kakadrwa ku paene ki dringai ki adhadhame, lri maka kipudringai ku adhadhame? Lu kakadrwa ku wapungupungu ki dringai ki adhadhame, kwini cekadeini lri maka ngibatiikisi?

⁶ Sana ngirapa akuvaale ka sapelaelane ka amakakaruburane, ku yadaane ki cekele ku laumawmase kai lri mukuludru? Lu kaika takidremedremane ki Tamatama, ku amatikurwane lri mulebe mwa kai ki cekele?

⁷ Ku abebeelengenga ka Tamatama lulri ngivelevelenga, lri tara paswala pelaela ki sasiakawluini ka layuginsia ku kikakeini.

⁸ Lu girigiringi ku raiyungu, aneane ku kai lri mukuludru? Lu kawrivariva ku abebeelengenga ka Tamatama, aneane kulri lreme kai pelaela ku vagaini?

Ku amulisiane ki swa Samaria

⁹ Lu katwasa pelaela kudra ki la yakai ki daane ki talialalai ka swa Izipiti si swa Asedude ka laumawmase iya kai, “Lri irubu numi ikai ki ngiathalringulu Samaria ki lalregelrege, si dredredrele ku lrika angimiane kalrithavulu, madredredrepete ikai adringi ki cekele.”

¹⁰ Ku abebeelengenga ka Tamatama amia kai, “Kwini laumawmase paswaete pikai ki daane lini ka talialalai ku niravasane si nivuthaane malra ku lawbubulu; kwini lalasu kai wathingale aparamaramau malangalangai.

¹¹ Ngwalai kikai, ku badha lri lringulu ki cekele lini, si kabebetethe ki saravadrane lini, lai lri malra demeedeme ku yakai ki daane ki talialalai lini.”

¹² Ku Tamatama amia kai, “Lri mia ki taraagwagu ki kiu ka umawmase ku malraini ribici patwalai ki ngudwi ki raiyungu drwadrusanga ka drapale ki kiu si vaeva ka calringa, kai yakai Samaria ka kadrwa ku ngikakelretane ku tacekecekelane ka swa Iseraylri lri mialri ka tabeekele ku lri dulru ngilribate ki matikurwane.”

¹³ Ku abebeelengenga ka Tamatama ka abebeelengenga ki sanaka kwapingi ka Twaumase amia kai, “Kilalra! Pakipapawlringava ki mwabaibalrithi ki Yakubu iya kai:

¹⁴ Lu pathavungaku ku tapasalrivane ki swa Iseraylri, lri burukaku ku tapatarumaramarane kavai Bithele; sanaka piu ki tapatarumaramarane lri kipici, si ukadrulu ikai cakena.

¹⁵ Lri burukaku ku taikaikaiyane lini ku daane luka kaladralrangedrangane si kalakecelrane. Ku niarakaiyane ku valisi ki zu pangiraeragelane ka daane si nitumatharirane ka maadrau ka daane lri kaburuku patuelre, si akinaburukane.” Ku Tamatama amia kikai pelaela.