2 Tisaruniki 2 - Ngudradreadrekadhane Ka Sisiu 魯凱語聖經

Kudra tarapasalrisalriu ka umawmase

¹ Laretesane, pangukai ku akelane ngusela ki Tamatamata ka Yesu Kirisitu, si ngukai ki asarubwane mitane si madredresenge iniane, lri kitubiaku numiane,

² madha kaduai kipamama kiupungu kudra taiyane kai ki vaga, “Ku akelane ngusela ki Tamatama ku vai wakelaanga.” Alau lri ikai ku umawmase ku amia kai kikai taiyane yai taiyane sapelaelaela nai ku hukuingi sa dindindu nai, alau lri ikai ku amianga kai taiyane pacase ki tigami nai iya.

³ Madha kilrilrilrigili ku tapangimiane sanaka aneeanenga. Asi lwiyane, lu lri kela kudra vai lri paswalana ikai ku bibiilrilinga ku wabaebalre, kudra niyanenga ka lri tara kamudu ka tarapasalrisalriu ka umawmase lri utaluvaivai.

⁴ Kwini tarapasalrisalriu ka umawmase lri baebalre patuelre kudra ki kiatu twaumase si la kiasukusukubu ki umawmase, si lalri ngitatu abelenge ka sabebeelengenga sanaka maneemane, si la pakeela ku wamwa nene ikai ki daane ki Twaumase, si ngitatu Twaumase.

⁵ Kunumi kainu ngwalringau? Sa ikaiyaku numiane yai peaelaelanga naku numiane ki kikai.

⁶ Kudra watelenge kikai asasane ku angimiane kikai laka manemane, wathingale numi. Sana kela ku vai, kudra tarapasalrisalriu ka umawmase lri utaluvaivai.

⁷ Kudra kiabababalai ngukai ki apasalrivane pathagilinga kaungu, ai, lu katuasenga kudra watelenge kikai, kilakikai lri utaluvaivai ngimiya.

⁸ Lukamaninga kwidra, ku tarapasalrisalriu ka umawmase lri utaluvaivai, ai ku Tamatama ka Yesu lu ngusela kela lri ipi papacai iniane, si arakai ku mwataluvaivai ku draredrare amudu iniane.

⁹ Kudra twalisi ki nitukakudhanane lri iluku ku puku ki Satange kela, si pia ku makaelaela ku matiasamali ka awngane, la paadrelane ku kaika patengane ku lrika angimiane lukabibilrili,

¹⁰ si arakai ku makaelaela ku salrigilane papia kwidra ki lalri kamudu ka umawmase, asi lwiyane kwi lalasu kai tarwamara, la kalrase kudra amani ku lri palribulu liniane ka patengane ka sabulrwane.

¹¹ Lakamani, ku Twaumase wabaai liniane ku apamamane lini ku kidremedreme, si palraingi ku akasalrwane lini ki kaika patengane.

¹² Ku lrika akitupasalrivane makanaelre ki kai masalru ki patengane ka sabulrwane, si siaperavane ki pasalrivane ka umawmase.

Kiapilri si tarumara ku akipalribulane

¹³ Kathalrai ki Tamatama ka laretesane, naika tapasikaiyane nai numiane kiaseaseasene ki Twaumase, asi lwiyane ku Twaumase wapilringa numiane, pangukai ki takaungane ki Siri paalrivilrivi si kisusu numi papia ki patengane ka sabulrwane, ala kipaswala numi kipalribulu.

¹⁴ Ngukai ku pelaela nai numiane ku hukuingi, ku Twaumase wadawlu numiane, wadawlu numiane si pakisupilri ku lrigu ki Tamatamata ka Yesu Kirisitu.

¹⁵ Lakamani, laretesane, pikaiya ku makeecenge ku salrwane, pangukai ku bulru nai ku patengane ka sabulrwane, adravane ka kawriva nai, ka nitigamiane ka pacase, kunumi tarapangimia patuelre.

¹⁶ Ku Twaumase kialibake mitane, ngwalai ku migemini, wabaai mitane ku palralrawthu ku makeecenge ka puku si mathariri ku sidramane. Kai Tama ka Twaumase si Tamatamata ka Yesu Kirisitu,

¹⁷ ani pasapukwane numiane, lani ikai ku garangane numi pelaela si pangimia sanaka mathariri ku awngane.