Amuse 2 - Ngudradreadrekadhane Ka Sisiu 魯凱語聖經

Patharukai ki swa Muabe

¹ Ku Tamatama amia kai, “Ku swa Muabe apapelaela pasalriu, lri tara pathaavungaku liniane. Kwi lalasu wamalra ku culrale ki talialalai ki swa Idume si lama paabunga.

² Lakamani lri lamaku ki swa Muabe, la kabebetethe ku daane ki talialalai ka Kiriuthe. Lu makakaralealeale si ngirapapa ku lakwapingi, ku swa Muabe ikai ki tamakakaruburuburane lri tara paacai.

³ Lri papacadhaku ki tamatama ki swa Muabe, si papacai demedeme ki kiacapili ki lamabelenge lini.” Ku Tamatama amia kikai pelaela.

Patharukai ki swa Yuda

⁴ Ku Tamatama amia kai, “Ku swa Yuda apapelaela pasalriu, lri tara pathavungaku liniane. Kwi lalasu wacilri ku sabulrwaneli, kai paluludu ku padradrekaseli. Kwi lalasu kiaililuku kudra ki samiamiange ka kisususu ki cucungulane lini, la katwasenga kidaili ki pacengecenge ka sabulrwane.

⁵ Lakamani lri lamaku ki swa Yuda, la kabebetethe ku daane ki talialalai Yerusalrime.”

Tasaibangane ki Twaumase ki swa Iseraylri

⁶ Ku Tamatama amia kai, “Kai swa Iseraylri apapelaela pasalriu, lri tara pathavungaku liniane. Kwi lalasu marau ki paisu, la kilangai ki mwalecege ka umawmase, arakai ku naika balrithane ki kece ka varazi ku paisu kilangai tuduri ki matiakukuru ka umawmase.

⁷ Kai lalasu mabebetethe ki matiakukuru, la lrudrulu pakatwase ki yakadalranane ka matiakukuru. Ku lamatama la tara mwa pasalriu ki tangeangeea ka tiatiama ikai ki tasamiamiangane, twadrekasenga ki naganeli.

⁸ Kai lalasu sikathuruanenga ikai thili ki tapatarumaramarane, si sapa arakai ku sadrepetane ki lalasu liniane ku laimai, kai lalasu sikathuruanenga ikai ki daane ki Twaumase, si malra ku nivuthane ka lapatwalai ki matiakukuru ku paisu si arakai langai ku bava la ungulu.”

⁹ Lakawkawluli! Kai swa Amuri adravane ka ngiamia ki cedare ka laangatu ka baali ku adravane, la ngimia ki tharialupu ka angatu ku ngicaemane, ngwalai numiane wamudaku pakisalrunga liniane.

¹⁰ Wamalraku numiane patwalai Izipiti, ikai calragulragu la ililukaku numiane taramasupatele ka caili, la baadhaku numiane ku kadaengane ki swa Amuri.

¹¹ Patwaladhaku ki lalalake numi pilri ku yuginsia, la patwaladhaku ki layacengecenge numi pacebe ku wadulru ngipapatarumara baai ki Twaumase. Swa Iseraylri! Pasalrivaku lu iyaku kikai? Tamatamaku; ka amia kikai pelaela.

¹² Ai kunumi wavutha numi paungulu ku bava kwini ki la ngiapapatarumaranga baai ki Twaumase la pakaicilri numi ki yuginsia pelaela ku vagali.

¹³ Lakamani lri patubakebakaku numiane pikai daedae, lri drepetaku numiane mia ki swaete ku taleke ka palridingi ka wadrepete ngubabelenge.

¹⁴ Adravane ka ridaridare lailai lri kai maka mubere; ku sapukuane lri amalreme; ku kwapingi lai kai maka ngipapalribulu.

¹⁵ Ku taralraili lri kai maka acegecege; ku maridare lailai ku kwapingi lai kai maka mubere; ku tarangurigirigi ka kwapingi kai lri maka ngipapalribulu.

¹⁶ Ikai kwini ki vai, kudra magagaarangenga ka lakwapingi lri sarare ku laadreme, si kisaswarau mubere. Ku Tamatama amia kikai pelaela.