2 Tisaruniki 3 - Ngudradreadrekadhane Ka Sisiu 魯凱語聖經

Pasikaiya naiane inulri

¹ Bibiilrilinga, laretesane, pasikaiya naiane inulri, ani karidare salraelre kai hukuingi ki Tamatama, si ani kiwsakene kitukucingalre, mia ku taikaiyane numiane kipasalraelre, kiwsakene kitukucingalre.

² La kitubia ki Twaumase ku apalribulane naiane pakidaili ki ngialisiane ka umawmase, asi lwiyane kaika masaalru ki Tamatama makanaelre sanaka umawmase.

³ Ai, ku Tamatama patengatengane, lri pakakeecenge numiane, ku kaika akikabebetethane numi ki manganga ka umawmase.

⁴ Ku Tamatama pakasalru naiane papia numiane, masalru nai numiane ka paiyaiya numi tukavagavaga, si parwakaikai piapia ku tapadrekadrekasane nai.

⁵ Ku Tamatama ani arake sangiluku numiane, lanu aru thingale kilrialringau ku sakialibake ki Twaumase, si tarumara ku baai ki Kirisitu ku kiadilane ku kidremedreme.

Pangiamia ku naika akaunganeini

⁶ Laretesane, lri pangukai nai ku nagane ki Tamatama ka Yesu Kirisitu drekase numiane: Kidaila patuelre ki lamasasalrai, ki kai palululudu ku tabulrwane nai ka lasinzia.

⁷ Kunumi ngiathathingale numi pudriadriingai, ku apangimiane twalralrau naiane. Sa ikaiyana nai numiane, kai nai masalrai,

⁸ la kai nai vutha kane ku aga ki palrapalra, takwalriyane nai kaungu lukavaiyane lukamaungu, pakai ku kaika apacepane pakwalri numiane.

⁹ Lu pia nai kikai, miakau kadrwa ku puku nai kitubi ku akipatarumarane nai ku sacekecekelane, ala ka pakaai nai ku atwalralravane numi naiane.

¹⁰ Sa ikai nai numiane kwini yakai ku taiyane nai kai kawriva, “Kudra kai mawaungu twatumane ku umawmase kai lri maka kane ku aga.”

¹¹ Kikai iya nai kai, amani sa kilalra nai ikai numiane yakai ku umawmase ku kadrwa ku kawaunguini, twaraakete ka kadrwa ku piapiaini ku manemane ku awngane, kathane ku akawriariarivane ki palrapalra.

¹² Ku miyaiya kai ku umawmase, lri pangukai nai ku nagane ki Tamatamata ka Yesu Kirisitu kaelaela liniane, pasapukwane liniane, isaselebana, si ngikakaungu la malra ku akaneane si cekecekele.

¹³ Ai, laretesane, madha lrukalruka ku apiane numi ku mathariri.

¹⁴ Alau lri ikaai ku umawmase ku kai mwabangalre pasalaladha kai takawrivane nai ikai ki tigami, ku miyaiya kai ku umawmase, kunumi dradreela si telenge, madha kirederedelane liniane, kwini lalasu lani kainu.

¹⁵ Ai, madha malramalra tubadha iniane, pangimia ki retesane bulru iniane.

Swabulrubulru

¹⁶ Ku wabaai ku sulivatane ka Tamatama ani arakai ku makaelaela ku apangimiane baai ku sulivatane numiane! Ku Tamatama ani ikai tapalra numiane makanaelre.

¹⁷ Amaniaku ka ngiapapacase, “Kwaku ka Pawru anu mudringadringai amiaku!” Sanaka tigamili paiyaku kai pacase ku nagane, kikai yai pacaseli.

¹⁸ Ku Tamatamata ka Yesu Kirisitu ani baai ku migemi numiane makanaelre.